މިއަހަރުގެ (1447 ވަނަ އަހަރުގެ) ހައްޖު މިޝަންގައި ހިމެނިވަޑައިގަންނަވާ މެމްބަރުންނާ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ބައްދަލުކުރައްވައިފި އެވެ.
އިސްލާމީ ކަންތައްތަކާ ބެހޭ ވުޒާރާގައި މިއަދު ބޭއްވެވި މި ބައްދަލުކުރެއްވުމުގައި، ހައްޖު މިޝަންގެ މެމްބަރުންނަށް މިނިސްޓަރު ވަނީ މުހިންމު އިރުޝާދުތަކެއް ދެއްވާފަ އެވެ. ވަޒީރުގެ ވާހަކަފުޅުގައި، ހައްޖު މިޝަންގެ މެމްބަރުންގެ ޒިންމާ ވީހާވެސް ފުރިހަމައަށް އަދާކުރެއްވުމަށާއި، ދިވެހި ހައްޖުވެރިންނަށް ފޯރުކޮށްދޭ ހިދުމަތްތަކަކީ އެންމެ ފުރިހަމަ ހިދުމަތްތަކެއްކަން ކަށަވަރުކުރުމަށް ނަސޭހަތްތެރިވެލެއްވި އެވެ.
މީގެ އިތުރުން، ހައްޖުގެ އަޅުކަމުގެ ތެރޭގައި ދިވެހި ހައްޖުވެރިންނަށް ދިމާވެދާނެ ދަތިތަކަށް އަވަސް ހައްލެއް ހޯއްދަވައިދެއްވުމަށް މަސައްކަތް ކުރެއްވުމަށާއި، ހައްޖުވެރިންނާ ވީހާވެސް ގާތުން މަސައްކަތް ކުރެއްވުމަށް މިނިސްޓަރު އިލްތިމާސް ކުރެއްވި އެވެ.
Advertisement
މި ބައްދަލުކުރެއްވުމަކީ ކުރިއަށް އޮތް ހައްޖު މޫސުމުގައި ދިވެހި ހައްޖުވެރިންނަށް ބޭނުންވާ އެހީތެރިކަމާއި އިންތިޒާމުތައް އެންމެ ފުރިހަމައަށް ހަމަޖެއްސުމަށްޓަކައި ބޭއްވުނު ބައްދަލުވުމެކެވެ. މި ސަރުކާރުން އަންނަނީ ދިވެހި ހައްޖުވެރިންގެ ކަންކަން ވީހާވެސް އޮމާންކޮށް ގެންދިއުމަށް ގިނަގުނަ މަސައްކަތްތަކެއް ކުރަމުންނެވެ.
