ޔުނައިޓެޑް އަރަބް އެމިރޭޓްސް (ޔޫއޭއީ) އިން އީރާނުގެ އެތެރެ އަށް ސިއްރުން އަސްކަރީ ހަމަލާތަކެއް ދީފައިވާ ކަމަށާއި، ހުސްވި އެޕްރީލް މަހުގެ 8 ވަނަ ދުވަހު ލަވާން ޖަޒީރާގެ ތެޔޮ ރިފައިނަރީ އަށް ޙަމަލާ ދިނީ ވެސް ސީދާ ޔޫއޭއީ އިން ކަމަށް ރިޕޯޓުތައް ބުނެފިއެވެ.

މި ޙަމަލާގެ ސަބަބުންދުވާލަކު 70000 ފީފާގެ ތެޔޮ ނެރޭ ބޮޑު ކާރުޚާނާގައި ރޯވެ، ރިފައިނަރީގެ އޮޕަރޭޝަންތައް ހުއްޓި ބޮޑެތި ގެއްލުންތަކެއް ލިބުނެވެ.

^{އީރާނުގެ ލަވާން ޖަޒީރާ}

އީރާނުން އޭރު ކަށަވަރުކޮށްދިން ގޮތުގައި އެ ފެސިލިޓީއަށް ޙަމަލާ ދިނީ "ދުޝްމަނުން" ނެވެ. ނަމަވެސް އޭރު އެއީ ކޮން ބައެއްގެ ޙަމަލާ އެއް ކަމެއް އީރާނަކަށް ސީދާ ކަށަވަރެއް ނުވެއެވެ. އަދި ޔޫއޭއީން ވެސް މިކަމުގައި ބައިވެރިވާކަމަށް އިއުތިރާފުވެފައެއް ނުވެއެވެ. އެ މީހުން ތިބީ ސިއްރުކޮށްގެންނެވެ. 

މިކަންކަން ހިނގާފައި ވަނީ ހަނގުރާމަ ހޫނުވެ މެދުއިރުމަތީގެ އެކި ހިސާބުތަކުގައި ވަރުގަދައަށް މިސައިލް އާއި ޑްރޯން ބަދަލުކުރުމުގެ ދަނޑިވަޅުގައެވެ.

ރިޕޯޓްތައް ބުނާ ގޮތުގައި ހަނގުރާމައިގެ ތެރޭގައި އީރާނުން ޔޫއޭއީ އާއި ދިމާއަށް 2،800 އަށް ވުރެ ގިނަ މިސައިލާއި ޑްރޯން ފޮނުވާފައިވާއިރު، ބަދަލު ހިފުމުގެ ހަމަލާތައް ކުވައިތާއި ގަލްފްގެ އެހެން ގައުމުތަކަށް ވެސް އީރާނުން އަމާޒުކޮށްފައި ވެއެވެ. 

އީރާނުން ބުނީ ތިމަންނާމެން ދެނީ ރައްދު ހަމަލާތައް ކަމަށެވެ. އީރާނުގެ ހަމަލާތަކުގައި ޔޫއޭއީ، ކުވައިތު، އޮމާން އަދި ގަލްފްގެ އިތުރު ގައުމުތަކުގައި އާންމުންނާއި ސިފައިން މަރުވެފައިވާއިރު، ތެޔޮ ކާރުޚާނާތައް ވެސް ބަންދުކުރަން ޖެހުނު ކަން ފާހަގަ ކުރެވެއެވެ.

މި ހަނގުރާމައިގައި މިހާތަނަށް އެންމެ ބޮޑު ގެއްލުމެއް ލިބުނީ އީރާނުގެ އިތުރުން ޔޫއޭއީ އާއި އިޒުރޭލަށެވެ. އެންމެ ބޮޑު ލަދަކާއި ކުރުމަތިލާން ޖެހުނީ އެމެރިކާއެވެ. ސަބަބަކީ އީރާނުން ދިން ރައްދު ހަމަލާތަކުގެ ބޮޑު ބަޔަކީ މުޅިން ވެސް އެމެރިކާގެ ސިފައިން މަރުކަޒު ކޮށްފައިވާ ތަންތަނަށް ދިން ހަމަލާތަކެވެ.