ދިވެހިރާއްޖެއަށް އާންމުކޮށް ބޭނުންވާ އަސާސީ ކާބޯތަކެއްޗާއި އިމާރާތްކުރުމަށް ބޭނުންވާ ހިލައާއި ހިލަވެލި، ކުރީ އަހަރުތަކަށްވުރެ އެތައް ގުނައެއް އިތުރަށް ރާއްޖެއަށް އެކްސްޕޯޓް ކުރުމަށް އިންޑިއާ ސަރުކާރުން ނިންމައިފި އެވެ.

ރާއްޖޭގައި ހުންނަ އިންޑިއާގެ ހައިކޮމިޝަނުން ހާމަކުރެއްވި ގޮތުގައި، މި ނިންމުމަކީ ދިވެހި ސަރުކާރުގެ އެދިވަޑައިގަތުމުގެ މަތިން އިންޑިއާ ސަރުކާރުން ނިންމެވި ނިންމުމެކެވެ. މިއަހަރުގެ ތެރޭގައި ރާއްޖެއަށް އިތުރަށް އެކްސްޕޯޓް ކުރުމަށް ހަމަޖެހިފައިވާ ބާވަތްތަކުގެ ތެރޭގައި ބިސް، އަލުވި، ފިޔާ، ހަނޑޫ، ފުށް، ހަކުރު އަދި މުގުގެ އިތުރުން، އިމާރާތް ކުރުމުގެ ސިނާއަތަށް މުހިންމު ހިލައާއި ހިލަވެލި ހިމެނެ އެވެ.

ހައިކޮމިޝަނުން ވިދާޅުވި ގޮތުގައި، ރާއްޖެއިން ބޭނުންވާ މިންވަރަށް މި ހުރިހާ ބާވަތްތަކެއްވެސް ފޯރުކޮށްދިނުމަށް އިންޑިއާއިން ވަނީ އެއްބަސްވެފަ އެވެ. ރާއްޖެއާއި އިންޑިއާއާ ދެމެދު 1981 ވަނަ އަހަރު ގާއިމުކޮށްފައިވާ ހާއްސަ ވިޔަފާރި އެއްބަސްވުމުގެ ދަށުން، ކޮންމެ އަހަރަކުވެސް ރާއްޖެއަށް އަސާސީ މުދާ އެތެރެކުރުމަށް ވަކި ކޯޓާއެއް ކަނޑައަޅަ އެވެ. ނަމަވެސް، މިއަހަރަށް ކަނޑައެޅި މި މިންވަރަކީ އެ އެއްބަސްވުމުގެ ދަށުން މިހާތަނަށް އެންމެ ގިނަ އަދަދަކަށް މުދާ އެކްސްޕޯޓް ކުރުމަށް ހުއްދަ ދިން ފަހަރުކަން އިންޑިއާ ސަރުކާރުން ފާހަގަކުރެ އެވެ.

މީގެ އިތުރުން، އިންޑިއާއިން އެހެން ގައުމުތަކަށް އަސާސީ ކާބޯތަކެތި އެކްސްޕޯޓް ކުރުން ހުއްޓާލާފައިވާ ދަނޑިވަޅެއްގައިވެސް، ރާއްޖެއަށް ބޭނުންވާ މުދާ ފޯރުކޮށްދިނުމުގައި ދެމިއޮންނާނެ ކަމުގެ ޔަގީންކަން އެ ގައުމުން ވަނީ ދީފަ އެވެ. މިއީ އިންޑިއާގެ "ނެއިބަހުޑް ފަސްޓް ޕޮލިސީ" ނުވަތަ އަވަށްޓެރި ގައުމުތަކަށް އިސްކަންދިނުމުގެ ސިޔާސަތުގެ ދަށުން ރާއްޖޭގެ ތަރައްގީއާއި ހަމަޖެހުމަށް ދޭ އެއްބާރުލުމެއްގެ ގޮތުގައި އިންޑިއާ ހައިކޮމިޝަނުން ސިފަކުރެ އެވެ.

ސަރުކާރުން ރާއްޖޭގެ ކާބޯތަކެތީގެ ރައްކާތެރިކަން ކަށަވަރުކުރުމަށް ކުރައްވަމުންދާ މަސައްކަތްތަކުގެ ތެރެއިން، އިންޑިއާއިން މިދިން ލުޔަކީ ރާއްޖޭގެ ބާޒާރުގައި ތަކެތީގެ އަގު ހިފެހެއްޓުމަށާއި، މުދާ ލިބުމުގައި ދިމާވެދާނެ ދަތިތަކަށް އޮތް ބޮޑު ހައްލެކެވެ.