ބޭންކް އޮފް މޯލްޑިވްސް (ބީއެމްއެލް) އިން އެ ބޭންކުގެ ހިއްސާގެ އޮނިގަނޑަށް ގެންނަން ނިންމާފައިވާ ބަދަލަކީ، ހިއްސާގެ ބާޒާރަށް އަލަށް ވަންނަން ބޭނުންވާ ޒުވާނުންނަށް ލިބިގެންދާނެ ވަރަށް ފަހި ފުރުސަތެއް ކަމަށް މޯލްޑިވްސް ސްޓޮކް އެކްސްޗޭންޖްގެ މެނޭޖިން ޑިރެކްޓަރު އެންޑް ގްރޫޕް ސީއީއޯ މުހައްމަދު އައުޝަން ލަތީފް ވިދާޅުވެއްޖެ އެވެ.

ދައުލަތުގެ މީޑިއާގައި ވާހަކަދައްކަވަމުން އައުޝަން ވިދާޅުވީ، ރާއްޖޭގެ ހިއްސާގެ ބާޒާރުގައި ލިސްޓްކޮށްފައިވާ އެހެން ކުންފުނިތަކުގެ ހިއްސާގެ އަގުތައް އާންމުކޮށް އުޅެނީ 40 ރުފިޔާއާއި 150 ރުފިޔާއާ ދެމެދުގައި ކަމަށެވެ. ނަމަވެސް ބީއެމްއެލްގެ ހިއްސާއެއްގެ އަގު މިހާރު ހުރީ ގާތްގަނޑަކަށް 800 ރުފިޔާގައި ކަމަށްވުމުން، މިއީ ހިއްސާ ގަންނަން ބޭނުންވާ ޒުވާނަކަށް ނިސްބަތުން ބޮޑު އަދަދެއްކަން އޭނާ ފާހަގަކުރެއްވި އެވެ. އެހެންކަމުން، ބޭންކުން މި ގެންނަ ބަދަލާއެކު އަގުތަކަށް އަންނަ ލުޔަކީ އިންވެސްޓް ކުރަން ބޭނުންވާ ފަރާތްތަކަށް ހުޅުވިގެންދާ އާ ދޮރެއްކަމަށް އައުޝަން ވިދާޅުވި އެވެ.

ހިއްސާގެ ބާޒާރުގައި ޒުވާނުންގެ ދައުރު ފުޅާކުރުމަށް ކުރަމުންދާ މަސައްކަތްތަކަށް އަލިއަޅުއްވާލައްވަމުން އައުޝަން ވިދާޅުވީ، މިދިޔަ އަހަރު ޓްރޭޑިންއާ ގުޅޭ ހުރިހާ ކަމެއް އޮންލައިން ކުރެވިފައިވާ ކަމަށެވެ. އަދި ހިއްސާ ގަނެވިއްކުމަށް ހާއްސަ މޯބައިލް އެޕްލިކޭޝަނެއް ކަމަށްވާ 'އިންފިނިޓީ' އެޕް ނިންމުމުގެ މަސައްކަތް ކުރަމުންދާ ކަމަށާއި، ކޮންމެ އަހަރަކުވެސް ޒުވާނުން ހޭލުންތެރިކުރުމަށް ގިނަ ހަރަކާތްތަކެއް ހިންގާ ކަމަށް އޭނާ ވިދާޅުވި އެވެ.

"އަޅުގަނޑުމެން ގަބޫލުކުރާ ގޮތުގައި މައުލޫމާތު ލިބިފައި ހުރި އަދި މާކެޓަށް އިތުބާރު އޮތް ޒުވާން އިންވެސްޓަރުންގެ ޖީލެއް އުފެދިގެން އަސްލު މި މާކެޓް ކުރިއަށް އޮތްތަނުގައި ފުޅާ ކުރެވޭނީ،" އައުޝަން ވިދާޅުވި އެވެ.

