ރާއްޖެއަށް ބޭނުންވާ ކާޑާއި ތެލުގެ ބާވަތްތައް މައިގަނޑު ގޮތެއްގައި އެތެރެކުރާ ދައުލަތުގެ މައި ކުންފުނި، އެސްޓީއޯއިން ރާއްޖެއަށް ބޮޑު ތެޔޮ ޓޭންކަރެއް ގަނެފި އެވެ. މި އުޅަނދަކީ ރާއްޖޭގެ ތެލުގެ ސަލާމަތްތެރިކަން ކަށަވަރުކުރުމަށާއި އިމްޕޯޓް ކެޕޭސިޓީ އިތުރުކުރުމަށް އެޅުނު މުހިންމު ފިޔަވަޅެކެވެ.
ކަނޑުދަތުރުފަތުރުގެ ދާއިރާގެ ތަޖުރިބާކާރެއް ކަމަށްވާ ކެޕްޓަން މުހައްމަދު ނާޒިމް އެކްސްގައި ކުރެއްވި ޕޯސްޓެއްގައި ހާމަކުރައްވާފައިވާ ގޮތުގައި، އެސްޓީއޯއިން އަލަށް ގަނެފައިވަނީ 2013 ވަނަ އަހަރު ބަނދެފައިވާ "އެމްޓީ ނިއޯން" ނަމަކަށް ކިޔާ ޓޭންކަރެކެވެ. މީގެ ކުރިން "އެކްސްޓީ ޑޮލްފިން" ގެ ނަމުގައި ލައިބީރިއާގެ ދިދައިގައި ދުއްވި މި އުޅަނދަކީ 27,000 ޑީޑަބްލިޔުޓީގެ، ކެމިކަލް އާއި ތެޔޮ އުފުލުމުގެ ގާބިލުކަން ލިބިފައިވާ އުޅަނދެކެވެ. މިހާރު މި އުޅަނދު ވަނީ ދިވެހިރާއްޖޭގެ ރަޖިސްޓްރީއަށް ބަދަލުކޮށްފަ އެވެ.
މިކަމާ ގުޅިގެން ކެޕްޓަން ނާޒިމް ވަނީ އެސްޓީއޯއަށް ވަރަށް ބޮޑަށް ތައުރީފު ކުރައްވާފަ އެވެ. އޭނާ ސިފަކުރެއްވި ގޮތުގައި މިއީ ރާއްޖޭގެ ތެލުގެ އިމްޕޯޓް ކެޕޭސިޓީ ވަރުގަދަކުރުމަށް އެ ކުންފުނިން އެޅި ވަރަށް ހަރުދަނާ ފިޔަވަޅެކެވެ. ހަމައެއާއެކު، މި މަޝްރޫޢު ކާމިޔާބުކަމާއެކު ކުރިއަށް ގެންދިއުމާ ގުޅިގެން ރައީސުލްޖުމްހޫރިއްޔާ ޑރ. މުހައްމަދު މުއިއްޒުއަށާއި ކަމާބެހޭ އިސްވެރިންނަށް އޭނާ ވަނީ މަރުހަބާ ދަންނަވާފަ އެވެ. އެސްޓީއޯގެ ރަސްމީ އެކްސް އެކައުންޓުން ވަނީ ކެޕްޓަން ނާޒިމްގެ މި ޕޯސްޓު ރީޕޯސްޓުވެސް ކޮށްފަ އެވެ.
Advertisement
ރާއްޖެއަކީ މުޅިންހެން ބޭރުން އިމްޕޯޓްކުރާ ތެލަށް ބަރޯސާވެފައިވާ ގައުމަކަށް ވުމުން، ދުނިޔޭގެ ތެލުގެ ބާޒާރަށް އަންނަ ކޮންމެ ލޮޅުމަކުން ރާއްޖޭގެ އިގްތިސާދަށް ބޮޑެތި އަސަރުތަކެއް ކުރެ އެވެ. އެހެންކަމުން، އެސްޓީއޯއިން އަލަށް ގަތް މި ޓޭންކަރަކީ ތެޔޮ ސަޕްލައި ކުރުމުގައި ދިމާވާ ގޮންޖެހުންތަކުން އަރައިގަތުމަށް ލިބޭނެ ބޮޑު ބާރެކެވެ.
މީގެ އިތުރުން، އެސްޓީއޯއިން ދާދިފަހުން ހާމަކޮށްފައިވާ ގޮތުގައި، ދުނިޔޭގެ ބާޒާރުގައި ތެލުގެ ދަތިކަން ކުރިމަތިވާ ފަދަ ހާލަތްތަކުގައި ބޭނުންކުރުމަށްޓަކައި މިހާރުވެސް 17 ދުވަހުގެ ތެޔޮ ރާއްޖޭގައި ރައްކާކޮށްފައި އެބަހުއްޓެވެ. އައު ޓޭންކަރާއެކު މި ގާބިލުކަން އިތުރަށް ވަރުގަދަވެގެންދާނެ ކަމަށް ބެލެވެ އެވެ.
