ސަލްޓަން ޕާކު ޒަމާނީ ފެންވަރަށް ތަރައްގީކުރުމަށް މޯލްޑިވްސް ނެޝަނަލް ޑިފެންސް ފޯސް (އެމް.އެން.ޑީ.އެފް) އިން ކުރަމުންދާ މަސައްކަތްތައް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ބައްލަވައިލައްވައިފި އެވެ.

މިއަދު މެންދުރު ރައީސުލްޖުމްހޫރިއްޔާ ސަލްޓަން ޕާކަށް ކުރެއްވި މި ޒިޔާރަތުގައި، އެންމެ ފަހުގެ ޓެކްނޮލޮޖީގެ އެހީގައި އެތަނުގައި އަލަށް ގާއިމުކުރާ ވަސީލަތްތަކުގެ މައޫލޫމާތު އޮޅުންފިލުއްވައި، އަމަލީ ގޮތުން މިހާރު ކުރެވިފައިވާ މަސައްކަތްތައް ވަނީ ވަޒަންކުރައްވާފަ އެވެ. މި މަސައްކަތަކީ ޒަމާންތަކަކަށް އަޅާނުލެވި ވީރާނާވަމުންދިޔަ ސަލްޓަން ޕާކު، ކުރު މުއްދަތެއްގެ ތެރޭގައި ތަރައްގީކޮށް އަލުން ހުޅުވުމަށްޓަކައި ސަރުކާރުން އިސްކަންދެއްވައިގެން ކުރިއަށްގެންދާ މަސައްކަތެކެވެ.

މިދިޔަ އޮގަސްޓް މަހުގެ ތެރޭގައި ފެށި މި މަސައްކަތުގެ ދަށުން، ސަލްޓަން ޕާކާއި ޖުމްހޫރީ މައިދާން މަރާމާތަށް ބަންދުކުރުމަށްފަހު، މިހާރު ވަނީ އީދު ދުވަހާ ދިމާކޮށް އާބާތުރަ ފިލުވައި އަލުން ހުޅުވާފަ އެވެ. މިގޮތުން ޕާކުގެ ވިއު ސްޓްރަކްޗާ، ޓްރީހައުސް، ވޯކްވޭތައް އަދި ކުޑަކުދިން ކުޅޭ ސަރަހައްދުތައް ވަނީ މަރާމާތުކޮށްފަ އެވެ. މީގެއިތުރުން، އިށީންނާނެ ބެންޗުތައް ބެހެއްޓުމާއި، ސީސީޓީވީ ކެމެރާތައް ހަރުކުރުމާއި، ގާޑަން ސަރަހައްދު ރީތިކުރުމުގެ މަސައްކަތްވެސް ވަނީ ނިންމާފަ އެވެ.

ޕާކުގެ ފެހިކަން އިތުރުކުރުމަށްޓަކައި ކާޕެޓް ވިނަ އާއި ތަފާތު ރީތި މާގަސްތައް އިންދާފައިވާއިރު، މިއީ އާއިލާތަކާއި ކުޑަކުދިންނަށް ހިތްފަސޭހަ މާހައުލަކަށް ހެދުމަށް ކުރެވުނު މަސައްކަތެކެވެ. ސަލްޓަން ޕާކު މުޅިން ނިމޭއިރު، ކުރިން ވިންޓާ ޕާކު ހުރި ސަރަހައްދުގައި އީ-ގޭމިން މަރުކަޒެއްވެސް ގާއިމުކުރެވިގެންދާނެ އެވެ.

ރައީސުލްޖުމްހޫރިއްޔާގެ މި ޒިޔާރަތުގައި، ބަރަކާތްތެރި ފިތުރު އީދުގެ މުނާސަބަތުގައި އެމް.އެން.ޑީ.އެފް އިން ވިލަރެސްކޮށްގެން ކުރިއަށްގެންދާ "އީދު ހަވީރު 1447" ގެ ހަރަކާތްތަކަށް ވަމުންދާ ތައްޔާރީތައްވެސް ބައްލަވާލެއްވި އެވެ. އެގޮތުން ސަލްޓަން ޕާކުގައި ތައްޔާރުކޮށްފައިވާ އޯވަހެޑް އޮބްސްޓެކްލް ކޯސް، ޝޫޓިން ރޭންޖް އަދި އެކިއެކި ސްޓޯލްތަކުގެ މަސައްކަތްތައް އެމަނިކުފާނު ބައްލަވައިލެއްވި އެވެ.

މާލޭގެ ޕާކުތައް ތަރައްގީކުރުމުގެ މަޝްރޫއުގެ ދަށުން، ރަސްފަންނުގެ އާބާތުރަ ފިލުވުމުގެ މަސައްކަތްވެސް އެމް.ޓީ.ސީ.ސީ އަދި އެމް.ޑަބްލިޔު.އެސް.ސީ އާ ހަވާލުކޮށްގެން މިހާރު ދަނީ ކުރިއަށްގެންދަމުންނެވެ.