މި މަހުގެ 4 ވަނަ ދުވަހު ބޭއްވި ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބުގައި، އެއްވަރުވުމުގެ ސަބަބުން ދެވަނަ ބުރަކަށް ދާންޖެހުނު ދާއިރާތަކުގެ ވޯޓުލުން އަންނަ ހޮނިހިރު ދުވަހު ބޭއްވުމަށް އިލެކްޝަންސް ކޮމިޝަނުން ނިންމައިފިއެވެ.
އިންތިހާބުގެ ދާއިމީ ނަތީޖާ އިއުލާންކުރުމުގެ ކުރިން ދެއްވި ހާއްސަ މެސެޖެއްގައި އިލެކްޝަންސް ކޮމިޝަންގެ ރައީސް މުހައްމަދު ޒާހިދު ވިދާޅުވީ، ދެވަނަ ބުރުގެ ވޯޓުލުން އޮންނާނީ އޭޕްރީލް މަހުގެ 18 ވާ ހޮނިހިރު ދުވަހު ކަމަށެވެ.
"މި އިންތިޚާބުގެ ދެވަނަ ބުރަށް ދާ ދާއިރާތަކުގެ އިންތިޚާބު 2026 އޭޕްރީލް، އާދެ މި މަހުގެ 18 ވާ ހޮނިހިރު ދުވަހު ބޭއްވިގެންދާނެ. މިކަމަށްޓަކައި ވާންޖެހޭ ތައްޔާރީތައް ކުރުމުގެ މަސައްކަތް މިހާރު އަޅުގަނޑުމެން ފަށައިފީމު،" ޒާހިދު ވިދާޅުވިއެވެ.
Advertisement
އެ އިންތިހާބުގެ ވަގުތީ ނަތީޖާ އިއުލާންކޮށް މިހާރު ވަނީ ނިމިފަ އެވެ. ބައެއް ދާއިރާތަކުގެ ވޯޓު އެއްވަރުވުމުން ދެ ވަނަ ބުރެއް ބާއްވަން ވަނީ ހަމަޖައްސައިފަ އެވެ. ނަމަވެސް، އެ ދާއިރާތަކުގެ ތަފިސީލެއް އަދި ނުލިބެ އެވެ.
މިދިޔަ ހޮނިހިރު ދުވަހު ބޭއްވި އިންތިހާބަކީ ކައުންސިލް އިންތިހާބެއްގައި މިހާތަނަށް އެންމެ ގިނަ އަދަދަކަށް ރައްޔިތުން ވޯޓުލީ ފަހަރުކަން ފާހަގަކުރައްވަމުން، އިންތިހާބުގެ ހުރިހާ ކަމެއްވެސް ކުރިއަށްދިޔައީ މިނިވަންކަމާއި އިންސާފުވެރިކަމާއެކު ކަމަށް ކޮމިޝަންގެ ރައީސް ވިދާޅުވިއެވެ.
މި އިންތިހާބާ ގުޅިގެން ގައުމީ ކޮމްޕްލަޔަންޓްސް ބިއުރޯއަށް ޖުމްލަ 170 ޝަކުވާ ހުށަހަޅާފައިވާ ކަމަށް އިލެކްޝަންސް ކޮމިޝަނުން ހާމަކުރެއެވެ. މި ޝަކުވާތަކާ ގުޅިގެން ބަލަންޖެހޭ ގާނޫނީ ކަންކަން ބެލުމަށްފަހު، ޝަކުވާ ހުށަހެޅި ފަރާތްތަކަށް ޖަވާބު ދިނުމުގެ މަސައްކަތް މިހާރު ކުރިއަށްދާ ކަމަށްވެސް ޒާހިދު ވިދާޅުވިއެވެ.
ކޮމިޝަނުން ދޭ ޖަވާބާމެދު ހިތްހަމަނުޖެހޭ ފަރާތްތަކަށް އެ މައްސަލައެއް ހައިކޯޓަށް ހުށަހެޅުމުގެ ފުރުސަތު އޮންނާނެއެވެ. މި ފުރުސަތު މިއަދުން ފެށިގެން 14 ދުވަހުގެ މުއްދަތަކަށް ހުޅުވާލެވިފައިވާ ކަމަށް އިލެކްޝަންސް ކޮމިޝަނުން މައުލޫމާތު ދެއެވެ.
