މާލެ ސަރަހައްދަށް ރޭ ކުރި ވިއްސާރައިގައި ގުގުރައި ހޮނު އެޅުމުގެ ސަބަބުން، ބައެއް ގޭގޭގެ ކަރަންޓު ކެނޑި ކަރަންޓު އަލުން ނުލިބިއްޖެ ނަމަ އެކަން އެ ކުންފުންޏަށް އެންގުމަށް ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން އިލްތިމާސްކޮށްފި އެވެ.
ރޭ 11:00 އެހާއިރުން ފެށިގެން ހުޅުމާލެ އަށް ވަނީ ބާރުގަދަ އަޑުފަށާއެކު ގުގުރައި، ވިދާފަ އެވެ. މި ވިއްސާރައިގެ ތެރެއިން ހުޅުމާލޭގެ އެކި ސަރަހައްދުތަކަށް ހޮނު އަޅާފައިވެ އެވެ.
ސްޓެލްކޯއިން ބުނީ، ގުގުރައި ހޮނު އެޅުމުގެ ސަބަބުން ބައެއް ގޭގޭގެ އީ.އެލް.ސީ.ބީ (ELCB) ޓްރިޕްވެ، ކަރަންޓު ކެނޑެމުންދާކަން ފާހަގަކުރެވިފައިވާ ކަމަށެވެ. އެހެންކަމުން، މިފަދަ ހާލަތެއް މެދުވެރިވެ ކަރަންޓު ހިނގައްޖެނަމަ، ގޭ ތެރޭގެ ނުވަތަ އެޕާޓްމަންޓުގެ ޑީ-ބޯޑު (D-Board) ޗެކްކުރެއްވުމަށް އެ ކުންފުނިން އެދެ އެވެ. އަދި އީ.އެލް.ސީ.ބީ ވެއްޓިފައިވާނަމަ، އެ އަލުން ނަންގަވައި ކަރަންޓު ދިނުމަށް މަސައްކަތް ކުރެއްވުމަށް ސްޓެލްކޯއިން ވަނީ އިރުޝާދު ދީފަ އެވެ.
ނަމަވެސް، އީ.އެލް.ސީ.ބީ ރިސެޓްކުރުމަށް ފަހު ނަގާ ވަގުތު އަލުން ވެއްޓޭނަމަ، ނުވަތަ ކަރަންޓު ނުލިބޭނަމަ އެ ކުންފުނީގެ ހޮޓްލައިން ނަންބަރު 1545 އަށް ގުޅުއްވައި ރިޕޯޓް ކުރެއްވުމަށް ސްޓެލްކޯއިން ވަނީ އެދިފަ އެވެ.
މިރޭ ކުރަމުންދާ ވިއްސާރައިގައި މާލެ ސަރަހައްދުގެ އުޑުމަތިން ގިނަ އަދަދަކަށް ވިދައި، ބާރުގަދަ އަޑުފަށާއެކު ގުގުރަމުންދާތީ، އާންމުން ސަލާމަތީ ފިޔަވަޅުތަކަށް ސަމާލުވުމަކީ މުހިންމު ކަމެކެވެ.
