އިރާނާއި ވެނެޒުއެލާއަށް ފިޔަވަޅު އެޅި ގޮތަށް ކިއުބާ "ދެން ވާނީ" ތިމަންނާގެ އަމާޒަށް ކަމަށް ބުނެ، ކިއުބާއަށް އަނެއްކާވެސް ޓްރަމްޕު އިންޒާރު ދީފިއެވެ.
ޓްރަމްޕް ވަނީ ކިއުބާ ސަރުކާރަށް ވަރަށް ބޮޑަށް ފާޑު ކިޔާފައެވެ. އެ ގައުމަކީ ދިގު ތާރީހެއްގައި ކޮމިއުނިސްޓް ވެރިކަމެއްގެ ދަށުގައި ތިބި ރައްޔިތުންތަކެއް ދިރިއުޅޭ ތަނެއް ކަމަށް ވަނީ ބުނެފައެވެ. ލެޓިން އެމެރިކާ ސަރަހައްދުގައި ވެރިކަން ކުރަމުންދާ ގައުމުތަކަށް ދެމުންދާ ޕްރެޝަރު ވަރުގަދަ ކުރުމުގެ ތެރެއިން، ޓްރަމްޕް ވަނީ ކިއުބާ ވެސް ސީދާ ގޮންޖެހުމެއްގެ ތެރެއަށް ވައްދާފައެވެ.
ޓްރަމްޕްގެ ވެރިކަމުގައި ވެނެޒުއެލާގެ ރައީސް ނިކޮލަސް މަޑޫރޯ ވެސް ހިފައި ހައްޔަރުކޮށްފައި ކަން ފާހަގަ ކުރެވެއެވެ. ވެނެޒުއެލާ އަށް ވަރަށް ހަރުކަށި ފިޔަވަޅުތަކެއް ވަނީ ތަންފީޒު ކޮށްފައެވެ. ކިއުބާ ސަރުކާރަކީ ވެނެޒުއެލާ ސަރުކާރަށް ތާއީދު ކުރާ ބައެއް ކަމަށާއި، ދެ ގައުމު ގުޅިގެން ހިންގާ ހަރަކާތްތަކަކީ ބަލައިގަނެވޭނެ ކަންތައްތަކެއް ނޫން ކަމަށް ވެސް ޓްރަމްޕް ބުނެޏެވެ.
ކިއުބާ އަށް ދަތިކުރުމުގެ ފިޔަވަޅު ތަންފީޒު ކޮށްފައިވާ ތާރީހު ވެސް ދިގެވެ. ހަތްދިހައިގެ ތެރެއިން ފެށިގެން ދެ ގައުމު ދެމެދު ގުޅުން ކެނޑިފައި ވާ ތާ ދިގު ތާރީހެއް ވަނީ ފާއިތުވެފައެވެ. ކުރީގެ ރައީސް ބަރަކް އޮބާމާ ވެރިކަމުގައި ދެގައުމުގެ ގުޅުން ރަނގަޅު ވި ނަމަވެސް، ޓްރަމްޕްގެ ފުރަތަމަ ދައުރުގައި ވެސް ކިއުބާ އާއި ދެކޮޅަށް ގެންގުޅުނީ ހަރުކަށި ސިޔާސަތެކެވެ.
ތަޖުރިބާކާރު ސިޔާސީ ތަހުލީލު ކުރާ ފަރާތްތަކުން ބުނާ ގޮތުގައި، ލެޓިން އެމެރިކާ ސަރަހައްދުގައި ހިންގާ ކޮމިއުނިސްޓް ވެރިކަންތަކަށް ފިއްތުން ކުރިމަތި ކުރުވުމަކީ ޓްރަމްޕްގެ ހާރިޖީ ސިޔާސަތުގެ މައިގަނޑު ތަރަހައިގެ ތެރެއިން ހިމެނޭ ކަމެކެވެ. ކިއުބާ، ވެނެޒުއެލާ، އަދި ނިކަރާގުއާ ފަދަ ގައުމުތަކަށް ކުރަމުންދާ ޕްރެޝަރު ދުވަހެއް ދުވަހަކަށް ދަނީ ވަރުގަދަ ވަމުންނެވެ.
