ހުޅުމާލެ ފޭސް 1 އަދި ފޭސް 2 ގުޅޭ ސަރަހައްދުގައި އޮންނަ ޗެނަލް ތެރެއަށް އޮއިވަރާއެކު ޖަމާވާ ކުނި މަދުކުރުމަށްޓަކައި، ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން އެ ސަރަހައްދުގައި ދާ ޖެހުމުގެ މަސައްކަތް ފަށައިފި އެވެ.

މި މަސައްކަތް އެޗްޑީސީން ފަށާފައިވަނީ މި ހަފްތާގެ ތެރޭގައި ޗެނަލް ތެރެއަށް ގިނަ އަދަދެއްގެ ކުނި ޖަމާވެފައިވާ ފޮޓޯތަކާއި ވީޑިއޯތައް މީސް މީޑިއާގައި އާންމުވެ، ގިނަ ބައެއްގެ ފާޑުކިޔުން އެކަމަށް އަމާޒުވެފައި ވަނިކޮށެވެ. މޫދަށް ކުނި އަޅާ ފަރާތްތަކުގެ ސަބަބުން ތިމާވެއްޓަށް ލިބޭ ގެއްލުންތަކާ މެދު ގިނަ ބަޔަކު ވަނީ ކަންބޮޑުވުން ފާޅުކޮށްފަ އެވެ.

^{ޗެނަލަށް ޖަމާވެފައިވާ ކުނީގެ މައްސަލަ ހައްލުކުރުމަށް ދާ ޖެހުމުގެ މަސައްކަތް ކުރަނީ. / ފޮޓޯ: އެޗްޑީސީ}

ހުޅުމާލޭގެ މި ޗެނަލް ހިމެނޭ ސަރަހައްދަކީ މިހާރު އާންމުންގެ މެދުގައި ވަރަށް މަގުބޫލު ތަނެކެވެ. އެގޮތުން އާއިލީ ކުދި ޕާޓީތަކާއި، ހަވީރު ސައި ބުއިމާއި، އަދި ހަވީރު ފިންޏަށް ގިނަ އަދަދެއްގެ މީހުން އެ ސަރަހައްދަށް ޖަމާވެއެވެ. މީގެ އިތުރުން ރޯދަ މަހު މާހެފުމާއި ރޯދަ ވީއްލުން ފަދަ އިޖުތިމާއީ ހަރަކާތްތައް ވެސް އެ ސަރަހައްދުގައި ބާއްވަމުން އާދެ އެވެ.

މި ސަރަހައްދުގެ މުހިންމުކަން އިތުރުވެގެން ދިޔަ އަނެއް ސަބަބަކީ، މި ހަފްތާގެ ތެރޭގައި އެ ޗެނަލް ތެރެއަށް ކޯމަސް އައިނެއް ވަދެފައިވުމެވެ. މި މަންޒަރު ބަލާލުމަށް ވެސް ގިނަ ބަޔަކު އެ ސަރަހައްދަށް ޖަމާވެފައިވާއިރު، މިފަދަ ރީތިކަން ލިބިފައިވާ ތަނެއް ކުނިން ތަގައްޔަރުވުމަކީ އާންމުންގެ ބޮޑު ޝަކުވާއެކެވެ.