މަޖީދީ މަގުގައި ހުންނަ ނަލަހިޔާ ރެސިޑެންސްގެ އެޕާޓްމަންޓަކުން ހަތަރު މިލިއަން ރުފިޔާ ވަގަށް ނެގި މައްސަލައިގެ ތުހުމަތުގައި ފުލުހުން އިތުރު މީހަކު ހައްޔަރުކޮށްފިއެވެ.
މިދިޔަ މަހުގެ 16 ވަނަ ދުވަހު ފުލުހުންނަށް ރިޕޯޓުކޮށްފައިވާ މި މައްސަލައާ ގުޅިގެން އެންމެ ފަހުން ހައްޔަރުކޮށްފައިވަނީ ހދ. ނޮޅިވަރަންފަރު، ޖަޒީލާމަންޒިލް، ޖަޒީލު މުހައްމަދު (47އ) އެވެ.
މި ވައްކަމަކީ މަޝްހޫރު ވިޔަފާރިވެރިޔާ އިބްރާހިމް އަހުމަދު (މަނިކު ސޭޓު) ގެ އެޕާޓްމަންޓުން ކޮށްފައިވާ ވައްކަމެއްކަން ވަނީ އެނގިފައެވެ. މި މައްސަލައިގައި މީގެ ކުރިން ވެސް ހަތަރު މީހަކު ވަނީ ހައްޔަރުކޮށްފައެވެ. އެއީ ރ. މަޑުއްވަރީ އިސްމާއިލް އާސިފާއި، ޅ. ނައިފަރު މުހައްމަދު ނޫރު އަހުމަދާއި، ސ. މީދޫ މުހައްމަދު އަފްރާހްގެ އިތުރުން މ. އޭސިޔާ އަހުމަދު ފާރިސް އެވެ.
މި ވައްކަމުގައި އިސްކޮށް އުޅުނު ކަމަށް ތުހުމަތު ކުރެވެނީ އިސްމާއިލް އާސިފަށެވެ. އޭނާއަކީ މަނިކު ސޭޓުގެ އާއިލީ މީހެއްގެ ދަރިއެއް ކަމަށް މައުލޫމާތު ލިބެއެވެ. ވައްކަން ކޮށްފައިވަނީ މަނިކު ސޭޓު އާއިލާ ގޮވައިގެން އުމްރާއަށް ދިއުމަށްޓަކައި އެޕާޓްމަންޓް އާސިފާ ހަވާލުކޮށްފައި ދިޔަ ވަގުތެއްގައި ކަމަށް ވެއެވެ.
މި މައްސަލައިގައި އިސްކޮށް އުޅުނު އާސިފަކީ މީގެ ކުރިން މީހަކު މަރާލަން އުޅުނު ކަމުގެ ތުހުމަތުގައި 10 އަހަރުގެ ޖަލު ހުކުމެއް އިއްވާފައިވާ މީހެކެވެ. ނަމަވެސް، ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި 2023 ވަނަ އަހަރުގެ ތެރޭގައި އޭނާގެ އަދަބު ލުއިކޮށްދީ ވަނީ މިނިވަންކޮށްފައެވެ.
ފުލުހުން ބުނީ މި ބޮޑު ވައްކަމުގެ މައްސަލަ އިތުރަށް ތަހުގީގު ކުރަމުންދާ ކަމަށެވެ.
