އިންޑޮނޭޝިއާގެ އިރުމަތީ ސަރަހައްދަށް މިއަދު އައި ރިކްޓަރ މިންގަނޑުން 7.4 ގެ ބާރުގަދަ ބިންހެލުމެއްގައި މަދުވެގެން އެކަކު މަރުވެ، އިތުރު ބަޔަކު ޒަހަމްވެއްޖެއެވެ.
މި ބިންހެލުމުގެ ސަބަބުން މިހާތަނަށް އެކަކު މަރުވެފައިވާއިރު، 11 އަށްވުރެ ގިނަ މީހުންނަށް އެކި ވަރުގެ އަނިޔާތައް ލިބިގެން ވަނީ ރިޕޯޓްކޮށްފައެވެ.
ބިންހެލުން އައުމާއެކު ސުނާމީގެ އިންޒާރު ނެރުނު ނަމަވެސް، ފަހުން ވަނީ އެ އިންޒާރު ކަނޑާލާފައެވެ. ނަމަވެސް، ރައްކާތެރިކަމުގެ ފިޔަވަޅެއްގެ ގޮތުން އެ ސަރަހައްދުގެ އައްސޭރިފަށުގައި ދިރިއުޅޭ ގާތްގަނޑަކަށް 1،000 އެއްހާ މީހުން ރައްކާތެރި ހިސާބުތަކަށް ބަދަލުކުރުމުގެ (އެވަކުއޭޓް ކުރުމުގެ) މަސައްކަތް ކަމާބެހޭ ފަރާތްތަކުން ވަނީ ފަށާފައެވެ.
މި ބިންހެލުމުގެ ސަބަބުން ގިނަ އަދަދެއްގެ ގެދޮރަށާއި އިމާރާތްތަކަށް ބޮޑެތި ގެއްލުންތަކެއް ލިބިފައިވާ ކަމަށް އެގައުމުގެ ކާރިސާތަކާ ބެހޭ އިދާރާތަކުން މައުލޫމާތުދެއެވެ.
އިންޑޮނޭޝިއާއަކީ ދުނިޔޭގެ "ޕެސިފިކް ރިންގް އޮފް ފަޔަރ" ގައި އޮންނަ ގައުމަކަށްވުމުން، އެގައުމަށް ގިނަގިނައިން ބިންހެލުންތަކާއި އަލިފާން ފަރުބަދަ ގޮވުމުގެ ހާދިސާތައް ކުރިމަތިވެއެވެ.
