މާލޭގެ އުތުރު ފަރާތު ބޮޑުތަކުރުފާނު މަގު ތަރައްގީކުރުމުގެ މަޝްރޫޢުގެ ފޭސް 1 ގެ ދަށުން ކުރިއަށްދާ ޝީޓް ޕައިލް ކުރުމުގެ މުހިންމު މަސައްކަތްތަކެއް ނިންމާލައިފި އެވެ.

މި މަޝްރޫއުގެ ދަށުން މިހާތަނަށް ސެގްމަންޓް 2، 3 އަދި 4 އެއްކޮށްލައިގެން ޖުމްލަ 278 މީޓަރުގެ ސަރަހައްދެއްގައި ޝީޓް ޕައިލް ވަނީ ޖަހާ ނިންމާފަ އެވެ. މި މަސައްކަތަކީ މާލޭގެ އުތުރު ފަރާތުގެ މަގުތައް ޒަމާނީ ފެންވަރަށް ތަރައްގީކޮށް، ދަތުރުފަތުރަށް ލުއިފަސޭހަކަން ހޯދައިދިނުމަށް ކުރިއަށްގެންދާ މުހިންމު މަޝްރޫއެކެވެ.

މި ސެގްމަންޓުތަކުގައި މިހާރު ކުރިއަށްދާ މަސައްކަތްތަކުގެ ތެރޭގައި ނަރުދަމާ ނިޒާމު އަޕްގްރޭޑް ކުރުމާއި، ފެނާއި ނަރުދަމާގެ މައި ހޮޅިތައް އެޅުމުގެ މަސައްކަތް ހިމެނެ އެވެ. މީގެ އިތުރުން، ވިއްސާރަ ދުވަސްވަރު މަގުތަކުގައި ފެންބޮޑުވުމުގެ މައްސަލައަށް ހައްލެއް ހޯދުމުގެ ގޮތުން ސްޓޯމްވޯޓާ ކެޗްޕިޓްތަކާއި ސްޓޯމްވޯޓާ ވަޅުތައް ބެހެއްޓުމުގެ މަސައްކަތުގެ އިތުރުން، އެންކަރ ބްލޮކްތައް ބެހެއްޓުމާއި ކީވޯލް ޕެނަލްތައް ހަރުކުރުމުގެ މަސައްކަތްވެސް ދަނީ ބާރުމިނުގައި ކުރިއަށެވެ.

މި މަޝްރޫޢުގެ ސެގްމަންޓް 5 ގެ ދަށުން މަގުބައްތިތައް މިހާރު ވަނީ ހަރުކޮށް ނިންމާފަ އެވެ. އަދި ކީވޯލްއާ އިންވެގެން އޮންނަ ދުވާރު ހެދުމުގެ ބާކީ ހުރި މަސައްކަތްތައް މި ހަފުތާގެ ނިޔަލަށް ނިންމާލުމަށް ވަނީ ތާވަލުކުރެވިފައެވެ.

ފޭސް 1 ގެ މަސައްކަތްތައް މިވަގުތު މައިގަނޑު ގޮތެއްގައި ކުރިއަށްދަނީ ހެންވޭރު ފެރީ ޓާމިނަލްއިން ފެށިގެން މަސްވެރިންގެ ޕާކާ ހަމައަށް އޮތް ސަރަހައްދުގަ އެވެ. މި މަޝްރޫއުގެ އެންމެ ފާހަގަކޮށްލެވޭ އެއް ކަމަކީ ސިޓީ ގާޑަން ކުރިމަތިން އޮންނަ ސަރަހައްދުގައި 500 ސައިކަލުގެ ޖާގައިގެ ބޮޑު ޕާކިން ޒޯނެއް ތަރައްގީކުރުމެވެ. މި ސަރަހައްދުގައި ކަނޑު އުޅަނދުފަހަރަށް ފަސޭހައިން ކައިރިކުރެވޭ ގޮތަށް ވަށައިގެން ކީވޯލް ޖެހުމަށްވެސް ވަނީ ހަމަޖެހިފަ އެވެ.

ސަރުކާރުގެ އަމާޒަކީ އަންނަ ޖޫން މަހުގެ ނިޔަލަށް މި މަޝްރޫއުގެ ހުރިހާ މަސައްކަތްތަކެއް އެއްކޮށް ނިންމާލައި، އާންމުންނަށް ބޭނުންކުރެވޭނެ ގޮތް ހަމަޖެއްސުމެވެ. މި މަޝްރޫއު ނިމުމުން މާލޭގެ އުތުރު ފަރާތުގެ ބޮޑުތަކުރުފާނު މަގަށް ބޮޑު ބަދަލެއް އައިސް، ދަތުރުފަތުރުގެ ނިޒާމަށް ބޮޑު ލުޔެއް ލިބިގެންދާނެ އެވެ.