ޓޫރިޒަމް މިނިސްޓަރުގެ މަގާމުގައި ހުންނެވި ތޯރިގް އިބްރާހިމް އެ މަގާމުން އިސްތިއުފާ ދެއްވުމާ ގުޅިގެން، އެ މަގާމަށް މުހައްމަދު އަމީން މިއަދު އައްޔަނުކުރައްވައިފި އެވެ.
މުހައްމަދު އަމީން މީގެ ކުރިން ހުންނެވީ ޓްރާންސްޕޯޓް މިނިސްޓަރުގެ މަގާމުގައެވެ. އަމީން މި މަގާމަށް އައްޔަނުކުރެއްވިއިރު، ސަރުކާރުން ވަނީ މިނިސްޓްރީގެ އޮނިގަނޑަށް ބަދަލުތަކެއް ގެނެސް، ޓޫރިޒަމް މިނިސްޓްރީގެ ނަން "މިނިސްޓްރީ އޮފް ޓޫރިޒަމް އެންޑް ސިވިލް އޭވިއޭޝަން" ގެ ނަމަށް ބަދަލުކޮށްފައެވެ. މީގެ ކުރިން ސިވިލް އޭވިއޭޝަންގެ ކަންކަން ބަލަހައްޓަމުން އައީ ޓްރާންސްޕޯޓް މިނިސްޓްރީގެ ދަށުންނެވެ.
ސަރުކާރުގެ ކެބިނެޓަށް މިއަދު ބޮޑެތި ބަދަލުތަކެއް އައިސްފައިވާއިރު، ތޯރިގް އިބްރާހީމް މަގާމުން އިސްތިއުފާ ދެއްވި ސީދާ ސަބަބެއް އަދި ސާފުވެފައި ނުވި ނަމަވެސް، މިއަދު ޖުމްލަ 10 މިނިސްޓަރަކު ވަނީ މަގާމުން އިސްތިއުފާ ދެއްވާފަ އެވެ. ރައީސް އޮފީހުން ހާމަކުރައްވާފައިވާ ގޮތުގައި، މި ބޭފުޅުން އިސްތިއުފާ ދެއްވީ ރައްޔިތުންގެ ވިންދާ އެއްގޮތަށް ސަރުކާރު ހިންގުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގެންނަވަން ބޭނުންފުޅުވާ ހެޔޮ ބަދަލުތަކަށް ފުރުސަތު ދެއްވުމުގެ ގޮތުންނެވެ.
Advertisement
މި ބަދަލުތަކަކީ ސަރުކާރުގެ ހިންގުން ހަރުދަނާކޮށް، ރައްޔިތުންނަށް ދޭންޖެހޭ ހިދުމަތްތައް އަވަސްމަގަކުން ފޯރުކޮށްދިނުމަށް ރައީސް މުއިއްޒު ފައްޓަވާފައިވާ މަސައްކަތްޕުޅުގެ ތެރެއިން އައި ބަދަލުތަކެއް ކަމަށް ބެލެވެއެވެ.
