ސަރުކާރުގެ ބައެއް މިނިސްޓްރީތަކުގެ ނަންތަކަށް ބަދަލު ގެނައުމާއެކު، ކެބިނެޓްގެ މުހިންމު މަގާމުތަކަކަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ބޭފުޅުން އައްޔަނުކުރައްވައިފި އެވެ.

މިގޮތުން ގެނެވުނު ބަދަލުތަކުގެ ތެރޭގައި، މިނިސްޓްރީ އޮފް ފިނޭންސްގެ މިނިސްޓަރުކަމަށް މޫސާ ޒަމީރު އަލުން އައްޔަނުކުރައްވާފައިވާއިރު، މިނިސްޓްރީ އޮފް އިންފްރާސްޓްރަކްޗަރ، ހައުސިން އެންޑް އާބަން ޑިވެލޮޕްމަންޓްގެ ވަޒީރުކަމަށް ޑރ. އަބްދުﷲ މުއްތަލިބު ވަނީ އަލުން އައްޔަނުކުރައްވާފަ އެވެ. މި ދެބޭފުޅުން ވެސް އަލުން މިނިސްޓަރު ކަމަށް އައްޔަނުކުރައްވާފައިވާއިރު އެ ދެބޭފުޅުން ނިސްބަތްވާ މިނިސްޓްރީތަކުގެ ނަމަށް ވަނީ ބަދަލުތަކެއް އައިސްފަ އެވެ.

ކުރިން "މިނިސްޓްރީ އޮފް ފިނޭންސް އެންޑް ޕްލޭނިން" ގެ ނަމުގައި ހިންގަމުން އައި މިނިސްޓްރީގެ ނަން މިހާރު ވަނީ "މިނިސްޓްރީ އޮފް ފިނޭންސް އެންޑް ޕަބްލިކް އެންޓަރޕްރައިޒަސް" އަށް ބަދަލުކޮށްފައެވެ. އަދި ކުރިން "މިނިސްޓްރީ އޮފް ހައުސިން، ކޮންސްޓްރަކްޝަން އެންޑް އިންފްރާސްޓްރަކްޗާ" ގެ ނަމުގައި ހިންގި މިނިސްޓްރީގެ ނަން ވަނީ "މިނިސްޓްރީ އޮފް އިންފްރާސްޓްރަކްޗަ، ހައުސިން އެންޑް އާބަން ޑިވެލޮޕްމަންޓް" އަށް ބަދަލުކުރައްވާފަ އެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ސަރުކާރު ހިންގުމުގެ އޮނިގަނޑަށް ބޮޑެތި ބަދަލުތަކެއް ގެންނަވައި، ކުރިން ހިންގަމުން އައި 20 މިނިސްޓްރީގެ ތެރެއިން ބައެއް މިނިސްޓްރީތައް އެއްކޮށްލައްވާފަ އެވެ. މި ބަދަލާއެކު މިނިސްޓްރީތަކުގެ ޖުމްލަ އަދަދު ވަނީ 15 އަށް މަދުކުރައްވާފައެވެ.

ކެބިނެޓަށް މިފަދަ ކުއްލި ބޮޑު ބަދަލެއް ގެންނެވީ، މިއަދުގެ ވަގުތެއްގައި ސަރުކާރުގެ 10 މިނިސްޓަރަކު މަގާމުން އިސްތިއުފާ ދެއްވުމާ ގުޅިގެންނެވެ. ރައީސް އޮފީހުން ހާމަކުރި ގޮތުގައި، މިނިސްޓަރުން އިސްތިއުފާ ދެއްވީ ރައްޔިތުންގެ ވިންދާ އެއްގޮތަށް ސަރުކާރު ހިންގުމަށްޓަކައި ރައީސުލްޖުމްހޫރިއްޔާ ގެންނަވަން ބޭނުންފުޅުވާ ހެޔޮ ބަދަލުތަކަށް ފުރުސަތު ދެއްވުމުގެ ގޮތުންނެވެ.