ބޭންކް އޮފް މޯލްޑިވްސްގެ ބޯޑުން އާއިޝަތު ނޫރައްދީން ވަކިކުރެއްވުމާއި ގުޅިގެން ކުރީގެ އިކޮނޮމިކް މިނިސްޓަރު ފައްޔާޒު އިސްމާއީލް ސަރުކާރަށް ފާޑު ވިދާޅުވުމުން މިހާރުގެ އިކޮނޮމިކް މިނިސްޓަރު މުހައްމަދު ސައީދު ފައްޔާޒަށް ބަހުގެ ހަމަލާއެއް ދީފިއެވެ.
ކުރީގެ އެމްޑީޕީ ސަރުކާރަށް އިކޮނޮމިކް މިނިސްޓަރު މުހައްމަދު ސައީދު ވަނީ ރާއްޖޭގެ އިގްތިސާދު ދަރަނީގެ ފުން ވަޅުގަނޑަކަށް ވައްޓާލާ ކަމަށް ތުހުމަތުކޮށް ހަރުކަށި ފާޑުކިޔާފައެވެ. ބޭންކްތަކުގެ މިނިވަންކަމާ ބެހޭ ގޮތުން ކުރީގެ އިކޮނޮމިކް މިނިސްޓަރު ފައްޔާޒު އިސްމާއިލް ދެއްކެވި ވާހަކަތަކަށް ރައްދު ދެއްވަމުން ސައީދު ވިދާޅުވީ އެމްޑީޕީން ދޫކޮށްލީ ދަރަނީގެ ދަތިކަން ދެއްކުމަށް "100 އަހަރު" ނަގާނެ ކަމަށެވެ.
އިގްތިސާދުގެ ވާހަކަ ދައްކަން ފައްޔާޒު ލަދުގަންނަން ޖެހޭނަ ކަމަށް ބުނެ ސައީދު ކުރެއްވި އެކްސްގައި އިތުރަށް ލިޔެފައި ވެއެވެ. ''100އަހަރާއި ނުބައްދަލު ދަރަނި ނަގައި، އަޑި ނޭނގޭ ފުންމިނަށް އިޤްތިޞާދު ވައްޓައިލި 5 އަހަރުގެ މިނިސްޓަރު މިވާހަކަ ދެއްކުން ލަދުވެތި. މުޅިނިޒާމް އެފުށް މިފުށަށް ޖަހައި، ގައުމުގެ މާލިއްޔަތު އަނދަވަޅަކަށް ވައްޓައިލީ އެމްޑީޕީން. ވަކި މީހަކަށްވުރެ ޤައުމުގެ މަސްލަޙަތު މާމުހިއްމު.''
ސައީދު ވިދާޅުވި ގޮތުގައި އެމްޑީޕީގެ ވެރިކަމުގައި ފަސް އަހަރު ހޭދަކުރުމުގެ ނަތީޖާއަކަށްވީ މާލީ ހިންގުން ގޯސްވެ، ގައުމުގެ އިގްތިސާދަށް ބޮޑެތި ގެއްލުންތަކެއް ލިބުނެވެ. އޭނާ ވަނީ މި ދަތިކަމުގެ ޒިންމާ އުފުލަންޖެހޭ ބޭފުޅުން އިގްތިސާދީ ހައްލުތަކާ ބެހޭ ގޮތުން ވާހަކަ ދައްކަމުން ގެންދާތީ މާޔޫސްކަން ފާޅުކޮށް، އެއީ ލަދުވެތި ކަމެއް ކަމަށް ވިދާޅުވެފަ އެވެ.
ފައްޔާޒު ވަނީ ކުރު މުއްދަތުގެ ހައްލުތަކަށް ފައިސާ ޗާޕު ނުކުރުމަށް އިންޒާރު ދެއްވައި އިސްރާފު ކުރާ ހަރަދުތައް ހުއްޓުވައި ދެމެހެއްޓެނިވި އިގްތިސާދީ ފިޔަވަޅުތައް އަޅަން ސަރުކާރަށް އިލްތިމާސް ކުރައްވާފަ އެވެ.
ސިޔާސީ ބަދަލުވުމުގައި ރާއްޖޭގެ މާލީ މުސްތަގުބަލާ ގުޅިގެން ހިނގަމުންދާ ފިތުނައަށް އަލިއަޅުވާލާއިރު، ސަރުކާރުން އަމާޒު ހިފާފައިވަނީ ގައުމުގެ އިގްތިސާދީ ކަންބޮޑުވުންތަކަށް ހައްލު ހޯދައިދިނުމަށެވެ. ފައިސާ ޗާޕު ނުކޮށް ބޭކާރު ހަރަދުތައް ކުޑަކޮށްގެން އިގްތިސާދު ހަމަޔަކަށް އެޅުވުމަށެވެ.
