ހުޅުމާލޭގެ ދެވަނަ ފިޔަވަހީގެ ބައެއް ސަރަހައްދުތަކުން ކަރަންޓުގެ ހިދުމަތް މެދުކެނޑެން ދިމާވީ އެ ސަރަހައްދަށް ކަރަންޓު ފޯރުކޮށްދިނުމަށް އަޅާފައިވާ މައި ކޭބަލަކަށް ގެއްލުންވުމުގެ ސަބަބުން ކަމަށް ސްޓެލްކޯއިން ހާމަކޮށްފި އެވެ.
ސްޓެލްކޯއިން މައުލޫމާތު ދޭ ގޮތުގައި، ދެވަނަ ފިޔަވައްސަށް ކަރަންޓު ފޯރުކޮށްދިނުމަށް އަޅާފައިވާ މައި ހަތަރު ކޭބަލްގެ ތެރެއިން އެއް ކޭބަލަށް ގެއްލުން ލިބިފައިވަނީ ކޮނުމުގެ މަސައްކަތެއްގެ ތެރެއިންނެވެ. މި ހާދިސާއާ ގުޅިގެން، މިވަގުތު ދެވަނަ ފިޔަވަހީގެ ކަރަންޓު ވިއުގައާއި ލޯޑު ހުރިގޮތުން، ބާކީ ހުރި ތިން ކޭބަލް މެދުވެރިކޮށް މުޅި ދެވަނަ ފިޔަވައްސަށް ފުރިހަމައަށް ކަރަންޓު ފޯރުކޮށްދިނުމުގައި ވަނީ ދަތިތަކެއް ކުރިމަތިވެފަ އެވެ.
ހުޅުމާލޭގެ ދެވަނަ ފިޔަވަހީގެ ހިޔާ ޓަވަރުތަކާއި، ސަރުކާރު ކުންފުނިތަކުން ބިނާކޮށްފައިވާ ޓަވަރުތަކުން މިއަދު މެންދުރުފަހުން ފެށިގެން ވަނީ ކަރަންޓުގެ ހިދުމަތް މެދުކެނޑިފަ އެވެ. މީގެ އިތުރުން، މިރޭގެ ވަގުތެއްގައި އަމަން ދޯދި އަދި އަމަން އުދަރެސް ފުލެޓުތަކުން ވެސް ކަރަންޓު ކެނޑުނެވެ.
ސްޓެލްކޯއިން ބުނީ މި މައްސަލަ ހައްލުކުރުމަށްޓަކައި އެ ކުންފުނީގެ ޓެކްނިކަލް ޓީމުން މިހާރު ހުއްޓުމެއްނެތި މަސައްކަތް ކުރަމުންދާ ކަމަށެވެ. އެގޮތުން، ހިދުމަތް މެދުކެނޑިފައިވާ ހުރިހާ ސަރަހައްދަކަށް އަލުން ކަރަންޓު ދިނުމަށްޓަކައި، ގެއްލުންވި ކޭބަލްގެ ލޯޑު ބާކީ ހުރި ތިން ކޭބަލަށް ބަހާލުމުގެ މަސައްކަތް މިހާރު ކުރިއަށްދާ ކަމަށް އެ ކުންފުނިން ބުންޏެވެ.
މި މައްސަލަ ވީއެންމެ އަވަހަކަށް ހައްލުކޮށް، ރައްޔިތުންނަށް ދިމާވެފައިވާ ދަތިތަކަށް ނިމުމެއް ގެނައުމަށް ސްޓެލްކޯގެ މުވައްޒަފުން ދަނީ މަސައްކަތް ކުރަމުންނެވެ.
