ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްދުވަހެއްގައި ބޭއްވުމަކީ ދައުލަތަށާއި ރައްޔިތުންނަށް އެންމެ ފައިދާހުރި ގޮތް ކަމަށް ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވެއްޖެ އެވެ.

އަކްރަމް މިހެން ވިދާޅުވީ އެކްސްގައި ކުރެއްވި ޕޯސްޓެއްގަ އެވެ. ދެ އިންތިހާބު އެއްކޮށް ބޭއްވުމަށް ތާއީދުކުރައްވައި އޭނާ ވަނީ އޭގެ ސަބަބުން ލިބޭނެ މުހިންމު ހަ ފައިދާއެއް ފާހަގަކުރައްވާފަ އެވެ.

އަކްރަމް ފާހަގަކުރެއްވި ފުރަތަމަ ކަމަކީ، ވެރިކަމަށް ކުރިމަތިލާ ފަރާތުން ނުވަތަ ވެރިކަމުގައި ހުރެ އިތުރު ދައުރަކަށް ކުރިމަތިލާ ފަރާތުން މަޖިލިސް ހޯދުމަށް ފޯކަސްކުރާ މިންވަރު ކުޑަވުމެވެ. މީގެ ސަބަބުން ނުފޫޒުން އެއްކިބާވެ، ރައްޔިތުން ބޭނުންވާ މަޖިލީހެއް ހޮވުމަށް މަގުފަހިވާނެ ކަމަށް އޭނާ ވިދާޅުވި އެވެ.

ދެވަނަ ކަމެއްގެ ގޮތުގައި އޭނާ ވިދާޅުވީ، މަޖިލިސް މެންބަރަކު ހޮވުމަށް ވޯޓުލާއިރު، ވެރިކަމަށް އަންނާނީ ކޮން ޕާޓީއެއްގެ ކެނޑިޑޭޓެއްކަން ނޭނގޭނެތީ، ކެނޑިޑޭޓުންގެ ތެރެއިން ރައްޔިތުން ހިތް އެދޭ ފަރާތެއް އިހްތިޔާރުކުރަން ފަސޭހަވާނެ ކަމަށެވެ. މީގެ އިތުރުން، އިންތިހާބުތަކުގެ ފްރެޝަރަށް ސަރުކާރުގެ މައިގަނޑު އަމާޒު އަބަދު ބަދަލުކުރަންޖެހޭ ޖެހުން ނިމުމަކަށް އައިސް، ސަރުކާރުގެ މަސައްކަތްތައް ހަރުދަނާކުރުމަށް ފުރުސަތު ލިބޭނެ ކަމަށްވެސް އަކްރަމް ވިދާޅުވި އެވެ.

އިގްތިސާދީ ގޮތުން ލިބޭ ފައިދާތަކަށް އަލިއަޅުވާލައްވަމުން އަކްރަމް ވިދާޅުވީ، އިންތިހާބު ބާއްވާ ދުވަސްތަކުގެ އަދަދު މަދުވުމުން ދައުލަތުން ކުރާ ހޭދަ ކުޑަވާނެ ކަމަށެވެ. އަދި ހަމައެކަނި އިލެކްޝަންސް ކޮމިޝަނުން ކުރާ ހަރަދު ކުޑަވުމުގެ ބަދަލުގައި، އިންތިހާބުތަކާ ދިމާކޮށް ސަރުކާރުތަކުން ވަޒީފާ އިތުރުކުރާ ނިސްބަތް މަދުވެ، ސިޔާސީ ޕާޓީތަކުން ކުރާ ހޭދަވެސް ކުޑަވެގެންދާނެ ކަމަށް އޭނާ ފާހަގަކުރެއްވި އެވެ.

އެންމެ މުހިންމު ކަމެއްގެ ގޮތުގައި އަކްރަމް ފާހަގަކުރެއްވީ، ރިޔާސީ އިންތިހާބާ އެކު މަޖިލިސް އިންތިހާބު ބޭއްވުމުން ވޯޓުލާ މީހުންގެ އަދަދު އެތައް ގުނައަކުން އިތުރުވެގެންދާނެ ކަމެވެ. މި ހުރިހާ ސަބަބުތަކަށްޓަކައި، ދެ އިންތިހާބު އެއްދުވަހެއްގައި ބޭއްވުމަކީ އެންމެ ރަނގަޅު ގޮތް ކަމަށް އަކްރަމް ވަނީ ވިދާޅުވެފަ އެވެ.