މީގެ އިތުރުން، ރިސޯޓް ނުވަތަ ގެސްޓްހައުސްތައް ލިސްޓްކޮށް، ޑޮލަރުން ހިއްސާދާރުންނަށް އާމްދަނީ ލިބޭނެ މަގު ފަހިވުމަކީ ދެކެން ބޭނުންވާ ދުވަހެއް ކަމަށާއި، ބީއެމްއެލްއިން މި ދެއްކި މިސާލާ އެއްގޮތަށް އެހެން ކުންފުނިތަކުންވެސް ހިއްސާއަށް ފަހި ބަދަލުތަކެއް ގެނައުމަކީ މުހިއްމު ކަމެއް ކަމަށް އޭނާ ވިދާޅުވި އެވެ.

ބީއެމްއެލް އިން ހިއްސާއަށް ގެންނަ މައިގަނޑު ބަދަލުތައް:

1. ބޯނަސް ހިއްސާ ދޫކުރުން: 18 މާޗު 2026 (ރެކޯޑް ޑޭޓް) އާ ހަމައަށް ހިއްސާ އޮތް ފަރާތްތަކަށް، ކޮންމެ 1 ހިއްސާއަކަށް 2 ބޯނަސް ހިއްސާ ދޫކުރުމަށް ބޯޑުން ވަނީ ހުށަހަޅާފައެވެ. މިއީ އެއްވެސް އަގަކާ ނުލައި ދެވޭ އިތުރު ހިއްސާއެކެވެ. މިސާލަކަށް 100 ހިއްސާ އޮތް މީހަކަށް އިތުރު 200 ހިއްސާ ލިބި، ޖުމްލަ 300 ހިއްސާއަށް އިތުރުވާނެ އެވެ.
2. ހިއްސާ ބައިކުރުން: 1:10 ގެ ރޭޝިއޯއިން ހިއްސާ ބައިކުރުމަށް ވަނީ ނިންމާފައެވެ. މީގެ މާނައަކީ ބޯނަސް ހިއްސާއާއެކު މިހާރު ހުރި ކޮންމެ ހިއްސާއެއް 10 ބަޔަށް ބައިކުރެވޭނެ އެވެ. މި ބަދަލާއެކު 100 ހިއްސާ އޮތް ފަރާތަކަށް ޖުމްލަ 3000 ހިއްސާ ލިބޭނެ އެވެ.
3. މި ބަދަލާއެކު ކޮންމެ ހިއްސާއެއްގެ މޫނުމަތީ އަގު 50 ރުފިޔާއިން 5 ރުފިޔާއަށް ކުޑަވެގެންދާނެއެވެ. ނަމަވެސް ހިއްސާދާރުންގެ އަތުގައި ހުރި ހިއްސާގެ ޖުމްލަ އަގަކަށް ބަދަލެއް ނާންނާނެ އެވެ.

މި ބަދަލުގެ މަގުސަދުތައް:

1. އިންވެސްޓަރުންނަށް ކުޑަ އަގެއްގައި ބޭންކުގެ ހިއްސާ ހޯދުމުގެ ފުރުސަތު ދިނުން.
2. ހިއްސާގެ ބާޒާރުގައި އިންވެސްޓަރުންގެ ބައިވެރިވުން އިތުރުކުރުން.
3. މާކެޓް ލިކުއިޑިޓީ އާއި ވިޔަފާރީގެ ހަރަކާތްތައް އިތުރުކުރުން.
4. މުސްތަގުބަލުގައި އިތުރު ހިއްސާ ދޫކުރަން ޖެހިއްޖެ ހާލަތެއްގައި އެކަމަށް ތައްޔާރުވުން.

ބޭންކުން މި ގެންނަ ބަދަލާއެކު، ހިއްސާގެ އަގު ހެޔޮވެ، ގިނަ ބަޔަކަށް ހިއްސާގެ ބާޒާރުގައި ބައިވެރިވުމުގެ ފުރުސަތު ލިބި، ޓްރޭޑިންގ ހަރަކާތްތައް އިތުރަށް ހަލުވިވެގެންދާނެ ކަމަށް ބެލެވެ އެވެ.