ދުނިޔޭގެ އެންމެ މުހިންމު އެއް ކަނޑުގެ މަގު ކަމަށްވާ ހުރްމުޒް ކަނޑުއޮޅިން ދަތުރުކުރާ ބޯޓުފަހަރުން ފީ ނަގަން ފަށައި، އެކަމުން ލިބުނު ފުރަތަމަ އާމްދަނީ އެގައުމުގެ ދައުލަތަށް ލިބިފައިވާ ކަމަށް އީރާނުން އިޢުލާން ކޮށްފިއެވެ.

މިކަން ހާމަކޮށް އީރާނުގެ ކަމާބެހޭ އިދާރާތަކުން ބުނީ، މިއީ އެ ސަރަޙައްދުގެ ރައްކާތެރިކަން ދެމެހެއްޓުމަށާއި، ކަނޑުގެ ތިމާވެށި ހިމާޔަތްކުރުމަށް އީރާނުން ކުރަމުންދާ މަސައްކަތްތަކަށް ބޭނުންވާ ޚަރަދު ހޯދުމުގެ ގޮތުން ނަގަން ފެށި ފީއެއް ކަމަށެވެ. މި ފީ ނަގަން ފަށާފައި ވަނީ އީރާނުގެ ސަރަޙައްދީ އިމުގެ ތެރެއިން ދަތުރުކުރާ އުޅަނދުފަހަރުންނެވެ.

ހުރްމުޒް ކަނޑުއޮޅި ހުރަސް ކުރާ ނަމަ އީރާނަށް ދެމިލިއަން ޑޮލަރު ދޭން ޖެހެއެވެ.

ހުރްމުޒް ކަނޑުއޮޅި އަކީ ދުނިޔޭގައި އުފައްދާ ތެލުގެ ބޮޑު ބައެއް ބޭރުކުރާ މައި މަގަށް ވާއިރު، މި ނިންމުމާ އެކު ބައިނަލްއަގުވާމީ މައިދާނުގައި ބޮޑެތި ބަހުސްތަކެއް ވަނީ އުފެދިފައެވެ. ވަކިން ޚާއްޞަކޮށް، މެދުއިރުމަތީގެ ހަމަޖެހުން ނަގާލުމަށް މަސައްކަތްކުރާ އިޒްރޭލާއި ހުޅަނގުގެ ބައެއް ބާރުތަކުން ވަނީ އީރާނުގެ މި ނިންމުމަށް ފާޑު ކިޔައި، މިއީ ބައިނަލްއަގުވާމީ ކަނޑުގެ ދަތުރުފަތުރުގެ ގަވާއިދުތަކާ ޚިލާފު ކަމެއް ކަމަށް ބުނެފައެވެ.

ނަމަވެސް އީރާނުން ބުނަމުން ދަނީ އެގައުމުގެ ސަރަޙައްދީ އިމުގެ ތެރެއިން ދަތުރުކުރާ އުޅަނދުފަހަރުން ފީ ނެގުމަކީ ބައިނަލްއަގުވާމީ ގާނޫނުތަކުގެ ދަށުން އެގައުމަށް ލިބިގެންވާ އިޚްތިޔާރީ ހައްގެއް ކަމަށެވެ. އަދި މިކަމުގެ ސަބަބުން ކަނޑުއޮޅީގެ ސަލާމަތީ ކަންކަން އިތުރަށް ވަރުގަދަވެގެން ދާނެ ކަމަށް ވެސް އެގައުމުން ފާހަގަކު ރެއެވެ.

މި ނިންމުމުގެ ސަބަބުން ކުރިއަށް އޮތް ތަނުގައި ދުނިޔޭގެ ބާޒާރުގައި ތެލުގެ އަގަށް ބަދަލުތަކެއް އަތުވެދާނެ ކަމަށް އިގްތިސާދީ މާހިރުން ލަފާކުރެއެވެ. އީރާނުން މި ފީ ނަގަން ފަށާފައި ވަނީ އެގައުމާ ދެކޮޅަށް ހުޅަނގުން އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން އިގްތިސާދަށް ކުރާ އަސަރު ކުޑަކުރުމަށް ކުރާ މަސައްކަތްތަކުގެ ތެރެއިންނެވެ.