މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) ގެ ޗެއާމަން ހުސައިން އަފީފް، ބޭންކް އޮފް މޯލްޑިވްސް (ބީއެމްއެލް) އިން ރާއްޖޭގެ ފަތުރުވެރިކަމުގެ ސިނާއަތަށް މެދުނުކެނޑި ދެމުންގެންދާ އެއްބާރުލުމަށް ތައުރީފް ކުރައްވައިފި އެވެ. އޭނާ މިކަން ފާހަގަކުރެއްވީ ފަތުރުވެރިކަމުގެ ދާއިރާގައި ހަރަކާތްތެރިވާ ވިޔަފާރިތައް ފުޅާކުރުމާއި ހިންގުން ހަރުދަނާކުރުމުގައި ބޭންކުން އަދާކުރާ މުހިންމު ދައުރަށް އަލިއަޅުއްވާލައްވަމުންނެވެ.
ރާއްޖޭގެ ފަތުރުވެރިކަމުގެ ސިނާއަތް ކުރިއަރަމުން އަންނައިރު، ރިސޯޓްތައް ތަރައްގީކުރުމާއި، ހިދުމަތްތައް ފުޅާކުރުމަށް ފައިނޭންސިން އަކީ އެންމެ މުހިންމު އެއް އަސާސެވެ. މިގޮތުން ބީއެމްއެލްއިން މި ދާއިރާއަށް ދެމުންދާ ދިގު މުއްދަތުގެ އެހީތެރިކަމަކީ ސިނާއަތުގެ ކުރިއެރުމަށް ލިބޭ ބޮޑު ބާރެއްގެ ގޮތުގައި ވަނީ ބަލައިގެންފަ އެވެ.
މިކަމާ ގުޅޭގޮތުން ވާހަކަދައްކަވަމުން ހުސައިން އަފީފް ވިދާޅުވީ، ބޭންކް އޮފް މޯލްޑިވްސް އަކީ ފަތުރުވެރިކަމުގެ ދާއިރާގެ ވަރަށް މުހިންމު، އިސް ބައިވެރިއެއް ކަމަށެވެ. އަދި އެ ބޭންކުން ދޫކުރާ ފައިނޭންސިންގެ އެހީގައި މި ސިނާއަތް ފުޅާކުރުމަށާއި، އައު އީޖާދީ ހިދުމަތްތައް ތައާރަފްކުރުމަށާއި، އަދި ދިމާވާ ގޮންޖެހުންތަކުން އަރައިގަތުމަށް މަގުފަހިވެފައިވާ ކަމަށް އޭނާ ފާހަގަކުރެއްވި އެވެ.
މަޓީގެ ޗެއާމަންގެ މި ވާހަކަފުޅުތައް އައިސްފައިވަނީ، ބީއެމްއެލްގެ ފައިނޭންސިން ގާބިލުކަން އިތުރުކުރުމަށްޓަކައި ބައިނަލްއަގުވާމީ އިންވެސްޓަރުންނާ ގުޅިގެން މަސައްކަތް ކުރަމުންދާ ދަނޑިވަޅެއްގަ އެވެ. މިކަމަށް އިޝާރާތް ކުރައްވައި އަފީފް ވިދާޅުވީ، ފައިނޭންސިން ހޯދުމަށް އައު މަގުތައް ހޯދުމަށް ބޭންކުން އިސްނަގައިގެން ކުރަމުންދާ މަސައްކަތްތަކުގެ ސަބަބުން، ފަތުރުވެރިކަމުގެ ދާއިރާގައި ހަރަކާތްތެރިވާ ވިޔަފާރިތަކުގެ ގާބިލުކަން އިތުރުވެ، ގައުމުގެ އިގްތިސާދީ ކުރިއެރުމަށް މުހިންމު ހިއްސާއެއް ލިބިގެންދާނެ ކަމަށެވެ.
ފަތުރުވެރިކަމުގެ ސިނާއަތް ކުރިއެރުވުމަށްޓަކައި އައު މަޝްރޫއުތައް ފެށުމާއި، މިހާރު ހުރި ތަންތަން މަރާމާތުކޮށް ތަރައްގީކުރުމުގެ އިތުރުން، ދެމެހެއްޓެނިވި ގޮތެއްގައި ވިޔަފާރި ކުރިއަށް ގެންދިއުމަށް މާލީ އެހީތެރިކަން ބޭނުންވެ އެވެ. ރާއްޖޭގެ އިގްތިސާދުގެ މައިނާރަކީ ފަތުރުވެރިކަން ކަމަށްވާއިރު، މި ސިނާއަތުގެ ދިގު މުއްދަތުގެ ބޭނުންތަކާއި ކުރިއެރުމުގެ ފުރުސަތުތައް ދެނެގަންނަ މާލީ އިދާރާއެއްގެ އެހީތެރިކަން ސިނާއަތަށް ވަރަށް ބޮޑަށް ބޭނުންވެ އެވެ.
ބޭންކް އޮފް މޯލްޑިވްސްއިން މިހާރުވެސް ދަނީ ފަތުރުވެރިކަމާ ގުޅުންހުރި އެކި ދާއިރާތަކަށް މާލީ އެހީތެރިކަން ފޯރުކޮށްދެމުންނެވެ. އަދި ބޭންކުން ފައިނޭންސް ހޯދުމަށް ކުރާ މަސައްކަތްތަކުގެ ސަބަބުން، ކުރިއަށް އޮތް ތަނުގައިވެސް ފަތުރުވެރިކަމުގެ ސިނާއަތުގެ އެންމެ އިތުބާރުހުރި މާލީ ބައިވެރިޔާގެ ގޮތުގައި ބީއެމްއެލް ދެމިއޮންނާނެ ކަމަށް ބެލެވެ އެވެ.
ހުސައިން އަފީފްގެ މި ތައުރީފަކީ، ރާއްޖޭގެ މުޅި އިގްތިސާދު ކުރިއެރުވުމުގައާއި، ފަތުރުވެރިކަމުގެ ތަރައްގީގެ ދުވެލި ހަލުވިކުރުމުގައި ދާއިމީ މާލީ އެހީތެރިކަމުގެ މުހިންމުކަން މުޅި ސިނާއަތުން ބަލައިގަންނަކަން ހާމަވެގެންދިޔަ ކަމެކެވެ.
