ހޮރްމޫޒް ކަނޑުއޮޅީގައި އުފެދިފައިވާ ނުތަނަވަސްކަމާ ގުޅިގެން، އެ ސަރަހައްދުގެ ދަތުރުފަތުރުތައް އަލުން ހުޅުވާލުމަށްޓަކައި ބާރުގެ ބޭނުންކުރުން ހިމެނޭ ގޮތަށް ހަރުކަށި ފިޔަވަޅުތަކެއް އެޅުމުގެ ހުއްދަ ދިނުމަށް ޔުނައިޓެޑް އެރަބް އެމިރޭޓްސް (ޔޫއޭއީ) އިން އދ. އަށް ގޮވާލައިފިއެވެ.
ރިޕޯޓުތަކުގައިވާ ބުނާގޮތުން، ޔޫއޭއީން މިފަދަ ނިންމުމަކަށް އދ. ގެ އެހީތެރިކަމަށް އެދުނީ ދުނިޔޭގެ އިގްތިސާދީ ގޮތުން އެންމެ މުހިންމު އެއް މަގު ކަމަށްވާ ހޮރްމޫޒް ކަނޑުއޮޅި ބަންދުވުމުގެ ސަބަބުން ބައިނަލްއަގުވާމީ ވިޔަފާރިއަށް ބޮޑެތި ހުރަސްތަކެއް ކުރިމަތިވަމުންދާތީއެވެ.
ޔޫއޭއީން މިފަދަ ކުއްލި ފިޔަވަޅަކަށް އެދުނު މައިގަނޑު ސަބަބަކީ، އެމެރިކާއިން އެ ސަރަހައްދުގެ މަސްލަހަތު ހަމައަކަށް އަޅުވައި، ކަނޑުއޮޅި ހުޅުވުމަށް ކުރި މަސައްކަތްތައް ނާކާމިޔާބުވުމެވެ. އެމެރިކާގެ އަސްކަރީ ބާރުވެރިކަމާއެކުވެސް އެ ސަރަހައްދުގެ ސަލާމަތީ ކަންކަން ކަށަވަރު ނުކުރެވުމުން، ޔޫއޭއީން މިހާރު ބޭނުންވަނީ އދ. ގެ ސަލާމަތީ މަޖިލީހުގެ ދަށުން ބާރުގެ ބޭނުންކޮށްގެން ނަމަވެސް އެ ސަރަހައްދު އާންމު ހާލަތަކަށް ގެނައުމަށެވެ.
މި މައްސަލައަކީ މުޅި ދުނިޔޭގެ ތެލުގެ ބާޒާރާއި ވިޔަފާރިއަށް އޭގެ ނޭދެވޭ އަސަރު ކުރާނެ ކަމެއް ކަމަށްވާތީ، ޔޫއޭއީން ވަނީ މިކަމުގައި އދ. އިން އަވަސް ފިޔަވަޅުތަކެއް އެޅުމަށް ބާރުއަޅާފައެވެ. ނަމަވެސް، މި ހުށަހެޅުމާ މެދު އދ. އިން ވަކި ގޮތެއް އަދި ނިންމާފައެއް ނުވެއެވެ.
