މާލޭގެ ގެއެއްގެ ތެރޭގައި އަނިޔާވެރި ގޮތަކަށް އަންހެނަކު މަރާލި މައްސަލާގައި ދައުލަތުން ދައުވާކުރި ސާހިލް އަލީގެ މައްޗަށް ބައެއް ދައުވާތައް ސާބިތުވެ، ތިން އަހަރަށް ޖަލަށްލާން ކްރިމިނަލް ކޯޓުން ހުކުމްކޮށްފިއެވެ.
މިއީ އޮގަސްޓް 2023 ގައި ފުވައްމުލަކަށް ނިސްބަތްވާ ޝިއާއު މަރާލުމަށްފަހު އޭނާގެ ހަށިގަނޑަށް ބޮޑެތި ގެއްލުންތަކެއް ދިން މައްސަލާގައި ކުރި ހުކުމެކެވެ.
ފ. ނިލަންދޫ ފިނިފެންމާގޭ ސާހިލްގެ މައްޗަށް މި މައްސަލާގައި ޖުމްލަ ފަސް ދައުވާއެއް އުފުލާފައިވެއެވެ. ނަމަވެސް، މި މައްސަލައިގެ ބާވަތުންނާއި އާއިލާގެ މަސްލަހަތަށް ރިއާޔަތްކޮށް، ޝަރީއަތް ކުރިއަށް ގެންދަނީ ސިއްރުކޮށްގެން ކަމަށްވާތީ، އޭނާގެ މައްޗަށް ކުރާ ދައުވާތަކުގެ ތަފްސީލު މިހާތަނަށް ހާމަކޮށްފައެއް ނުވެއެވެ.
ކްރިމިނަލް ކޯޓުން ބުނި ގޮތުގައި، ސާހިލްގެ މައްޗަށް އުފުލާފައިވާ ދައުވާތަކުގެ ތެރެއިން ދެ ދައުވާއެއް މިހާރު ވަނީ ސާބިތުވެފައެވެ. އެހެންކަމުން، އެ ދެ ދައުވާގެ އަދަބެއްގެ ގޮތުން އޭނާ ތިން އަހަރާއި އެއް މަހާއި ހަ ދުވަހަށް ޖަލަށްލުމަށް ވަނީ ހުކުމްކޮށްފައެވެ. ބާކީ ތިން ދައުވާގެ ހުކުމް އަދި އިއްވާފައެއް ނުވެއެވެ.
މި މައްސަލައިގެ ބާކީ އޮތް ތިން ދައުވާގެ ހުލާސާ ބަޔާން ހުށަހެޅުމުގެ އަޑުއެހުން މި މަހުގެ ފަހުކޮޅު ބޭއްވުމަށް މިހާރު ވަނީ ތާވަލްކޮށްފައެވެ. އެހެންކަމުން ކުރިއަށް އޮތް ދުވަސްތަކުގައި އެ ދައުވާތަކާ މެދު ވެސް ގޮތެއް ނިންމާނެ ކަމަށް ބެލެވެއެވެ.
މި މައްސަލައިގެ ކުރީގެ އަޑުއެހުންތަކުގައި ފާހަގަވެފައިވާ ގޮތުގައި، ސާހިލަށް ދައުލަތުގެ ހަރަދުގައި ވަކީލަކު ހަމަޖައްސައިދިން ނަމަވެސް، އޭނާ ވަނީ ވަކީލުންނަށް އެއްބާރުލުން ދިނުމަށް އިންކާރުކޮށްފައެވެ. މި ސަބަބާ ހުރެ، އޭނާއަށް އިތުރަށް ދައުލަތުގެ ހަރަދުގައި ވަކީލުން ހަމަޖައްސައި ނުދޭން އެޓާނީ ޖެނެރަލްގެ އޮފީހުން ވަނީ ނިންމާފައެވެ.
