ހުޅުމާލޭ ދެވަނަ ފިޔަވަހީގައި މަގުކޮނުމުގެ މަސައްކަތް ކުރަމުން ދަނިކޮށް، ކަރަންޓު ފޯރުކޮށްދިނުމަށް އަޅާފައިވާ މައި ކޭބަލަކަށް ގެއްލުންވެ، އެ ސަރަހައްދުގެ ގިނަ ޓަވަރުތަކަކުން މިއަދު އަނެއްކާވެސް ކަރަންޓުގެ ހިދުމަތް މެދުކެނޑިއްޖެ އެވެ.

މިއީ މިފަދަ ހާދިސާއެއް ހިނގައިގެން ހުޅުމާލެ ދެވަނަ ފިޔަވަހިން ކަރަންޓު ކެނޑުނު ދެވަނަ ފަހަރެވެ. މީގެ ހަފްތާއެއް ކުރިން، މި މަހުގެ ކުރީކޮޅުވެސް ބަޔަކު އިމާރާތް ކުރުމުގެ މަސައްކަތް ކުރަމުން ދަނިކޮށް މައި ކޭބަލަކަށް ގެއްލުންވެ، ދެވަނަ ފިޔަވަހީގެ ގިނަ ޓަވަރުތަކަކުން ކަރަންޓު ކެނޑިފައިވެ އެވެ. އެ ހާދިސާއާ ގުޅިގެން ސްޓެލްކޯއިން ވަނީ މަގު ކޮނުމާއި އިމާރާތް ކުރުމުގެ މަސައްކަތް ކުރާއިރު، ބިމު އަޑިން އަޅާފައިވާ ކަރަންޓު ކޭބަލްތަކަށް ހާއްސަ ސަމާލުކަމެއް ދިނުމަށް އިލްތިމާސްކޮށްފަ އެވެ.

ސްޓެލްކޯއިން ބުނެފައިވަނީ މިފަދަ ހާދިސާތަކުގެ ސަބަބުން ކުންފުންޏަށާއި އާންމު ރައްޔިތުންނަށް ނުހަނު ބޮޑެތި ދަތިތަކާއި ގެއްލުންތަކާ ކުރިމަތިލާންޖެހޭ ކަމަށެވެ. ނަމަވެސް، އެ ކުންފުނީގެ އިލްތިމާސްތަކަށް ބެލުމެއް ނެތި ކުރަމުންދާ މަސައްކަތްތަކުގެ ސަބަބުން މިއަދުވެސް މިވަނީ ހަމަ އެފަދަ ހާދިސާއެއް ތަކުރާރުވެފަ އެވެ.

މި މައްސަލަ މިހާ ބޮޑަށް ދިމާވާން މެދުވެރިވި އަސްލު ސަބަބެއްގެ ގޮތުގައި ފާހަގަކުރެވެނީ، ނިމިދިޔަ ސަރުކާރުން ރިޔާސީ އިންތިހާބާ ދިމާކޮށް ވޯޓު ހޯދުމުގެ ބޭނުމުގައި، ހުޅުމާލޭ ދެވަނަ ފިޔަވަހިން އެއްވެސް ޕްލޭނެއް ނެތި ބޭނުންހާ ގޮތަކަށް ގޯތި ދޫކޮށްފައިވުމެވެ. ގޯތިތައް ދޫކުރިއިރު، ބިމުގެ އަޑިން އަޅާފައިވާ ކަރަންޓު ކޭބަލްތަކާއި، ފެނާއި ނަރުދަމާގެ ނެޓްވޯކްތައް ވަޅުލާފައިވާ ގޮތަކަށް އޭރުގެ ސަރުކާރުން އެއްވެސް ވަރަކަށް ވިސްނާފައެއް ނުވެ އެވެ.

މިގޮތަށް ޖެހުނުތަނަކުން ގޯތި ދޫކުރުމުގެ ނަތީޖާއެއްގެ ގޮތުން، އެ ބިންތަކުގައި މަސައްކަތް ކުރަން ފެށުމާއެކު އަސާސީ ހިދުމަތްތަކަށް ބޭނުންކުރާ ކޭބަލްތަކަށް ދަނީ ގެއްލުންވަމުންނެވެ. މިއީ ހަމައެކަނި ކަރަންޓަށް ދިމާވާނެ މައްސަލައެއް ނޫން ކަމަށާއި، ކުރިއަށް އޮތް ތަނުގައި ފެނާއި ނަރުދަމާގެ ނިޒާމަށްވެސް މިފަދަ ގެއްލުންތައް ލިބި، އާންމު ރައްޔިތުންނަށް އޭގެ ތަކުލީފު އުފުލަންޖެހޭނެ ކަމަށް ބެލެވެ އެވެ.