އެމްޑީޕީގެ އެތެރޭގެ ސިޔާސީ ވާދަވެރިކަން އިންތިހާއަށް ބޮޑުވެފައިވާ ދަނޑިވަޅެއްގައި، ކުރިއަށް އޮތް ރިޔާސީ ޕްރައިމަރީ ކާމިޔާބު ކުރައްވާނީ އަމިއްލަފުޅަށް ކަމަށް ވިދާޅުވެ، އެ ޕާޓީގެ ޗެއާޕާސަން ފައްޔާޒު އިސްމާއިލް، ކުރީގެ ރައީސް އިބްރާހީމް މުޙައްމަދު ޞާލިޙަށް ޕާޓީގެ ތެރެއިން ދެން ފުރުސަތެއް ނެތް ކަމުގެ އިޝާރާތެއް ދެއްވައިފި އެވެ.
އެމްޑީޕީގެ ރިފޯމް ހަރަކާތް ކަމަށްވާ "ބޮޑު ބަދަލު" ޕްރޮގްރާމުގައި ވާހަކަދައްކަވަމުން ފައްޔާޒު ވިދާޅުވީ، ހެޔޮ ހާލުގައި ހުރެއްޖެ ނަމަ މާތް ﷲގެ އިރާދަފުޅާއެކު ރިޔާސީ ޕްރައިމަރީ ކާމިޔާބު ކުރައްވާނެ ކަމަށެވެ. އަދި އެ އަމާޒަށް އެއްވެސް ބަދަލެއް ނާންނާނެ ކަމަށް ވެސް އޭނާ ކަށަވަރުކޮށްދެއްވި އެވެ.
"އެހެނެއް ނޫން، ގައުމުގެ ހާލަތާއި ރިއާޔަތްކޮށް މިގައުމަށާއި ޕާޓީއަށް އެންމެ ރަނގަޅު ގޮތް ހޯދުމަށް ކުރަންޖެހޭ މަސައްކަތުގެ ތެރޭގައި އަޅުގަނޑު ހުންނާނަން އެކަމުގެ އެންމެ ކުރީގަ،"
ފައްޔާޒު ވިދާޅުވި އެވެ.
ސިޔާސީ މަސްރަހު ދިރާސާކުރާ ފަރާތްތަކުން ދެކޭގޮތުގައި، ފައްޔާޒުގެ މި ވާހަކަފުޅަކީ ޕްރައިމަރީގައި ވާދަކުރެއްވުމުގެ ޝައުގުވެރިކަން ގެންގުޅުއްވާ ކުރީގެ ރައީސް ޞާލިޙަށް އޮތް ތާއީދު ކުޑަކޮށް، ޕާޓީގެ މުސްތަގުބަލު އޮތީ އައު ލީޑަޝިޕަކާއެކު ކަން ހާމަކުރުމަށް ދެއްވި ވަރުގަދަ ރައްދެކެވެ. ރައީސް ޞާލިޙްގެ ވެރިކަމުގައި ހިނގި އެމްއެމްޕީއާރްސީގެ ބޮޑު ޚިޔާނާތުގެ މައްސަލަތައް އެދެވޭ ގޮތެއްގައި ނުބެލުމާއި، އެމްއެމްޕީއާރުސީ ޚިޔާނާތާއި ގުޅުންހުރި މައްސަލަތަކާއި، ގައުމުގެ ދަރަނި ބޮޑުވުމުގެ ސަބަބުން އާންމުންގެ ބޮޑެތި ތުހުމަތުތަކެއް ސޯލިހަށް ވަނީ އަމާޒުވެފަ އެވެ.
Advertisement
ފައްޔާޒު މިހާރު އިސްވެ ހުންނަވައި ހިންގަވާ "ބޮޑު ބަދަލު" ހަރަކާތަކީ ކުރީގެ ރައީސް މުޙައްމަދު ނަޝީދުގެ ފެކްޝަނާ ވެސް ގުޅިގެން، ޞާލިޙްގެ ސިޔާސީ ބާރު ކަނޑުވާލުމަށް ކުރެވޭ މަސައްކަތެއްގެ ގޮތުގައި ސިފަކުރެވެ އެވެ.
