ދިވެހިރާއްޖޭގެ ޝިޕިންގ ކުންފުނީގައި މިހާރު ވެސް ބޭނުންކުރަމުން ގެންދާ އެމްއެސްއެސް އޮޕާލް އަކީ ދިވެހިރާއްޖެ އިން އެއްފަހަރާ ފައިސާ ދީގެން ގެނެސްފައިވާ ބޯޓެއް ނޫނެވެ. އެ ބޯޓުގެ ވެރިފަރާތަކީ އަދިވެސް އިންޑިއާގެ ޗޮވްގުލެ ސްޓީމްޝިޕްސް ލިމިޓެޑެވެ.

ބައިތުލްމާލުން އެއްފަހަރާ ފައިސާ ޚަރަދުކުރުމުގެ ބަދަލުގައި ބެއާބޯޓުގެ ގޮތުގައި ޑިއުޓީ ފްރީ ކޮށް ރާއްޖެ ގެނެސް ވަގުތީ ރަޖިސްޓްރީއެއްގައި ދިވެހި ދިދައިގެ ދަށުގައި ބޭނުންކުރަމުން ފައިސާ ދައްކަމުންދައްކަމުން ޚަލާޞް ކުރީއެވެ. އެސްޓީއޯ އާއި ޤައުމީ ޝިޕިންގ ކުންފުންޏަށް ލިބުނު މި އެޑްވާންޓޭޖް މެދުފަންތީގެ ވިޔަފާރިތަކަށް ވެސް ލިބެމުން ދަނިކޮށް، އެމްޑީޕީން ވަނީ އެމީހުން ވެރިކަމުން ފައިބައިގެން ދަނިކޮށް ރައްޔިތުންނަށް ބޮޑު ލަނޑެއް ދީފައެވެ.

އެމްޑީޕީން ދިން ލަނޑު

އެމްޑީޕީން ވެރިކަމުން ފޭބީ ބެއާބޯޓެއްގެ ގޮތުގައި ރަޖިސްޓްރީ ކޮށްދޭނެ އުޅަނދުތައް ވެސް ވަކި ސައިޒަކަށް ފައްތާފައެވެ. ޕްލެޝަރ ކްރާފްޓްގެ ގޮތުގައި ރާއްޖެއިން ބޭރުގައި ރަޖިސްޓަރީކޮށްފައިވާ އުޅަނދުފަހަރުގެ ތެރެއިން ވަކި ސައިޒެއްގެ އުޅަނދުފަހަރު ބެއާބޯޓުގެ ގޮތުގައި ނުގެނެވޭނޭ ގޮތް ހަދައި، ކުރިން ރާއްޖޭގައި ބެއާބޯޓުގެ ގޮތުގައި ގެނެސްފައިވާ އުޅަނދުތަކުން ހަދާފައިވާ އެއްބަސްވުންތައް ވެސް 2023 ޑިސެންބަރުގެ ނިޔަލަށް އޮޓޮމެޓިކުން ކެންސަލް ވާ ގޮތަށް ހަދާފައެވެ. އޭރު މިދެންނެވި އުޅަނދުތަކަކީ ހައިއެންޑް ރިސޯޓުތަކަށް ޓޫރިސްޓުން ޓްރާންސްފާ ކުރުމުގެ ޚިދުމަތް ފޯރުކޮށްދެމުން ގެންދިޔަ އުޅަނދުތަކެވެ. މި ޚިދުމަތް އެމްޑީޕީގެ ސަރުކާރުން ހުއްޓުވީ ރޭވުމެއްގެ ތެރެއިންނެވެ. ވިޔަފާރިވެރިންނާއި ރައީސް މުޢިއްޒުގެ ސަރުކާރާއި ޖެއްސުމަށެވެ.

ގެންނަންވީ އިޞްލާޙް

ކޮންމެ މީހަކަށް އެއްފަހަރާ 40-50 މިލިއަން ޑޮލަރެއް ނުލިބޭނެއެވެ. އެކަމަކު ހައިޑްރޯފޮއިލް ޓެކްނޮލޮޖީ ޤާއިމްކޮށްފައިވާ އުޅަނދުތަކާއި އެ ނޫން ވެސް 20-15 ފޫޓު ނުވަތަ އެއަށްވުރެ ބޮޑު އުޅަނދުތައް ވަކި މުއްދަތެއްގެ ތެރޭގައި ފައިސާ ދައްކައި މިލްކު ކުރެވޭ ގޮތަށް ރާއްޖެ އަށް ގެނެވެން އެބަހުއްޓެވެ. މިކަން ކުރެވޭނީ ސުންރޭޓް ޓެރިފް ސެޓްފިކެޓް ޓުއަރިޒަމް މިނިސްޓްރީ އަށް ހުށަހެޅޭނެ ގޮތަށް ޤަވާޢިދަށް ބަދަލު ވެސް ގެނެސްގެންނެވެ. މިއީ ޓުއަރިޒަމް މިނިސްޓްރީގެ އަތްމަތީގައި އޮތް ކަމެކެވެ.

13.7 މީޓަރަށް ވުރެ ކުދި އުޅަނދުތައް ނުގެނެވޭނެ ގޮތް ހަދާފައި ވަނީ ކުރީ ސަރުކާރުންނެވެ. އަދި ބެއާބޯޓުތަކުގެ އެއްބަސްވުންތައް 2023 ޑިސެންބަރަށް ބާޠިލްވާގޮތަށް ހެދީވެސް ކުރީސަރުކާރުންނެވެ.

ފާހަގަ ކޮށްލަން ޖެހޭ މުހިއްމު ކަމަކީ ބެއާބޯޓުގެ ނަމުގައި ގެނެސްފައިވާ އުޅަނދުތައް އޮޕަރޭޓް ކުރަމުން ދިޔައީ ސަރުކާރަށް ދައްކަން ޖެހޭ ހުރިހާ ފީ އެއް ދައްކައި، ބަރާބަރަށް ޓެކްސް ވެސް ދައްކަމުންނެވެ. ރާއްޖޭގެ އެހެން އުޅަނދުފަހަރާއި ޚިލާފަށް މި އުޅަނދުފަހަރު އޮޕަރޭޓް ކުރުމުގެ ސަބަބުން އެތައް ވަޒީފާއެއް އުފެދި، ޔާޑުތަކަށް ވެސް ޢާމްދަނީ ލިބި، ސްޕެއާތަކުގެ ވިޔަފާރި ފުޅާވެ، އިޤްތިޞާދަށް ނުހަނު ފައިދާ ލިބުނެވެ. މި ހުރިހާ ކަމެއް ހުއްޓުވައިލީ އެމްޑީޕީ ސަރުކާރުން ކަން ރައްޔިތުން ހަނދާނެއް ނުނެތޭނެއެވެ.