ހިޔާ ފްލެޓުތަކުގެ ފިނިޝިން މަސައްކަތަށް އާއްމުން ކޮށްފައިވާ ހަރަދު އަނބުރާ ދިނުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންނެވި ވަޢުދާ އެއްގޮތަށް، އެ ފްލެޓުތަކުގެ ދެ އަހަރު ދުވަހުގެ ކުލި ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ކަނޑާލައިފިއެވެ.
މި ވައުދު ތަންފީޒުކުރާނެ ގޮތުގެ ތަފްސީލް ހާމަކޮށް، އެޗްޑީސީން މިދިޔަ ހަފްތާގައި ވަނީ ހިޔާ ފްލެޓްތަކުގެ ވެރިންނަށް ސިޓީއެއް ފޮނުވާފައެވެ. އެ ސިޓީގައި ބަޔާންކޮށްފައިވާ ގޮތުގައި، ފްލެޓުގެ ފިނިޝިންއާ ގުޅިގެން ކޮންމެ ފްލެޓަކަށް ކަނޑައަޅާފައިވާ 200,000 ރުފިޔާގެ ޑިސްކައުންޓުގެ ތެރެއިން ނުދެވި އޮތް އަދަދުން، ފްލެޓުގެ ކުލީގެ ގޮތުގައި ނުދެއްކި ހުރި ފައިސާ އުނިކުރެވޭނެއެވެ.
އެޗްޑީސީން ބުނީ، ހިޔާ ފްލެޓުތަކުގެ ފިނިޝިންއަށް ދިޔަ ހަރަދު ހަމަކުރުމަށްޓަކައި، ކުރިއަށް އޮތް ދެ އަހަރު ދުވަހު ފްލެޓްތަކުގައި ދިރިއުޅޭ ފަރާތްތަކުން ކުލި ދައްކަން ނުޖެހޭނެ ކަމަށެވެ. ނަމަވެސް، ކޮންމެ މަހަކު މެއިންޓައިނަންސް ފީގެ ގޮތުގައި ދައްކަންޖެހޭ 1,000 ރުފިޔާ ދައްކަން ޖެހޭނެ ކަމަށް އެ ކޯޕަރޭޝަނުން މައުލޫމާތު ދެއެވެ.
ހިޔާ ޓަވަރުތަކުގެ އެޕާޓްމަންޓެއްގެ މަހު ކުއްޔަކީ 3,984 ރުފިޔާއެވެ. މެއިންޓަނެންސް ފީގެ ގޮތުގައި ނަގާ 1,000 ރުފިޔާއާއެކު މީގެ ކުރިން ކޮންމެ މަހަކު އެޗްޑީސީއަށް ޖުމްލަ 4,984 ރުފިޔާ ދައްކަން ޖެހެއެވެ. މި ނިންމުމާއެކު، ފްލެޓްގެ ވެރިން ކުރިއަށް އޮތް ދެ އަހަރު ދައްކަން ޖެހޭނީ ހަމައެކަނި މެއިންޓަނެންސް ފީއެވެ.
މީގެ އިތުރުން، ހިޔާ ފްލެޓުތަކުގެ ކުލި ނުދައްކައިގެން މިދިޔަ ޑިސެމްބަރު މަހާ ހަމައަށް އަރާފައިވާ ހުރިހާ ޖޫރިމަނާތަކެއް ވެސް ސަރުކާރުން މިހާރު ވަނީ މާފުކޮށްދީފައެވެ. މިއީ ފްލެޓްތަކުގެ ވެރިންނަށް މާލީ ގޮތުން ބޮޑު ލުޔެއް ދިނުމަށް ސަރުކާރުން ނިންމި ނިންމުމެކެވެ.
