ޣައްޒާއާއި ލުބުނާނުގައި އިސްރާއީލުން ހިންގަމުންދާ އަނިޔާވެރި އަމަލުތަކުގެ ސަބަބުން އާންމު ރައްޔިތުން އުފުލަމުންދާ ތަދާއި ވޭނަށް ބައިނަލްއަގުވާމީ މުޖުތަމައުން ސަމާލުކަން ދިނުމަށް ފަލަސްތީނުގެ އިލްމުވެރިޔެއް ކަމަށްވާ މުންތަރު އިސްހާގު ގޮވާލައްވައިފިއެވެ. އޭނާ ވިދާޅުވީ ހަނގުރާމައިގެ ސިޔާސީ އަދި އަސްކަރީ ކަންކަމަށް ދުނިޔޭގެ ސަމާލުކަން ހުއްޓިފައިވާއިރު، އެންމެ ބޮޑު ނިކަމެތިކަމެއް ލިބެމުންދާ އާންމު ރައްޔިތުންގެ ހާލަތު ފަސްއަޅާ ފޮރުވިފައިވާތީ އެކަން ހާމަކުރުމެވެ.

މުނީރު އިސްހާގު ފާހަގަކުރެއްވި ގޮތުގައި، ޣައްޒާގެ ބޮޑު ބައެއް ސުންނާފަތިވެ، އެތައް ހާސް ބަޔަކު ޝަހީދުވެފައިވާއިރު، މިހާރު ލުބުނާނަށް ދެމުންދާ ހަމަލާތަކުގެ ސަބަބުން އެ ގައުމުގެ އާންމުންވެސް ވަނީ ބޮޑު ބިރުވެރިކަމެއްގެ ތެރޭގައެވެ. އިސްރާއީލުގެ އަސްކަރިއްޔާއިން ހިންގާ މި ޖަރީމާތަކުގެ ސަބަބުން ކުޑަކުދިންނާއި އަންހެނުން ހިމެނޭހެން އެތައް މިލިއަން ބަޔަކު ގެދޮރު ގެއްލި، އަސާސީ ހިދުމަތްތަކުން މަހުރޫމުވެފައިވާކަން އޭނާ ބަޔާންކުރެއްވިއެވެ.

މީގެ އިތުރުން، އޭނާ ވިދާޅުވީ ދުނިޔޭގެ ބާރުގަދަ ގައުމުތަކުން މި އިންސާނީ ކާރިސާއަށް މާބޮޑު ސަމާލުކަމެއް ނުދޭ ކަމަށާއި، އިންސާނީ ހައްގުތަކުގެ ވާހަކަ ދައްކާއިރު ފަލަސްތީނާއި ލުބުނާނުގެ ރައްޔިތުންގެ ހައްގުތައް އިސްނުކުރެވޭ ކަމީ ހިތާމަހުރި ކަމެއް ކަމަށެވެ. އަދި މިއީ ހަމައެކަނި ތަފާސްހިސާބުތަކެއް ނޫން ކަމަށާއި، މިއީ އިންސާނީ ފުރާނަތަކެއްކަން ދުނިޔެއަށް ހަނދާންކޮށްދޭން ޖެހޭ ކަމަށްވެސް އޭނާ ވިދާޅުވިއެވެ.

އިސްރާއީލުން މެދުއިރުމަތީގައި ފަތުރަމުންދާ ނާމާންކަމާއި އަނިޔާވެރިކަމާ ދެކޮޅަށް، އަދި ނިކަމެތިވަމުންދާ އާންމު ރައްޔިތުންގެ ހައްގުގައި ބައިނަލްއަގުވާމީ ފެންވަރުގައި އަޑުއުފުލަން ޖެހޭ ކަމަށާއި، އެކި ދީންތަކުގެ މީހުން ގުޅިގެން މި އަނިޔާވެރިކަން ހުއްޓުވުމަށް މަސައްކަތް ކުރަންޖެހޭ ކަމަށްވެސް އޭނާގެ ވާހަކައިގައި ފާހަގަކުރެއްވިއެވެ.