މިއަހަރުގެ ރަމަޟާން މަހުގެ އަޅުކަމަށްފަހު، ސައުދީ އަރަބިއްޔާއަށް އުމްރާގެ އަޅުކަން އަދާކުރުމަށް ދިޔަ ދިވެހި އުމްރާވެރިން އެނބުރި ރާއްޖެ އަންނަން ފަށައިފިއެވެ.

ރަމަޟާން މަހުގެ ފަހު ދިހައެއްގެ އަޅުކަމަށާއި އީދު ބަންދާ ދިމާކޮށް ގިނަ އަދަދެއްގެ ދިވެހިން އުމްރާއަށް ގޮސްފައިވާއިރު، އިއްޔެއާއި މިއަދު ގިނަ އަދަދެއްގެ އުމްރާވެރިން ވަނީ ރާއްޖެ އައިސްފައެވެ.

މި އަހަރުގެ ރަމަޟާން މަހު އެކި ޖަމާއަތްތަކުގެ ހަވާލުގައި ގާތްގަނޑަކަށް 6،000 އަށްވުރެ ގިނަ ދިވެހިން އުމްރާގެ އަޅުކަން އަދާކުރުމަށް މައްކާއާއި މަދީނާއަށް ދަތުރުކުރި އެވެ. މީގެ ތެރޭގައި ސަރުކާރުގެ ހިލޭ އެހީގައި ފުރަތަމަ ފަހަރަށް އުމްރާއަށް ފޮނުވި 50 މީހުންވެސް ހިމެނެ އެވެ. މިއީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވައުދުފުޅުގެ ދަށުން ކުރިއަށް ގެންދެވުނު ޕްރޮގްރާމެކެވެ.

އުމްރާވެރިން އެނބުރި އަންނަން ފަށާފައިވާއިރު، ކުރިއަށް އޮތް ހަފުތާއެއްހާ ދުވަހުގެ ތެރޭގައި ހުރިހާ ޖަމާއަތްތަކެއްގެ އުމްރާވެރިން ރާއްޖެ އައިސް ނިމޭނެ ކަމަށް މައުލޫމާތު ލިބެ އެވެ. އުމްރާގެ އަޅުކަން އަދާކޮށްފައިވާ ފަރާތްތަކުން ބުނާ ގޮތުގައި، މިއަހަރުގެ ރަމަޟާން މަހު މައްކާގެ ހަރަމްފުޅު ވަރަށް ބޮޑަށް ތޮއްޖެހިފައި އޮތް ނަމަވެސް، އަޅުކަންތައް ކުރިއަށް ގެންދެވުނީ ވަރަށް އަމާންކަމާއެކުގަ އެވެ.

އުމްރާވެރިން ރާއްޖެ އަންނަ ވަގުތުތަކުގައި އެއާޕޯޓުގެ ކަންކަން އޮމާންކަމާއެކު ކުރިއަށް ގެންދިއުމަށް އެއާޕޯޓްސް ކޮމްޕެނީ (އެމްއޭސީއެލް) އިން ވަނީ ހާއްސަ އިންތިޒާމުތަކެއް ހަމަޖައްސާފަ އެވެ. މީގެ އިތުރުން، އުމްރާވެރިން އައުމާއެކު ބަލިތަކަށް ސަމާލުވުމަށާއި، ހާއްސަކޮށް ނޭވާލާ ނިޒާމުގެ ބަލިތަކަށް ރައްކާތެރިވުމަށް ހެލްތު ޕްރޮޓެކްޝަން އެޖެންސީ އެޗްޕީއޭ އިން ވަނީ އިރުޝާދު ދީފަ އެވެ.