އައްޑޫ ސިޓީ ހިތަދޫ އުތުރު ދާއިރާގެ ރައްޔިތުންގެ މަޖިލީހުގެ މެންބަރުކަމުގެ ގޮނޑި ގެއްލިފައިވާ ކަމަށް ސުޕްރީމް ކޯޓުން ކަނޑައެޅުމާ ގުޅިގެން ބާއްވާ ބައި-އިލެކްޝަންގައި، ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) ގެ ފަރާތުން އަލުން ވާދަކުރައްވާނެކަން މުހައްމަދު ސިނާން އިއުލާން ކުރައްވައިފި އެވެ.

ފޭސްބުކްގައި ކުރެއްވި ޕޯސްޓެއްގައި ސިނާން މިރޭ ވިދާޅުވީ، މާތް ﷲ ގެ ހެޔޮ ރަހްމަތްފުޅާއެކު މި ބައި-އިލެކްޝަނަށް ބާއްވާ ޕީއެންސީގެ ޕްރައިމަރީގައި ވާދަކުރެއްވުމަށް ނިންމާފައިވާ ކަމަށެވެ. އަދި މި އިންތިހާބު ކާމިޔާބު ކުރުމަށްޓަކައި ހިތަދޫ އުތުރު ދާއިރާގެ ޕީއެންސީގެ ހުރިހާ މެންބަރުންގެ ފުރިހަމަ ތާއީދާއި އިހްލާސްތެރި އެއްބާރުލުމަށް އޭނާ ވަނީ އެދިވަޑައިގެންފަ އެވެ.

ސިނާން މި ގޮނޑިއަށް އަލުން ވާދަކުރައްވަން ނިންމަވާފައިވާއިރު، އިދިކޮޅު އެމްޑީޕީގެ ފަރާތުން އެ ދާއިރާއަށް ވާދަކުރުމަށް އަބްދުﷲ ސޯދިގު (ސޯބެ) ވަނީ ޝައުގުވެރިކަން ފާޅުކުރައްވާފައެވެ. ސޯބެގެ މި ނިންމެވުމަށް ކުރީގެ ރައީސް މުހައްމަދު ނަޝީދު ވަނީ މަރުހަބާ ވިދާޅުވެފަ އެވެ.

ސިނާންގެ ގޮނޑި ގެއްލިފައިވާ ކަމަށް ސުޕްރީމް ކޯޓުގެ ފަސް ފަނޑިޔާރުންގެ ބެންޗުން އިއްތިފާގުން ހުކުމް ކުރީ މިދިޔަ އާދިއްތަ ދުވަހު އެވެ. މި މައްސަލަ ކޯޓަށް ހުށަހެޅީ ޣާލިބް ސަލީމް ކިޔާ މީހެކެވެ. ސިނާންގެ ގޮނޑި ގެއްލުނީ މޯލްޑިވްސް އިސްލާމިކް ބޭންކުން ނެގި ލޯނަކަށް 2.5 މިލިއަން ރުފިޔާ ދައްކަން 2024 ވަނަ އަހަރުގެ އޮކްޓޫބަރު މަހު ދަށު ކޯޓުން ކުރި ހުކުމާ އެއްގޮތަށް ފައިސާ ނުދެއްކުމުގެ ސަބަބުންނެވެ.

ސުޕްރީމް ކޯޓުގެ ހުކުމް އިއްވަވަމުން ފަނޑިޔާރު އައިޝާ ޝުޖޫން މުހައްމަދު ވިދާޅުވީ، ހަ މަސް ދުވަހުގެ ތެރޭގައި ކޮންމެ މަހަކު ފައިސާ ދައްކަމުން ދިއުމަށް ދަށު ކޯޓުން ކުރި ހުކުމާ ސިނާން ހިލާފުވެފައިވާ ކަމަށެވެ. ފައިސާ ނުދެއްކުނީ ހުކުމް ކުރިކަން ނޭނގޭތީ ކަމަށް ސިނާން ބުނި ނަމަވެސް، އެކަން އޭނާއަށް ދުރާލާ އެންގިކަން ލިޔެކިޔުންތަކުން ސާބިތުވާ ކަމަށް ކޯޓުން ފާހަގަކުރިއެވެ. އަދި ފަހުން ފައިސާ އެއްކޮށް ދެއްކި ނަމަވެސް، ހުކުމުގައިވާ ގޮތަށް މަހުން މަހަށް ފައިސާ ނުދެއްކުމަކީ ސާބިތު ދަރަންޏެއް އޮތް ކަމަށް ބެލެވޭނެ ހާލަތެއް ކަމަށްވެސް ފަނޑިޔާރު ވިދާޅުވި އެވެ.

މި މައްސަލަ ބެއްލެވި ސުޕްރީމް ކޯޓުގެ ބެންޗުގައި ފަނޑިޔާރު އައިޝާ ޝުޖޫންގެ އިތުރުން ހިމެނިވަޑައިގެންނެވީ ފަނޑިޔާރު އަލީ ރަޝީދު ހުސައިނާއި، ފަނޑިޔާރު ޑރ. މުހައްމަދު އިބްރާހިމާއި، ފަނޑިޔާރު ހުސައިން ޝަހީދު އަދި ފަނޑިޔާރު މުހައްމަދު ސަލީމެވެ. މި ހުކުމާއެކު ހިތަދޫ އުތުރު ދާއިރާގެ ގޮނޑި މިހާރު ވަނީ ހުސްވެފަ އެވެ.