ސަރުކާރުން އަލަށް ތައާރަފުކުރާ ޓެކްސީލައިންގެ ހިދުމަތަށް ބޭނުންވާ ޑްރައިވަރުން ހޯދުމަށްޓަކައި މާދަމާ ވޯކް-އިން-އިންޓަވިއުއެއް ކުރިއަށް ގެންދިޔުމަށް އެމްޓީސީސީން ނިންމައިފިއެވެ.

މި އިންޓަވިއުތައް ކުރިއަށްދާނީ މާދަމާ ހެނދުނު 10:00 އިން ހަވީރު 16:00 އާ ހަމައަށް މާފަންނު ބަސްޓާމިނަލްގައެވެ.

ޓެކްސީ ލައިންގެ ހިދުމަތަށް ބޭނުންވާ ޑްރައިވަރުން ހޯދުމަށް އެމްޓީސީސީން ވަނީ މިދިޔަ ޖެނުއަރީ މަހުވެސް ވޯކް-އިން-އިންޓަވިއުއެއް ކުރިއަށް ގެންގޮސްފައެވެ. އެ ފަހަރުގެ އިންޓަވިއުގައި 250 އަށް ވުރެ ގިނަ މީހުން ބައިވެރިވެފައިވާކަމަށް އެ ކުންފުނިން މައުލޫމާތުދެއެވެ.

އެމްޓީސީސީން ހާމަކޮށްފައިވާ ގޮތުގައި ޓެކްސީލައިންގެ ހިދުމަތް ދިނުމަށްޓަކައި ޖުމްލަ 407 ޑްރައިވަރުން ބޭނުންވެއެވެ. މީގެ ތެރޭގައި ހިމެނެނީ ފުލްޓައިމްކޮށް މަސައްކަތް ކުރާނެ 285 ޑްރައިވަރުންނާއި، ޕާޓްޓައިމްކޮށް މަސައްކަތް ކުރާނެ 122 ޑްރައިވަރުންނެވެ. މި ހިދުމަތް ފެށުމަށްޓަކައި މިހާރު ދަނީ އެންމެ ފަހުގެ ތައްޔާރީތައް ވަމުންނެވެ.

ސަރުކާރުގެ ޓެކްސީ ލައިންގައި ބޭނުންކުރާނީ ތިމާވެއްޓާ ރައްޓެހި އުޅަނދުތަކެކެވެ. މި އުޅަނދުތައް ޗާޖް ކުރުމަށް ހާއްސަ އީވީ ސްޓޭޝަންތައް މިހާރު ވަނީ ތައްޔާރުކޮށްފައެވެ. މި ހިދުމަތަކީ 24 ގަޑިއިރު ލިބޭނެ ހިދުމަތަކަށްވާއިރު، ތިން ސައިޒެއްގެ އުޅަނދު މި ހިދުމަތުގައި ބޭނުންކުރުމަށް ވަނީ ހަމަޖެހިފައެވެ.

ސަރުކާރުން މިފަދަ ހިދުމަތެއް ތައާރަފުކުރުމުގެ މައިގަނޑު މަގުސަދަކީ ޓެކްސީ ހޯދުމުގައި އާއްމުންނަށް ދިމާވާ ދަތިތަކަށް ދާއިމީ ހައްލެއް ހޯދައިދިނުމެވެ. މި ހިދުމަތް ދިނުމަށް ހަމަޖެހިފައިވަނީ ހާއްސަ އެޕްލިކޭޝަނެއް މެދުވެރިކޮށް، ބައިނަލްއަގުވާމީ ގޮތުން މަޝްހޫރު އޫބާ އަދި ގްރޭބް ފަދަ ހިދުމަތްތަކުގެ މޮޑެލްއަށެވެ.