ކުރީގެ ރައީސް މައުމޫން ޢަބްދުލްޤައްޔޫމުގެ ވެރިކަމުން ފެށިގެން މިއަދާއި ހަމަޔަށް ހާމަކަން ބޮޑު ގޮތެއްގައި ޢާންމު ނުކުރި ފަތުރުވެރިކަމުގެ ދާއިރާގެ ފުރިހަމަ ސްޓެޓިސްޓިކްސް މިސަރުކާރުން ހާމަކުރަން ފަށައިފިއެވެ.

ދުނިޔޭގެ އެހެން ޤައުމުތަކުގައި ކްރޫޒް ޝިޕްތަކާއި ސުޕަޔޮޓްތަކުގެ މަޢުލޫމާތު ވަކިން ބެލެހެއްޓި ކަމުގައި ވިޔަސް އެ ޤައުމެއްގެ ޓުއަރިޒަމް މިނިސްޓްރީގެ ސްޓެޓިސްޓިކްސްގައި ހިމަނައި ޢާންމު ކުރެއެވެ. ނަމަވެސް ރާއްޖޭގައި މި މަޢުލޫމާތުތައް އެންމެ ފުރިހަމައަށް ޢާންމުކުރަން ފެށީ އަދި ކިރިޔާއެވެ. ކުރީގެ ހުރިހާ ސަރުކާރެއްގެ ޓުއަރިޒަމް މިނިސްޓްރީ އިން އޮތީ ކްރޫޒް ޝިޕްތަކާއި ސުޕަޔޮޓްތަކުގެ ސްޓެޓިކްސްގައި “އަތްއަޅައި ފޮރުވާފަ”އެވެ.

މިނިސްޓްރީ އޮފް ޓޫރިޒަމް އެންޑް ސިވިލް އޭވިއޭޝަނުން މިހާރު ޢާންމުކޮށްފައިވާ މަޢުލޫމާތުތަކަށް ބަލާއިރު ކްރޫޒް ޓޫރިޒަމް އެއްވަރެއްގައި ކުރިއަރަމުން އަންނައިރު، އާ ތަފާސް ހިސާބުތަކުން ދައްކާ ގޮތުގައި ކަނޑުމަގުން ރާއްޖެ އަންނަ މީހުންގެ އަދަދު ވަރަށް ބޮޑަށް އިތުރުވެއްޖެއެވެ.

ހުސްވި އޭޕްރީލް މަހުގެ ފަހުކޮޅާއި ހަމަޔަށް ރާއްޖެ އަށް ޒިޔާރަތްކުރި ފަތުރުވެރިންގެ ޢަދަދު 791،093 އަށް އަރާފައިވާއިރު، 17،346 ފަތުރުވެރިން އައިސްފައި ވަނީ ކްރޫޒްޝިޕްތަކުންނެވެ. މިއީ ވައިގެ މަގުން އަންނަ މީހުންނާއި އަޅާބަލާއިރު މަދު ޢަދަދެއް ކަމުގައި ފެންނަން ހުއްޓަސް، ރާއްޖޭގެ އިޤްތިޞާދަށް ވަރަށް ބޮޑު ޢާމްދަނީއެއް ވައްދައިދޭ ތަފާތު ކެޓަގަރީއެއް ފުޅާވަމުން އަންނަކަން އިންޑަސްޓްރީގެ ބޭފުޅުން ފާހަގަކުރެއެވެ.

ކްރޫޒް ޝިޕްތަކުން ހަމައެކަނި ޓޫރިޒަމް މިނިސްޓްރީ މެދުވެރިކޮށް ދައުލަތަށް ވަންނަ ފައިސާ

