ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ދުވަހެއްގައި ބޭއްވުމަށްޓަކައި ގާނޫނުއަސާސީއަށް ގެންނަން ނިންމާފައިވާ އިސްލާހަކީ ދުސްތޫރީ އޮނިގަނޑު ހުއްދަކުރާ، ސައްހަ އިސްލާހެއް ކަމަށް ކުރީގެ ބަންޑާރަނައިބު އާއިޝަތު އާޒިމާ ޝަކޫރު ވިދާޅުވެއްޖެ އެވެ.
އާޒިމާ މިހެން ވިދާޅުވީ، އިންތިހާބުތައް އެއްކޮށްލުމާ ގުޅޭގޮތުން ގެންނަ އިސްލާހާ މެދު ގާނޫނީ ނަޒަރަކުން ބަހުސްކުރުމަށް ބާ ކައުންސިލުން ބޭއްވި ފޯރަމެއްގައި ވާހަކަފުޅު ދައްކަވަމުންނެވެ. މި އިސްލާހުގެ ގާނޫނީ ސައްހަކަމާމެދު ބައެއް ފަރާތްތަކުން ސުވާލު އުފައްދަމުންދާ ދަނޑިވަޅެއްގައި، އާޒިމާ ވަނީ މި ބަދަލުގައި ދުސްތޫރީ ނުވަތަ އިޖުރާއީ އެއްވެސް މައްސަލައެއް ނެތްކަން ގާނޫނީ ގޮތުން ތަފްސީލުކޮށްދެއްވާފަ އެވެ.
އާޒިމާ ފާހަގަކުރެއްވި ގޮތުގައި، މި އިސްލާހުގެ ދަށުން ރައްޔިތުންގެ ފެންނަ ނުފެންނަ ވޯޓަކަށް ދާންޖެހެނީ ރައްޔިތުންގެ މަޖިލީހުގެ އުމުރަށް ބަދަލެއް އަންނާތީ އެވެ. ގާނޫނުއަސާސީގައި އޮންނަ ގޮތުން މަޖިލީހުގެ ދައުރަށް ބަދަލެއް ގެނެވޭނީ ރައްޔިތުންގެ ސީދާ ވޯޓަކުން ކަމަށްވާއިރު، ރައްޔިތުން އެކަމަށް ހުއްދަ ދީފިނަމަ އެއްވެސް ގާނޫނީ ހުރަހެއް ކުރިމަތިނުވާނެ ކަމަށް އޭނާ ވިދާޅުވި އެވެ.
މަޖިލީހުން މި އިސްލާހު ފާސްކުރުމުގައި އަމަލުކުރި އިޖުރާއާތްތަކާ ގުޅޭގޮތުން ވާހަކަދައްކަވަމުން އާޒިމާ ވިދާޅުވީ، މަޖިލީހުން ކަންކަން ނިންމުމުގައި އަމަލުކުރަންޖެހޭ އުސޫލުތައް ގާނޫނުއަސާސީގައި ސާފުކޮށް ބަޔާންކޮށްފައިވާ ކަމަށެވެ. އެގޮތުން ކަމެއް ނިންމުމަށް ބޭނުންވާ އަގުލަބިއްޔަތު އޮންނަންޖެހޭނެ ކަމަށް ބަޔާންކޮށްފައިވީ ނަމަވެސް، އެކަންކަން ކުރަން ވަކި މުއްދަތުތަކެއް ގާނޫނުއަސާސީގައި ކަނޑައަޅާފައި ނުވާކަން އޭނާ ފާހަގަކުރެއްވި އެވެ.
މީގެ އިތުރުން، ރައްޔިތުންގެ މަޖިލީހުން ނިންމާ ނިންމުންތަކާއި އަމަލުކުރާ ގޮތަކާ މެދު އެއްވެސް ކޯޓެއްގައި ސުވާލު ނުކުރެވޭނެ ކަމަށް ގާނޫނުއަސާސީގައި ބަޔާންކޮށްފައިވާކަންވެސް އާޒިމާ ހަނދާންކޮށްދެއްވި އެވެ. އެހެންކަމުން، އިންތިހާބުތައް އެއްދުވަހެއްގައި ބޭއްވުމަށް ގެންނަ މި ބަދަލަކީ ދުސްތޫރީ އޮނިގަނޑުގެ ތެރެއިންނާއި މަޖިލީހުގެ އިޖުރާއާތުގެ ތެރެއިންވެސް ހުއްދަ، ގާނޫނީ ގޮތުން ސައްހަ ބަދަލެއް ކަމަށް އާޒިމާ ޝަކޫރު ވިދާޅުވި އެވެ.
