ބޮލީވުޑްގެ މަޝްހޫރު އެކްޓަރު އަބީޝެކް ބަޗަން، އޭނާގެ އަންހެނުން އައިޝްވާރިޔާ ރާއީ ބަޗަންއާ އެކު ރެޑް ކާޕެޓްގައި ހިނގުމަކީ ބިރުވެރި ކަމެއް ކަމަށް ބެފި އެވެ.
ލިލީ ސިންގްގެ ޕޮޑްކާސްޓެއްގައި ވާހަކަދައްކަމުން އަބީޝެކް ބުނީ، އައިޝްވާރިޔާއަކީ ރެޑް ކާޕެޓްގައި ވަރަށް ހުނަރުވެރި އަދި ފްރޮފެޝަނަލް މީހެއް ކަމަށެވެ. ނަމަވެސް އޭނާއާ އެކު އެފަދަ ބޮޑެތި އިވެންޓްތަކުގެ ރެޑް ކާޕެޓަށް އެރުމަކީ އޭނާއަށް ވަރަށް "ބިރުވެރި" ކަމެއް ކަމަށް އަބީޝެކް ސިފަކުރި އެވެ.
"އައިޝްވާރިޔާ ރެޑް ކާޕެޓުން ފެނިފައިވޭތަ؟ އޭނާ ރެޑް ކާޕެޓް މަތީގައި ހުއްޓާ ދެކުނިންތަ؟ އަހަރެން އެތަނަށް އެރުމުން ހީވަނީ 'ލަކުޑި ބުރިއެއް' ހެން. އަތް ބާއްވާނެ ގޮތެއް ނޭނގިގެން ވެސް، ވަރަށް އުނދަގޫ އިހުސާސްތަކެއް ކުރެވޭ،" އަބީޝެކް ބުންޏެވެ.
އަބީޝެކް އިތުރަށް ބުނެފައިވަނީ، އޭނާ މިގޮތަށް ހާސްވުމުގެ ސަބަބުން މޫނުމަތިން ފެންނަ ސީރިއަސްކަމުން ފޮޓޯގްރާފަރުންނަށް ވެސް ބައެއް ފަހަރު އޮޅުން އަރާ ކަމަށެވެ. އެގޮތުން އެއް ފަހަރަކު ފޮޓޯގްރާފަރަކު އޭނާ ކައިރީގައި ކުރެވުނީ ކޮން ކުށެއްތޯ އާއި، ކީއްވެތޯ ތިހާ ބޮޑަށް ރުޅި އައިސްފައި ތި ހުންނަނީ އެހި ކަމަށް ވެސް އޭނާ ކިޔައިދިނެވެ. ނަމަވެސް އެއީ ރުޅި އައުން ނޫން ކަމަށާއި، އެއީ އެ ވަގުތު ހާސްވެފައި ހުރުމުން މޫނުމަތިން ފެނުނު އަސަރެއް ކަމަށް އޭނާ ބުންޏެވެ.
އާއިލީ ދިރިއުޅުމާ ބެހޭގޮތުން ވާހަކަދައްކަމުން އަބީޝެކް ބުނީ، ގޭތެރޭގައި ވަކި ކަމެއް ކުރަން ޖެހޭނީ އަންހެނުން ނުވަތަ ފިރިހެނުން ކަމަށް ބުނެ ވަކި ރޯލުތަކެއް ކަނޑައަޅާފައި ނޯންނާނެ ކަމަށެވެ. އަދި އެ ދެމަފިރިން އަބަދުވެސް ބޭނުންވަނީ އަމަލުން ދަރިފުޅަށް ރީތި ނަމޫނާއެއް ދައްކަން ކަމަށް ވެސް އޭނާ ފާހަގަކުރި އެވެ.
ބޮލީވުޑްގެ އެންމެ މަޝްހޫރު އެއް ޖޯޑު ކަމަށްވާ އަބީޝެކް އާއި އައިޝްވާރިޔާ ކައިވެނިކުރީ 2007 ވަނަ އަހަރުގައެވެ. އޭގެ ފަހުން މިހާތަނަށް ވެސް އެ ދެމަފިރިން ފެންނަނީ ވަރަށް ގުޅޭ ދެމަފިރިންގެ ގޮތުގަ އެވެ.
