އިންޑިއާގެ އެންމެ މަޝްހޫރު އެއް ޕްލޭބެކް ލަވަކިޔުންތެރިޔާ އަދި ބޮލީވުޑްގެ ލެޖެންޑް އާޝާ ބޯސްލޭ މަރުވެއްޖެ އެވެ.

އިންޑިއާގެ ނޫސްތަކުން ރިޕޯޓުކޮށްފައިވާގޮތުގައި އުމުރުން 92 އަހަރުގެ އާޝާ މަރުވީ ހާޓް އެޓޭކެއް ޖެހިގެން ހޮސްޕިޓަލުގައި ފަރުވާދެމުން ދަނިކޮށް މިއަދުގެ ވަގުތެއްގަ އެވެ. 

އިންޑިއާގެ ޕްލޭބެކް ސިންގިންގްގެ ރަނިކަން ކުރި އާޝާގެ ފަންނީ ހަޔާތުގައި 12،000 އަށްވުރެ ގިނަ ލަވަ ވަނީ ކިޔައިދީފައެވެ. އާޝާގެ ތަފާތު އަޑުން އެތައް ފިލްމީ ލަވަތަކަކަށް ދިރުން ގެނެސްދީފައިވާއިރު، އޭނާގެ ލަވަތަކަކީ ދިވެހިންގެ މެދުގައިވެސް ނުހަނު މަގުބޫލު ލަވަތަކެކެވެ.

އުމުރުން އެންމެ 10 އަހަރުން ފެށިގެން ލަވަކިޔަން ފެށި އާޝާގެ މަގުބޫލުކަން ހޯދީ އޭނާގެ އަޑުގެ ތަފާތު ކަމާއި ރޭންޖުގެ ސަބަބުންނެވެ. ބަޖަންތަކާއި ގަޒަލްތަކުން ފެށިގެން ބޮލީވުޑްގެ މަޝްހޫރު ލަވަތަކާއި ކްލެސިކަލް ރާގުތަކަށް ބަލާއިރު، ބޯސްލޭއަކީ އިންޑިއާގައި އެންމެ ގިނަ ލަވަ ރެކޯޑްކޮށްފައިވާ ލަވަކިޔުންތެރިންގެ ތެރޭގައި ހިމެނޭ ފަންނާނެކެވެ. މިކަން ބަލައިގަނެ، 2011 ވަނަ އަހަރު ގިނިސް ބުކް އޮފް ވޯލްޑް ރެކޯޑްސްއިން ވަނީ "އެންމެ ގިނަ ސްޓޫޑިއޯ ރެކޯޑިންގްސް - ސިންގަލްސް" ހެދި ކަމުގެ ރެކޯޑް ބޯސްލޭއަށް ދީފައެވެ.

ބޮލީވުޑްގައި އޭނާގެ ނުފޫޒުގަދަ މަގާމުގެ ސަބަބުން 1997 ވަނަ އަހަރު ކޯނާޝޮޕްގެ މަޝްހޫރު ލަވަ "ބްރިމްފުލް އޮފް އާޝާ" އޭނާއަށް ހަދިޔާކުރެވުނެވެ. މީގެ އިތުރުން އިނގިރޭސި މިއުޒީޝަން ބޯއި ޖޯޖާއެކު ކުރި މަސައްކަތުން ބައިނަލްއަގުވާމީ ފެންވަރުގައި ވެސް އޭނާ ބޮޑު މަގުބޫލުކަމެއް ހޯދިއެވެ. އޭނާގެ އަޑުގައި ހުރި ޖޯޝެއްގެ ސަބަބުން އެތައް ޖީލެއްގެ ސަޕޯޓަރުންގެ ލޯބި އޭނާ ވަނީ ހޯދާފައެވެ.

އާޝާ ބޯސްލޭ މަރުވި ހަބަރާއެކު ސޯޝަލް މީޑިއާގައި ގިނަ ބަޔަކު ދަނީ އޭނާގެ ހަނދާންތައް އާކޮށް، އާއިލާއަށް ތައުޒިޔާ ކިޔަމުންނެވެ.

އާޝާގެ މަރާ ގުޅިގެން އިންޑިއާގެ ބޮޑުވަޒީރު ނަރެންދުރަ މޯދީވެސް ވަނީ ތައުޒިޔާ ވިދާޅުވެފައެވެ. މޯދީ އެކްސްގައި ހިއްސާކުރެއްވި މެސެޖެއްގައި ވިދާޅުވީ އާޝާއަކީ އިންޑިއާ ދުށް އެންމެ ނަމޫނާ އަދި އެންމެ ހުނަރުވެރި އެއް އަޑު ކަމަށާއި އޭނާގެ އާދަޔާހިލާފު މިއުޒިކުގެ ސަބަބުން އިންޑިއާގެ ސަގާފީ ތަރިކަ މުއްސަނދިވެ، ދުނިޔޭގެ އެކި ކަންކޮޅުތަކުގައިވާ އެތައް މިލިއަން ހިތްތަކަކަށް އަސަރުކޮށްފައިވާ ކަމަށެވެ.

އާޝާގެ ވަކިވެދިޔުމަކީ އިންޑިއާގެ ސަގާފީ އަދި ފަންނީ ދާއިރާއަށް ލިބުނު ބޮޑު އުނިކަމެކެވެ.