ބޭންކް އޮފް މޯލްޑިވްސް (ބީއެމްއެލް) އިން އޭޓީއެމް ނެޓްވޯކް ފުޅާކުރުމާއި ގެދޮރުވެރިކަމުގެ ސިނާއަތަށް ވަނުމަށް ނިންމި ނިންމުންތަކަކީ ސިޔާސީ ނިންމުންތަކެއް ނޫން ކަމަށް އެ ބޭންކުގެ ސީއީއޯ މުހައްމަދު ޝަރީފް ވިދާޅުވެއްޖެއެވެ.

ބޭންކާ ގުޅޭގޮތުން އެކި ފަރާތްތަކުން ދައްކަމުންދާ ވާހަކަތަކާ ގުޅިގެން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ޝަރީފް ވިދާޅުވީ، ބޭންކުގެ ނިންމުންތަކަކީ ބޯޑުގައި މަޝްވަރާކުރެވި، ބޭންކަށް ފައިދާ ލިބޭނެ ކަމަށް އަންދާޒާކޮށް ނިންމާފައިވާ ވިޔަފާރީގެ ނިންމުންތަކެއް ކަމަށެވެ.

"އެއީ ބޭންކްގެ ކުރިމަގަށްޓަކައި ބޭންކުގެ ކުރިއެރުމަށްޓަކައި، ބޭންކްގެ މެނޭޖްމަންޓުންނާއި ބޯޑުން މަޝްވަރާކޮށް ނަގާފައިވާ ބިޒްނަސް ޑިސިޝަންތަކެއް،" ޝަރީފް ވިދާޅުވިއެވެ.

އޭޓީއެމްގެ ހިދުމަތް ފުޅާކުރުމާ ގުޅޭގޮތުން ވާހަކަދައްކަވަމުން ޝަރީފް ވިދާޅުވީ އެ މަސައްކަތް ކުރެވުނީ ސަރުކާރުގެ ވަރަށް ބޮޑު އިންވެސްޓްމަންޓަކާ އެކުގައި ކަމަށެވެ. އެހެންކަމުން އެކަމުގައި ސަރުކާރަށް ކްރެޑިޓް ނެގިދާނެ ނަމަވެސް، ބޭންކުން އެކަން ކުރީ ސަރުކާރުގެ އިންވެސްޓްމަންޓާއެކު ބޭންކަށް ލިބޭނެ ފައިދާއަށް ބެލުމަށްފަހު ކަމަށް އޭނާ ފާހަގަކުރެއްވިއެވެ.

ބޭންކުން މިހާރު ވަނީ "މުޅި ރާއްޖެއަށް ބީއެމްއެލް އޭޓީއެމް" މަޝްރޫއުގެ ދަށުން 20 އަތޮޅުގެ 105 ރަށެއްގައި އޭޓީއެމް ގާއިމުކޮށްފައެވެ. މީގެ އިތުރުން ގެދޮރުވެރިކަމުގެ ދާއިރާއިން ހޯމް ކޮންސްޓްރަކްޝަން ލޯނު ދޫކުރަން ފަށާފައިވާކަން ބޭންކުން ފާހަގަކުރެއެވެ.

ގެދޮރުވެރިކަމުގެ ސިނާއަތުގައި ބޭންކުގެ ދައުރު ފުޅާކުރުމުގެ ގޮތުން އުފެއްދި ސަބްސިޑިއަރީ ކުންފުނި، ބީއެމްއެލް އެފޯޑަބަލް ހޯމް ލީސިން ކޮމްޕެނީ މެދުވެރިކޮށް ޖުމުލަ 3,260 ހައުސިންގ ޔުނިޓް ގާއިމުކުރުމުގެ މަސައްކަތް މިހާރު ކުރިއަށްދާ ކަމަށްވެސް ބޭންކުން ވަނީ ހާމަކޮށްފައެވެ.