ފ. ފީއަލީ ޖެޓީގައި އޮތް ތެޔޮ ބޯޓެއްގައި މިއަދު ހެނދުނު ރޯވި ބޮޑު އަލިފާންގަނޑު، އެމްއެންޑީއެފް ފަޔަ އެންޑް ރެސްކިއު ޓީމުން އެއްކޮށް ނިއްވާލައިފި އެވެ.

މި ހާދިސާގެ ރިޕޯޓް އެމްއެންޑީއެފް ސެންޓްރަލް އޭރިއާ ކޮމާންޑް، ނިލަންދޫ ފަޔަ ސްޓޭޝަނަށް ލިބިފައިވަނީ މިއަދު ހެނދުނު 09:30 ހާއިރުއެވެ. މައުލޫމާތު ލިބޭ ގޮތުގައި މި ބޯޓުގައި އަލިފާން ރޯވާން ފެށީ ހެނދުނު 9 ޖަހާކަން ހާއިރު އެވެ.

މި ހާދިސާ ހިނގުމާއެކު، އަލިފާންގަނޑު ކޮންޓްރޮލް ކުރުމަށްޓަކައި އެމްއެންޑީއެފް ނިލަންދޫ ފަޔަރ ސްޓޭޝަނާއި ކުޑަހުވަދޫ ފަޔަރ ސްޓޭޝަނުގެ ފަޔަރ ފައިޓަރުން ވަނީ އެ ރަށަށް ގޮސް ވަރަށް ބުރަ މަސައްކަތްތަކެއް ކޮށްފައެވެ. ސިފައިންނާއި ރަށުގެ ރައްޔިތުން ގުޅިގެން ކުރި މި މަސައްކަތުން އަލިފާންގަނޑު އެއްކޮށް ނިއްވާލެވުނީ މިއަދު ހެނދުނު 10:35 ހާއިރު ކަމަށް އެމްއެންޑީއެފުން ބުނެއެވެ.

ފީއަލީގައި ޕެޓްރޯލް ޝެޑެއްގެ ގޮތުގައި ބޭނުންކުރާ މި ބޯޓުގައި ރޯވި އަލިފާންގަނޑު ވަރަށް ބޮޑަށް ފެތުރިގެން ދިޔަ އެވެ. މިގޮތުން، އެ ސަރަހައްދުގައި އޮތް އިތުރު ތިން ދޯންޏަކަށާއި، އެ ރަށު އައިސްޕްލާންޓަށް އަލިފާނުގެ އަސަރުކޮށް ބޮޑެތި ގެއްލުންތަކެއް ވަނީ ލިބިފަ އެވެ.

މި ހާދިސާގައި ބޯޓުގައި މަސައްކަތްކުރާ ބަންގްލަދޭޝްގެ މީހަކު ވަރަށް ބޮޑަށް ފިހިގެން، މިހާރު ދަނީ އެ ރަށު ސިއްހީ މަރުކަޒުގައި ފަރުވާ ދެމުންނެވެ.

މި ބޯޓުގައި އަލިފާން ރޯވާން މެދުވެރިވި ސަބަބު އަދި މިހާތަނަށް ދެނެގަނެވިފައެއް ނުވެއެވެ. ކަމާބެހޭ އިދާރާތަކުން ދަނީ މި ހާދިސާ އިތުރަށް ތަހުގީގު ކުރަމުންނެވެ.