ބޭންކް އޮފް މޯލްޑިވްސް (ބީއެމްއެލް) ގެ 43 އަހަރުވީ ދިގު ތާރީގަހުއި އެންމެ ކާމިޔާބު އަހަރަށްފަހު، އެ ބޭންކުން ތާރީހީ ރެކޯޑު މާލީ ނަތީޖާއެއް ހާސިލުކޮށްފިއެވެ. ހުކުރު ދުވަހުގެރޭ ބޭއްވި ބޭންކުގެ އަހަރީ އާންމު ޖަލްސާގައި ހިއްސާދާރުންނާ މުހާތަބު ކުރައްވަމުން، ބޭންކުގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފް ވަނީ ބޭންކުން ހޯދާފައިވާ ބޮޑެތި ކާމިޔާބީތަކުގެ ތަފުސީލު ހާމަކުރައްވާފަ އެވެ.
ވޭތުވެދިޔަ އަހަރު ބޭންކަށް ސާފު ފައިދާގެ ގޮތުގައި 2.5 ބިލިއަން ރުފިޔާ ލިބިފައިވާއިރު، މިއީ އޭގެ ކުރީ އަހަރާ އަޅާބަލާއިރު 10 އިންސައްތައިގެ ކުރިއެރުމެކެވެ. މި ކާމިޔާބީގެ މައިގަނޑު ސަބަބަކީ ބޭންކުން ދޫކޮށްފައިވާ ލޯނުތަކުގެ ޕޯޓްފޯލިއޯ 25 އިންސައްތަ އިތުރުވެ، 25.2 ބިލިއަން ރުފިޔާއަށް އުފުލުމެވެ. މީގެ އިތުރުން ބޭންކުގެ ޖުމްލަ އެސެޓް 55.8 ބިލިއަން ރުފިޔާއަށް އަރާފައިވާއިރު، ކަސްޓަމަރުން ބޭންކަށް ޖަމާކޮށްފައިވާ ފައިސާގެ އަދަދު ވަނީ 37.2 ބިލިއަން ރުފިޔާއަށް އިތުރުވެފަ އެވެ. މިއީ ކަސްޓަމަރުންގެ މެދުގައި ބޭންކަށް އޮތް އިތުބާރު ހާމަކޮށްދޭ މުހިންމު ނިޝާނެކެވެ.
ޖަލްސާގައި ވާހަކަދައްކަވަމުން ސީއީއޯ ވިދާޅުވީ، ވޭތުވެދިޔަ އަހަރަކީ ހަމައެކަނި ރެކޯޑު ފައިދާއެއް ލިބުނު އަހަރެއް ނޫން ކަމަށާއި، އެއީ ގައުމީ ބޭންކެއްގެ ގޮތުގައި ބޭންކުގެ ދައުރު ވަރުގަދަކޮށް، ރާއްޖޭގެ ހުރިހާ ކަންކޮޅުތަކަކަށް މާލީ ހިދުމަތްތައް ފުޅާކުރި އަހަރެއް ކަމަށެވެ.
"އަޅުގަނޑުމެންގެ ކާމިޔާބީ މިނެކިރެނީ ހަމައެކަނި މާލީ ނަތީޖާތަކުންނެއް ނޫން. އޭގެ ބަދަލުގައި ދިވެހިންގެ ދިރިއުޅުމަށާއި އަދި އަޅުގަނޑުމެންގެ އިގްތިސާދު ކުރިއަރުވާ ވިޔަފާރިތަކަށް ކުރާ ހެޔޮ އަސަރުތަކުން،" ޝަރީފް ވިދާޅުވިއެވެ.
ބޭންކުގެ ކުރިމަގުގެ ސްޓެރެޓެޖީއަށް އަލިއަޅުއްވާލައްވަމުން ޝަރީފް ވިދާޅުވީ، ބޭންކުން މިހާރު އެންމެ ބޮޑު އިސްކަމެއް ދެނީ ޑިޖިޓަލް ހިދުމަތްތައް ފުޅާކުރުމަށާއި، ކަސްޓަމަރުންނަށް އެންމެ ފުރިހަމަ ހިދުމަތް ދިނުމަށެވެ. އަދި ބޭންކުގެ ހިންގުން އިތުރަށް ހަރުދަނާކޮށް، ދިގު ރާސްތާގެ ދެމެހެއްޓެނިވި މަޝްރޫއުތަކަށާއި މުވައްޒަފުންގެ ކުރިއެރުމަށް އިންވެސްޓް ކުރަމުންދާނެ ކަމުގެ ޔަގީންކަން އޭނާ ދެއްވި އެވެ.
ބޭންކުގެ މާލީ ހާލަތު ވަޒަންކުރާއިރު، ކެޕިޓަލް އެޑެކުއަސީ ރޭޝިއޯ ވަނީ ގާނޫނު ލާޒިމުކުރާ މިންވަރަށްވުރެ މަތީގައި، އެއީ 48.1 އިންސައްތައިގައި ހިފެހެއްޓިފައެވެ. މިއީ ބޭންކުގެ ރިސްކް މެނޭޖްމެންޓްގެ ހަރުދަނާކަން ދައްކުވައިދޭ ކަމެކެވެ.
ޝަރީފްގެ ވާހަކަފުޅު ނިންމަވާލެއްވީ ބޭންކުގެ 390,000 އަށްވުރެ ގިނަ ކަސްޓަމަރުންނާއި، މުވައްޒަފުން އަދި ހިއްސާދާރުން ބޭންކަށް ކުރައްވާ އިތުބާރަށް ޝުކުރު އަދާކުރައްވަމުންނެވެ. އަދި ބޭންކުގެ ބޯޑުން ދެއްވާ އިރުޝާދަށް ޝުކުރު ދަންނަވައި، 2026 ވަނަ އަހަރަކީވެސް ބޭންކަށް ކާމިޔާބު އަހަރަކަށް ވާނެ ކަމަށް އުންމީދު ކުރައްވާ ކަމަށް ވިދާޅުވި އެވެ.
