މެދުއިރުމަތީގައި މިހާރު ހިނގަމުންދާ ހަނގުރާމައާ ގުޅިގެން ދައުލަތުގެ ހަރަދުތައް ކުޑަކުރުމަށް އަޅާ ފިޔަވަޅެއްގެ ގޮތުން، ސަރުކާރުގެ ފަރާތުން ރާއްޖެއިން ބޭރަށް ކުރާ ދަތުރުތައް މިވަގުތަށް ހުއްޓާލާފައިވާ ކަމަށް ފިނޭންސް މިނިސްޓަރު މޫސާ ޒަމީރު ހާމަކުރައްވައިފި އެވެ.
ރައީސް އޮފީހުގައި އިއްޔެ ބޭއްވި މީޑިއާ ބްރީފިންއެއްގައި މިނިސްޓަރު ވިދާޅުވީ، ދިވެހި ސަރުކާރުން ހަރަދުކުރާ ގޮތަށް ދަތުރުތައް ކުރަން މިހާރު ހުއްދަ ނުދޭ ކަމަށެވެ.
މިނިސްޓަރު ޒަމީރު ވިދާޅުވި ގޮތުގައި މިހާރު ހުއްދަ ދެނީ ހަމައެކަނި ބޭރުގެ ފަރާތްތަކުން ހަރަދުކުރާ "ފަންޑެޑް ދަތުރުތައް" ކުރުމަށެވެ. ނަމަވެސް، ރާއްޖޭގެ ހާރިޖީ ސިޔާސަތާ ގުޅުންހުރި މުހިންމު ކަންކަމުގައި ފޮރިން މިނިސްޓަރު ޑރ. އަބްދުﷲ ހަލީލް ކުރައްވަން ޖެހިވަޑައިގަންނަވާ ދަތުރުތައް ކުރިއަށްދާނެ ކަމަށް އޭނާ ފާހަގަކުރެއްވިއެވެ.
Advertisement
އެހެން ހުރިހާ ބައްދަލުވުންތަކެއްގައި އޮންލައިންކޮށް ބައިވެރިވުމަށް މިހާރު ވަނީ އިރުޝާދު ދީފައެވެ. ހަރަދު ކުޑަކުރުމުގެ މި ސިޔާސަތުގެ ދަށުން މިނިސްޓަރު ޒަމީރު އަމިއްލަފުޅަށް ކުރައްވަން އޮތް ދަތުރެއް ވެސް ވަނީ ކެންސަލް ކުރައްވާފައެވެ.
"އަބޫދާބީ ފަންޑު ފޯ ޑިވެލޮޕްމަންޓު (އޭޑީއެފްޑީ) ގެ 100 މިލިއަން ޑޮލަރުގެ ރޯލްއޯވާގެ ފައިނަލް ސިގްނޭޗާ އަށް އަޅުގަނޑު އޮތީ ދަތުރުކުރަން. އެކަމަކު މިހާރު އޮންލައިންކޮށް އެ ސިގްނޭޗާ ކަންތައް ވެސް ނިންމާ ގޮތަށް ވަނީ ހަމަޖެހިފައި،" މިނިސްޓަރު ވިދާޅުވިއެވެ.
މިނިސްޓަރު އިތުރަށް ވިދާޅުވީ ހަނގުރާމައާ ގުޅިގެން ކުރިމަތިވެފައިވާ ހާލަތަށް ރިއާޔަތްކޮށް، ބައެއް މަޝްރޫއުތަކުގެ މުއްދަތު ދަންމާލުން ފަދަ ފިޔަވަޅުތައް ވެސް އަޅަން ޖެހިދާނެ ކަމަށެވެ. އަދި ދައުލަތުގެ ބަޖެޓުން އިތުރަށް ހަރަދު ކުޑަކުރެވޭނެ ދާއިރާތައް ދެނެގަނެ، އެކަމުގެ ޕްލޭނެއް ކުރިއަށް އޮތް ހަފުތާއެއްގެ ތެރޭގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް ހުށަހަޅުއްވާނެ ކަމަށް ވެސް ޒަމީރު ވިދާޅުވިއެވެ.
އެނަލިސްޓުންގެ ލަފާކުރުންތަކާ ހަވާލާދީ މިނިސްޓަރު ވިދާޅުވީ، ހަނގުރާމަ ހުއްޓުމަކަށް އައި ނަމަވެސް އިގްތިސާދީ ހާލަތު އާންމު ހާލަތަކަށް ރުޖޫއަވުމަށް މަދުވެގެން ހަތަރު މަސް ދުވަސް ނަގާނެ ކަމަށެވެ. އެހެންކަމުން ސަރުކާރުން މިހާރު ތައްޔާރުވަމުންދަނީ މި ހާލަތާ ގުޅޭ ދިގު މުއްދަތުގެ ޕްލޭނެއް އެކުލަވާލުމަށެވެ.
