ވީނުވީއެއް ނޭނގި ގެއްލުނު ބަންގްލަދޭޝްގެ ރައްޔިތެއް ކަމަށްވާ މުހައްމަދު ލިޓަންގެ މަރުގެ ތުހުމަތުގައި، ގދ. ތިނަދޫ މަނާރު، މުހައްމަދު ނިޒާމްގެ މައްޗަށް ކުށް ސާބިތުވެ އޭނާ އުމުރަށް ޖަލަށް ލުމަށް ކްރިމިނަލް ކޯޓުން މިއަދު ހުކުމްކޮށްފިއެވެ.
މިއީ ރާއްޖޭގައި މީހެއްގެ ހަށިގަނޑު ނުފެންނަނީސް އެ މީހާ މަރާލި ކަމަށް ބުނެ މަރުގެ ދައުވާއެއް ސާބިތުވި ފުރަތަމަ ފަހަރެވެ.
ލިޓަންގެ މަރުގެ މައްސަލައިގައި ނިޒާމްގެ މައްޗަށް ދައުލަތުން ތިން ދައުވާއެއް އުފުލިއެވެ. އެއީ ގަސްތުގައި މީހަކު މެރުމުގެ ދައުވާއާއި، ވައްކަމުގެ ދައުވާގެ އިތުރުން މަސްތުވާތަކެތީގެ މުއާމަލާތު ކުރުމުގެ ކުށުގެ ދައުވާއެވެ. މީގެ ތެރެއިން މަސްތުވާތަކެތީގެ ދައުވާ ސާބިތުވާކަމަށް ކަނޑައަޅައި، 15 އަހަރު ދުވަހުގެ ޖަލު ހުކުމެއް މީގެ ކުރިން އޭނާގެ މައްޗަށް ވަނީ އިއްވާފައެވެ.
މަރުގެ މައްސަލައިގައި ޝަރީއަތުން ނިންމެވީ ނިޒާމްގެ މައްޗަށް ގަސްތުގައި މީހަކު މެރުމުގެ ކުށް ސާބިތުނުވި ނަމަވެސް، "އިންސާނެއްގެ ފުރާނައިގެ މައްޗަށް ފަރުވާލެއް ނެތި ކުރި އަމަލެއްގެ ސަބަބުން މީހަކު މަރުވުމުގެ ކުށް" ސާބިތުވާ ކަމަށެވެ. މި ކުށަށް އޭނާގެ މައްޗަށް 25 އަހަރުގެ ޖަލު ހުކުމެއް އިއްވި އިރު، ވައްކަމުގެ މައްސަލައިގައި ވަނީ އެއް އަހަރުގެ ޖަލު ހުކުމެއް އިއްވާފައެވެ.
މި ހާދިސާ ހިނގާފައިވަނީ 2022 ވަނަ އަހަރުގެ ޑިސެމްބަރު މަހުގެ ތެރޭގައެވެ. ލިޓަންއާއި ނިޒާމް ތެޔޮ ބޯޓެއްގައި ކަނޑުމައްޗަށް ނިކުމެ އުޅެނިކޮށް ޚަބަރެއް ނުވެގެން ހޯދަން ފެށީ އެ އަހަރުގެ ޑިސެމްބަރު 28 ގައެވެ. އެމީހުން ދަތުރުކުރި ބޯޓު ކ. ހުޅުލެ ނެރު ކައިރިން ފެނުނުއިރު، ގެއްލުނު ކަމަށް ބުނި ނިޒާމް މާލެއިން ފެނިގެން ހައްޔަރުކުރީ 2023 ޖެނުއަރީ 3 ގައެވެ.
ދައުލަތުން ތުހުމަތުކުރާ ގޮތުގައި ނިޒާމް ލިޓަން މޫދަށް ވައްޓާލީ އޭނާގެ އަތުގައި ހުރި ފައިސާގެ ބޭނުމުގައެވެ. ލިޓަން ފުރުމުގެ ކުރިން 90,000 އަށް ވުރެ ގިނަ ރުފިޔާ ނިޒާމްގެ އަތަށް ލިބުނުކަން ހެކިންގެ ބަހުން އެނގޭއިރު، އެ ދެމީހުންގެ މެދުގައި ފައިސާގެ މައްސަލައިގައި އަދާވާތްތެރިކަން އޮތްކަން ތަހުގީގު ބަޔާންތަކުން އެނގޭ ކަމަށް ގާޒީ ފާހަގަކުރެއްވިއެވެ.
މައްސަލަ ނިންމަވަމުން ގާޒީ ވިދާޅުވީ، އިސްލާމީ ޝަރީއަތުގައި ބުނާ އެއްވެސް ޝައްކެއް ނެތް މިންގަނޑުން ގަސްތު މަރު ސާބިތުވާވަރުގެ ހެކި ނެތް ނަމަވެސް، ގާނޫނުގައި ބުނާ މިންގަނޑުން ފަރުވާލެއް ނެތް އަމަލެއްގެ ސަބަބުން މީހަކު މަރުވުމުގެ ކުށް ނިޒާމްގެ މައްޗަށް ސާބިތުވާ ކަމަށެވެ.
