ސްޕެއިންގެ ބާސެލޯނާގައި މިހާރު ކުރިއަށްދާ ދުނިޔޭގެ އެންމެ ބޮޑު ސީފުޑް އެކްސްޕޯ ކަމަށްވާ "ސީފުޑް އެކްސްޕޯ ގްލޯބަލް" ގައި ރާއްޖޭގެ ކަނޑުމަހުގެ މަސްވެރިކަމާއި، މަހުގެ އުފެއްދުންތައް ބައިނަލްއަގުވާމީ ބާޒާރަށް އިޝްތިހާރުކޮށްފިއެވެ.
މި މަހުގެ 23 އިން 25 އަށް ކުރިއަށްދާ މި ފެއަރގައި ރާއްޖޭގެ ފަރާތުން ބައިވެރިވަނީ މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އާއި މަސްވެރިކަމުގެ ދާއިރާގައި ހަރަކާތްތެރިވާ ރާއްޖޭގެ އަމިއްލަ ކުންފުނިތަކުންނެވެ. މި އެކްސްޕޯގައި ރާއްޖޭގެ ފަރާތުން އެންމެ ބޮޑު އިސްކަމެއް ދީފައިވަނީ ރާއްޖޭގެ ތިމާވެއްޓާ ރައްޓެހި، ދެމެހެއްޓެނިވި ދޮށީގެ މަސްވެރިކަން ދުނިޔޭގެ ބޮޑެތި ގަނޑުކުރާ ފަރާތްތަކަށް ތައާރަފްކޮށް، ދިވެހި މަހުގެ އުފެއްދުންތަކަށް އޮތް ޑިމާންޑް އިތުރުކުރުމަށެވެ.
Advertisement
ބާސެލޯނާގައި ކުރިޔަށްދާ މި ފެއަރއަކީ ދުނިޔޭގެ ކަނޑުމަހުގެ ބާޒާރުގައި ހަރަކާތްތެރިވާ އެންމެ ބޮޑެތި ކުންފުނިތަކާއި ވިޔަފާރިވެރިން ބައްދަލުވާ އެންމެ ބޮޑު އެއް މަންސައެވެ. ރާއްޖޭގެ މަސްވެރިކަން މިފަދަ ބައިނަލްއަގުވާމީ މައިދާނެއްގައި ޕްރޮމޯޓްކުރުމުގެ މައިގަނޑު މަގުސަދަކީ ދިވެހި މަސްވެރިން ބާނާ މަހަށް ބައިނަލްއަގުވާމީ ބާޒާރުގައި ރަނގަޅު އަގު ހޯދައިދިނުމާއި، ވިލާތުގެ ބާޒާރުތަކުގައި ރާއްޖޭގެ މަހުގެ ހިއްސާ އިތުރުކުރުމެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން އަންނަނީ ރާއްޖޭގެ މަސްވެރިކަމުގެ ސިނާއަތް ކުރިއެރުވުމަށާއި، ބައިނަލްއަގުވާމީ ބާޒާރުގައި ދިވެހި މަހަށް ލިބޭ އާމްދަނީ އިތުރުކުރުމަށް ގިނަ މަސައްކަތްތަކެއް ކުރަމުންނެވެ. މިގޮތުން، މިފަދަ ފެއަރތަކުގައި ބައިވެރިވުމަކީ ދިވެހި މަސްވެރިކަމުގެ ދާއިރާއަށް އާ ފުރުސަތުތަކެއް ހުޅުވި، ރާއްޖޭގެ އިގްތިސާދަށް އޭގެ ފައިދާ ކުރާނެ ކަމެއް ކަމަށް ސަރުކާރުން ގަބޫލުކުރެއެވެ.
މި އެކްސްޕޯގެ ތެރެއިން ރާއްޖޭގެ ވަފުދުން ދަނީ ދުނިޔޭގެ އެކި ގައުމުތަކުގެ މަސް ގަންނަ ފަރާތްތަކާ ބައްދަލުކޮށް، ރާއްޖޭގެ މަހުގެ ފެންވަރާއި މަސްވެރިކަން ކުރާ ގޮތުގެ މައުލޫމާތު ހިއްސާކުރަމުންނެވެ. ރާއްޖޭގެ "ވަން-ބައި-ވަން" ނުވަތަ އެކަކު ބާނާ މަހުގެ މަސްވެރިކަމަކީ މުޅި ދުނިޔޭގައިވެސް ނަމޫނާ، ދެމެހެއްޓެނިވި މަސްވެރިކަމެއްގެ ގޮތުގައި ބަލައިގަންނަ މަސްވެރިކަމެކެވެ.
