އެމްޑީޕީގެ ޗެއާޕާސަން ހޮވުމަށް ބާއްވާ އިންތިހާބާއި އެ ޕާޓީގެ ގައުމީ މަޖިލީހުގެ އިންތިހާބު ބާއްވާނެ ފައިސާ ނެތް ކަމަށް ވިދާޅުވެ، އެ ދެ އިންތިހާބު ވެސް ރިޔާސީ ޕްރައިމަރީގެ ފަހަށް ފަސްކުރުމަށް އެ ޕާޓީގެ ވަގުތީ ޗެއާޕާސަން އަބްދުލްޣަފޫރު މޫސާ (ގަޕޯ) ހުށަހަޅުއްވައިފި އެވެ.
ރައްޔިތުންގެ މަޖިލީހުގެ ހަނިމާދޫ ދާއިރާގެ މެމްބަރުކަން ވެސް ކުރައްވަމުން ގެންދަވާ ޣަފޫރު، އެމްޑީޕީގެ ގައުމީ މަޖިލީހުގެ ވަޓްސްއެޕް ގްރޫޕަށް ފޮނުއްވި މެސެޖެއްގައި ވިދާޅުވީ، މި ދަނޑިވަޅުގައި އިންތިހާބު ބާއްވައިފިނަމަ ޕާޓީގެ އެތެރޭގެ މަސްލަހަތު ގެއްލި، އޭގެ ސަބަބުން ސަރުކާރު ޖަވާބުދާރީކުރުވުމުގެ މަސައްކަތަށް ބޮޑެތި ހުރަސްތަކެއް ކުރިމަތިވެދާނެ ކަމަށެވެ.
އިންތިހާބު ފަސްކުރަން ޖެހޭ ދެވަނަ ސަބަބެއްގެ ގޮތުގައި ޣަފޫރު ފާހަގަކުރެއްވީ މާލީ ދަތިކަމެވެ. އޭނާ ވިދާޅުވި ގޮތުގައި، ދައުލަތުގެ ބަޖެޓުން އެމްޑީޕީއަށް ލިބެންޖެހޭ ފައިސާ މި އަހަރު އަދި ލިބިފައެއް ނުވެ އެވެ.
"މި އަހަރު ސަރުކާރުން ލިބެން ޖެހޭ އެއްވެސް ފައިސާއެއް ޕާޓީއަށް ލިބިފައި ނުވާތީ ޕާޓީ ހިންގުމަށާއި އިންތިހާބު ބާއްވާނެ އެއްވެސް ފައިސާއެއް ޕާޓީއަކު ނެތް،" ޣަފޫރުގެ މެސެޖުގައި ބަޔާންކޮށްފައިވެ އެވެ.
އިންތިހާބު ފަސްކުރުމުގެ އިތުރުން، ޕާޓީގެ ހިންގުން ހަރުދަނާކުރުމަށްޓަކައި އިސް ފަރާތްތަކުން މަޝްވަރާކޮށްގެން 'އިންޓަރީމް އެރޭންޖްމަންޓެއް' ނުވަތަ ވަގުތީ އިންތިޒާމެއްގެ ދަށުން ކުރިއަށް ދިއުމަށް ވެސް އޭނާ ހުށަހެޅުއްވި އެވެ. އަދި އެ އިންތިޒާމުގެ ތެރޭގައި އޭނާ ނުހިމެނުމަށް ވެސް ވަނީ އެދިވަޑައިގެންފަ އެވެ.
މި ހުށަހެޅުން ގައުމީ މަޖިލީހަށް ހުށަހަޅައިގެން ފާސްކުރުމަށް ޣަފޫރު އެދިވަޑައިގެންފައި މިވަނީ، ޗެއާޕާސަން ކަމުގެ މަގާމަށް ކުރީގެ ރައީސް މުހައްމަދު ނަޝީދާއި ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް ވަރަށް ފޯރިއާއެކު ކެމްޕެއިން ކުރައްވަމުން ގެންދަވާ ދަނޑިވަޅެއްގަ އެވެ.
މި އިންތިހާބުގައި ޕާޓީގެ ތެރޭގައި ވަނީ ބޮޑެތި ފެކްޝަންތަކެއް އުފެދިފަ އެވެ. މީކާއިލް އަހުމަދު ނަސީމަށް ކުރީގެ ރައީސް އިބްރާހިމް މުހައްމަދު ސޯލިހާއި، ޕާޓީގެ ރައީސް އަބްދުﷲ ޝާހިދުގެ އިތުރުން ކުރީގެ ނައިބު ރައީސް ފައިސަލް ނަސީމްގެ ފެކްޝަނުން ތާއީދުކުރާކަން ވަނީ އެނގިފަ އެވެ. އަނެއްކޮޅުން، ރައީސް ނަޝީދުގެ ފަޅީގައި ތިއްބެވީ "ދަ ޑިމޮކްރެޓްސް" އުފެއްދުމުގައި އުޅުއްވި ބޭފުޅުންނާއި، ކުރީގެ ބައެއް ވަޒީރުންނެވެ. އޭގެ ތެރޭގައި ކުރީގެ ޑިފެންސް މިނިސްޓަރު މާރިޔާ އަހުމަދު ދީދީ ހިމެނިވަޑައިގަންނަވަ އެވެ.
އިންތިހާބު ފަސްކުރުމުގެ މައްސަލައިގައި ޕާޓީގެ ތެރޭގައި ބަހުގެ ހަމަލާތައް ބަދަލުކުރެވެމުންދާއިރު، މިއީ އިންތިހާބު ފަސްކުރަން ހުށަހެޅުނު ދެވަނަ ފަހަރެވެ. މީގެ ކުރިން ޑިސެމްބަރު މަހު ވެސް ވަނީ ލޯކަލް ކައުންސިލް އިންތިހާބަށްޓަކައި މި އިންތިހާބު ފަސްކޮށްފަ އެވެ.
ވަޒީރުންނަށް ރުހުން ދިނުމަށް އިއްޔެ ބޭއްވި ރައްޔިތުންގެ މަޖިލީހުގެ ޖަލްސާގައި، އެމްޑީޕީގެ މެންބަރުން ވަޒީރުންނަށް ރުހުން ދެއްވުމާ ގުޅިގެން ރައީސް ނަޝީދުގެ ފެކްޝަނުން ދަނީ އެކަމަށް ވަރަށް ބޮޑަށް ފާޑުކިޔަމުންނެވެ. މަޖިލީހުގައި އެމްޑީޕީ ތަމްސީލުކުރައްވާ މެންބަރުންނަކީ ޗެއާޕާސަން ހޮވުމަށް ބޭއްވި އިންތިޚާބުގައި މީކާއީލް ނަސީމަށް ތާއީދުކުރައްވައި، އޭނާގެ ފަހަތްޕުޅުގައި ތިއްބެވި ބޭފުޅުންނެވެ.