1. 1000 ޑޮލަރު (ބޮޔޭޖް) - ރާއްޖެ އަށް ބޯޓު ވަންނަ ކަމަށްޓަކައި “ކްރޫޒް އެންޑް ހާބާ ފީ” ގެ ނަމުގައި ދައްކާ ފައިސާ.
2. 850 ޑޮލަރު - ޕެސެންޖާ ޝިޕް ލައިސަންސް ފީ (މިއީ ކޮންމެ ދުވަހަކު ދައްކަން ޖެހޭ 800 ޑޮލަރު)
3. 5 ޑޮލަރު ކޮންމެ ބޮލަކަށް ކޮންމެ ދުވަހަކު ޕެސެންޖާފީގެ ގޮތުގަ. 1000 ފަސިންޖަރުން ނަމަ ދުވާލަކަށް 5000 ޑޮލަރު ދައްކާނެ.
4. ބޮލަކަށް ގްރީން ޓެކްސް ގެ ގޮތުގައި ދުވަހަކަށް 12 ޑޮލަރު (މިއީ 1000 ފަސިންޖަރުންނަށް ނަމަ ދުވާލަކަށް 12000 ޑޮލަރު.

ކްރޫޒް ޝިޕްތަކުން ހަމައެކަނި ޓްރާންސްޕޯޓް މިނިސްޓްރީ އަށް ވަންނަ ފައިސާ

1. ލައިޓް ޑިވްސް 13000 ރުފިޔާ
2. އެންޓްރެންސްފީ (96000 ޓަނުގެ ބޯޓެއް ނަމަ 46000 ރުފިޔާ. ރާއްޖެ އަށް ޢާންމުކޮށް އަންނަނީ މި ސައިޒުގެ ބޯޓު)

ކްރޫޒް ޝިޕްތަކުން ހަމައެކަނި އެމްޕީއެލް އަށް ވަންނަ ފައިސާ

1. ޕައިލެޓް ފީ އަށް 100000 ރުފިޔާ ވަނުމަށާއި ފުރުވައިދިނުމަށް ޗާޖުކުރޭ.

ކްރޫޒް ޝިޕްތަކުން ހަމައެކަނި އެމްޓިސީސީ އަށް ވަންނަ ފައިސާ

1. އިއްޒުއްދީން ފާލަމަށް ގެސްޓުން ފައިބާތީވެ ދުވާލަކަށް 24000 ރުފިޔާ.

މީގެ އިތުރުން އެއިން އަންނަ ފަތުރުވެރިން ގޮވައިގެން ތަންތަނަށް ދަތުރުކުރާ ރާއްޖޭގެ އޮޑިދޯނިފަހަރާއި ލޯންޗުތަކަށް ވެސް 100000 - 150000 ޑޮލަރު ވަންނާނެ ކަމަށް އިންޑަސްޓްރީގެ ސްޓޭކްހޯލްޑަރުން ފާހަގަ ކުރެއެވެ.

ކްރޫޒް ޓޫރިޒަމަކީ ރިސޯޓްތަކާއި ގެސްޓްހައުސް ފަދަ މިހާރު ހުރި ސެގްމަންޓްތަކާ ވާދަކުރުމުގެ ބަދަލުގައި، އެ ސެގްމަންޓްތައް ފުރިހަމަކޮށްދޭ ކަމެކެވެ.

މާޔާގެ ރައީސް މުޙައްމަދު ނަޝީދު ވިދާޅުވީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އަކީ ރާއްޖޭގެ ފަތުރުވެރިކަމަށް ކުރިމަތިވި ކޮޅިގަނޑުން ޤައުމު ސަލާމަތްކޮށްދެއްވި ރައީސް ކަމަށެވެ.

“އަޅުގަނޑު ހަމަ ވަކިން ފާހަގަކޮށްލަން ބޭނުން ރައީސް ޑރ.މުޢިއްޒުގެ މަސައްކަތްޕުޅު. ސުޕަޔޮޓްތަކާއި ކްރޫޒްޝިޕްތައް ރާއްޖެއަށް އައުން ހަމަ ގާތްގަނޑަކަށް މުޅިން ހުއްޓުމަކާއި ގާތަށް ދިޔަ. އެއީ ސިނާޢަތަށް ކުރިމަތިވި ކޮޅިގަނޑެއް. އެކަމުން އިންޑަސްޓްރީ ސަލާމަތް ކޮށްދެއްވައި ކުރިއަރުވައިދެއްވީ ރައީސް.. އެކަމަު އަދިވެސް އެބަހުރި އިތުރު ކަންތަކެއް،” މާޔާގެ ރައީސް މުޙައްމަދު ނަޝީދު ވިދާޅުވިއެވެ.