"ރަންދިހަފަހެއް" ސީރީޒްގެ 10 ރުފިޔާގެ އައު ޗާޕެއް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އަށް މިއަދު ގެނެސްފި އެވެ. މަރުކަޒީ ބޭންކުން ނިންމާފައިވަނީ އަންނަ އޭޕްރީލް މަހުގެ 1 ވަނަ ދުވަހުން ފެށިގެން މި ނޫޓުތައް ދައުރުވާ ފައިސާގެ ތެރެއަށް ދޫކުރުމަށެވެ.

އެމްއެމްއޭއިން ހާމަކުރި ގޮތުގައި، 10 ރުފިޔާގެ އައު ޗާޕެއް ގެންނަން ޖެހުނީ ބާޒާރުގައި 10 ރުފިޔާގެ ސްޓޮކް މަދުވުމާއި، ބައުވެ ހަލާކުވެފައިވާ ނޫޓުތައް އައުކުރުމުގެ ބޭނުމުގަ އެވެ. 10 ރުފިޔާގެ ނޫޓަކީ ކުޑަ އަދަދެއްގެ ނޫޓަކަށް ވުމުން، ދުވަހުން ދުވަހަށް ކުރާ ކުދި ވިޔަފާރީގެ މުއާމަލާތްތަކުގައި މާރުކުރުމަށް މި ނޫޓު ބޭނުންކުރާ މިންވަރު ވަރަށް ގިނަ އެވެ. މީގެ ސަބަބުން ނޫޓުތައް ހަލާކުވާ މިންވަރު އިތުރުވާކަމަށާއި، ބޮޑެތި މުއާމަލާތްތަކުގައި މިފަދަ ނޫޓު ބޭނުންނުކުރާތީ ބޭންކުތަކަށް މި ނޫޓު ޖަމާވާ މިންވަރުވެސް މަދުކަމަށް އެމްއެމްއޭއިން ފާހަގަކުރެ އެވެ.

މިއީ "ރަންދިހަފަހެއް" ސީރީޒް ތައާރަފްވި ފަހުން 10 ރުފިޔާގެ ނޫޓު ޗާޕްކުރި ތިންވަނަ ފަހަރެވެ. އެންމެ ފުރަތަމަ މި ސީރީޒްގެ 10 ރުފިޔާ ޗާޕްކުރީ 2015 ވަނަ އަހަރު ކުރީގެ ގަވަރުނަރު އަޒީމާ އާދަމްގެ ސޮޔާއެކުގަ އެވެ. ދެވަނަ ފަހަރަށް 2018 ވަނަ އަހަރު ކުރީގެ ގަވަރުނަރު އަހުމަދު ނަސީރުގެ ސޮޔާއެކު ޗާޕްކޮށްފައިވާއިރު، މިފަހަރުގެ އައު ނޫޓުތަކުގައި ސޮއިކުރައްވާފައިވަނީ މިހާރުގެ ގަވަރުނަރު އަހްމަދު މުނައްވަރެވެ.

އަލަށް ނެރޭ ނޫޓުތަކުގައި ޖަހާފައިވަނީ 31 ޖުލައި 2025 ގެ ތާރީހެވެ. މި ނޫޓުތަކުގެ ޚާއްޞަ ސިފައެއްގެ ގޮތުން، ނޫޓުގެ ދެފުށުގައި ދިވެހި ރުފިޔާގެ ނިޝާން ހިމަނާފައިވެއެވެ. އެގޮތުން ނޫޓުގެ މޫނުމަތީގެ ވައަތްފަރާތުން މަތީގައި އަދި ފަހަތްފަރާތުގެ ކަނާއަތް ފަރާތުން މަތީގައި މޫނުމަތީ އަގާއެކު މި ނިޝާން ފެންނަން ހުންނާނެ އެވެ.

އެމްއެމްއޭއިން ބުނީ މިހާރު ބޭނުންކުރަމުންދާ ނޫޓު ސީރީޒަށް 10 އަހަރަށްވުރެ ގިނަ ދުވަސްވެފައިވާތީ، ބާވެފައިވާ ނޫޓުތައް ބަދަލުކުރުމަކީ އިގްތިސާދުގައި ދައުރުވާ ފައިސާގެ ފެންވަރު ހިފެހެއްޓުމަށް ކުރާ މުހިންމު މަސައްކަތެއް ކަމަށެވެ. އައު ނޫޓުތައް ދައުރުވާން ފެށި ނަމަވެސް، މިހާރު ބޭނުންކުރަމުންދާ 10 ރުފިޔާގެ ނޫޓުތައްވެސް އެއާއެކު ބޭނުންކުރެވޭނެ ކަމަށް މަރުކަޒީ ބޭންކުން މައުލޫމާތު ދެއެވެ.