އިސްރާއީލާއި އެމެރިކާ ގުޅިގެން އީރާނުގެ އެކި ސަރަހައްދުތަކަށް ދިން ވަރުގަދަ ވައިގެ ހަމަލާތަކެއްގައި، ކެންސަރު ބަލީގެ ބޭސް އުފައްދާ މަރުކަޒަކަށާއި މުގައްދަސް ދީނީ ބިނާއަކަށް އަމާޒުކޮށް ބޮޑެތި ގެއްލުންތަކެއް ދީފިއެވެ.

މި ހަމަލާތައް ދީފައިވަނީ މިއަދުގެ ދުވަހުގެ ވަގުތެއްގައެވެ. ރިޕޯޓްތައް ބުނާ ގޮތުގައި އިސްރާއީލާއި އެމެރިކާގެ އަސްކަރިއްޔާއިން އީރާނުގެ ތެހެރާނާއި އެހެނިހެން ސިޓީތަކަށް ދިން މި ހަމަލާތަކުގެ މަގުސަދަކީ އީރާނުގެ އަސްކަރީ ގާބިލުކަން ކުޑަކުރުމެވެ. ނަމަވެސް، މި ހަމަލާތައް އަމާޒުވެފައިވަނީ އާންމު ހިދުމަތްތައް ދޭ ތަންތަނަށާއި އާންމުންގެ އިހުސާސްތަކާ ގުޅިފައިވާ ދީނީ މަރުކަޒުތަކަށެވެ.

އީރާނުގެ އޮފިޝަލުން ހާމަކުރި ގޮތުގައި، ހަމަލާ އެރި ކެންސަރު ބޭސް އުފައްދާ މަރުކަޒަކީ އެ ގައުމުގެ ގިނަ އަދަދެއްގެ ބަލިމީހުންނަށް ބޭނުންވާ މުހިންމު ބޭސްތައް ތައްޔާރުކުރާ ތަނެކެވެ. މީގެ އިތުރުން، ހަމަލާގެ ސަބަބުން ތާރީޚީ އަދި ދީނީ ގޮތުން މުހިންމު ބިނާއަކަށް ބޮޑެތި ގެއްލުންތަކެއް ލިބިފައިވާއިރު، މިއީ މުޅި އިސްލާމީ އުންމަތުގެ ކަންބޮޑުވުން އޮތް ކަމެކެވެ.

މި ހަމަލާއާ ގުޅިގެން ބައިނަލްއަގުވާމީ މުޖުތަމައުން ދަނީ ކަންބޮޑުވުން ފާޅުކުރަމުންނެވެ. އީރާނުން ބުނެފައިވަނީ މިއީ އިންސާނީ ހައްގުތަކާ ޚިލާފަށް ދީފައިވާ ހަމަލާތަކެއް ކަމަށާއި، މިކަމުގެ ސަބަބުން ސަރަހައްދީ ހަމަޖެހުން އިތުރަށް ގޯސްވެގެންދާނެ ކަމަށެވެ. އިސްރާއީލުން ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ލާއިންސާނީ އަމަލުތަކުގެ އިތުރުން، އީރާނަށް ދެމުންދާ މިފަދަ ހަމަލާތަކަކީ މުޅި ސަރަހައްދު ނުރައްކަލެއްގެ ތެރެއަށް ވައްޓާލާނެ ކަމެއް ކަމަށް މަސްރަހު ދިރާސާކުރާ ފަރާތްތަކުން ބުނެއެވެ.