ދުނިޔޭގެ މަސްރަޙުގައި ހިނގަމުންދާ ހަމަނުޖެހުންތަކާއި ހަނގުރާމަތައް ހުއްޓުވުމުގެ ގާބިލުކަން ހުރި ހަމައެކަނި ބޭފުޅަކީ އެމެރިކާގެ ކުރީގެ ރައީސް ޑޮނަލްޑް ޓްރަމްޕް ކަމަށް މިޞްރުގެ ރައީސް ޢަބްދުލް ފައްތާޙް އަލް-ސީސީ ވިދާޅުވެއްޖެއެވެ.
މިޞްރުގެ ވެރިރަށް ގާހިރާގައި ބޭއްވި ބައްދަލުވުމެއްގައި ވާހަކަދައްކަވަމުން ރައީސް ސީސީ ވިދާޅުވީ، މިހާރު ހިނގަމުންދާ ހަނގުރާމަތަކުގެ ސަބަބުން ދުނިޔޭގެ އިގްތިސާދަށް ބޮޑެތި ގޮންޖެހުންތަކެއް ކުރިމަތިވަމުންދާ ކަމަށެވެ. އަދި މި ހަމަނުޖެހުންތައް މިހާރުން މިހާރަށް ހުއްޓުވުމަށް އެމެރިކާގެ ބާރުވެރި ދައުރެއް ބޭނުންވާކަން ފާހަގަކުރައްވައި، ޓްރަމްޕަކީ އެކަން ކުރެއްވޭނެ ހިކުމަތްތެރިކަމާއި ގާބިލުކަން ހުރި ލީޑަރެއްގެ ގޮތުގައި ސީސީ ސިފަކުރެއްވިއެވެ.
މީގެ އިތުރުން، ހަނގުރާމަ އިތުރަށް ދިގުލައިގެންދާނަމަ ދުނިޔޭގެ ބާޒާރުގައި ސާފުނުކުރާ ތެލުގެ އަގު ފީފާއަކަށް 200 ޑޮލަރަށްވުރެ މައްޗަށް އުފުލިގެން ހިނގައިދާނެ ކަމުގެ އިންޒާރުވެސް ރައީސް ސީސީ ދެއްވިއެވެ. ތެލުގެ އަގު މިހާ ބޮޑަށް އުފުލިއްޖެނަމަ، ތަރައްގީވަމުން އަންނަ ގައުމުތަކުގެ އިގްތިސާދު އިނދަޖެހި، އާންމު ދިރިއުޅުމުގެ ހަރަދުތައް އިންތިހާއަށް ބޮޑުވެގެންދާނެ ކަމަށް އެމަނިކުފާނު ވިދާޅުވިއެވެ.
މިޞްރުގެ ރައީސް މި މޭރުމުން ވާހަކަދެއްކެވީ މެދުއިރުމައްޗާއި ޔޫރަޕްގެ މަސްރަޙު ނުތަނަވަސްވެފައިވާ ދަނޑިވަޅެއްގައެވެ. މި ހަމަނުޖެހުންތަކުގެ ސަބަބުން ސަރަހައްދީ ހަމަޖެހުމަށް ބުރޫއަރަމުންދާ ކަމަށާއި، ބައިނަލްއަގުވާމީ މުޖުތަމައުން މިކަމާ މެދު އަވަސް ފިޔަވަޅުތަކެއް އަޅަންޖެހޭ ކަމަށްވެސް ސީސީ ވިދާޅުވިއެވެ.
