އެމެރިކާ އަދި އިޒްރާއީލު އިސްވެ އޮވެ އީރާނާ ދެކޮޅަށް ފެށި ހަނގުރާމައާ ގުޅިގެން ކުރިމަތިވެފައިވާ ބައިނަލްއަގުވާމީ ހާލަތަށް ރިއާޔަތްކޮށް، ދައުލަތުގެ ހަރަދުތައް ކުޑަކުރެވޭނެ ދާއިރާތައް ދެނެގަތުމަށްފަހު އެކަމުގެ ޕްލޭން ކުރިއަށް އޮތް ހަފުތާއެއްގެ ތެރޭގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް ހުށަހަޅުއްވާނެ ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެއެވެ.
ރައީސް އޮފީހުގައި އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު ޒަމީރު ވިދާޅުވީ، ފިނޭންސް މިނިސްޓްރީގެ ޓެކްނިކަލް ޓީމުން މިހާރު އެ މަސައްކަތްތައް ކުރަމުން އަންނަ ކަމަށެވެ. އަދި ބާޒާރުގެ އޮތް ނުތަނަވަސްކަމުގެ ސަބަބުން ފައިނޭންސިން ހޯދުމުގައި ބަދަލުތަކެއް އަންނާނެތީ، އެކަމަށް އެކަށީގެންވާ މެކޭނިޒަމެއް ގެންނަން ޖެހޭނެ ކަމަށް ވެސް މިނިސްޓަރު ފާހަގަކުރެއްވިއެވެ.
މިނިސްޓަރު ވިދާޅުވި ގޮތުގައި، ހަނގުރާމަ ހުއްޓުމަކަށް އައި ނަމަވެސް އާންމު ހާލަތަށް ރުޖޫއަވުމަށް މަދުވެގެން ހަތަރު މަސް ދުވަސް ނަގާނެ ކަމަށް އެނަލިސްޓުން ލަފާކުރެއެވެ.
Advertisement
"ފައިނޭންސް ކުރެވޭނެ ކޮންމެވެސް މެކޭނިޒަމެއް ގެންނަން ޖެހޭނެ. ޓޯޓަލް ފައިނޭންސިން އެވެއިލަބަލް ވާނެ އަދަދަށް ވެސް ބަދަލު އަންނާނެ މިހާ ބޮޑު މާކެޓް ވޮލަޓިލަޓީއެއް އައިމާ،" މިނިސްޓަރު ވިދާޅުވިއެވެ.
ރައީސަށް ހުށަހަޅާ ޕްލޭން އެއްކޮށް އާންމު ނުކުރެވުނު ނަމަވެސް، އޭގައި ހިމެނޭ މުހިއްމު ކަންކަން ހާމަކުރައްވާނެ ކަމަށް ޒަމީރު ވިދާޅުވިއެވެ. އީރާނަށް ދިން ހަމަލާތަކާ ގުޅިގެން ސަރުކާރަށް ލިބޭ މަހު އާމްދަނީން ގާތްގަނޑަކަށް 85 މިލިއަން ޑޮލަރު ގެއްލޭނެ ކަމަށް ފިނޭންސް މިނިސްޓްރީން ކުރިން ވަނީ އަންދާޒާކޮށްފައެވެ.
އާމްދަނީ ދަށްވި ނަމަވެސް، ކޮންމެހެން ކުރަންޖެހޭ ބައެއް ހަރަދުތައް ހުންނާނެ ކަމަށާއި، ނަމަވެސް ހަރަދު ކުޑަކުރުމުގެ ފިޔަވަޅެއްގެ ގޮތުން ބައެއް މަޝްރޫއުތައް ފަސްކުރުމަށް ނިންމާފައިވާ ކަމަށް މިނިސްޓަރު މީގެ ކުރިން ވެސް ވަނީ ވިދާޅުވެފައެވެ.
