ޢީދާ ގުޅިފައިވާ ރީތި އާދަތައް ދިރުވައި އާލާކޮށް، އެއްބައިވަންތަކަމުގެ އަގުހުރި ރަމްޒަކަށް އީދު އަބަދުވެސް ހަދަންވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ ބަރަކާތްތެރި ފިތުރު އީދުގެ ތަހުނިޔާ ފޮނުއްވައި ސޯޝަލް މީޑިއާގައި ހިއްސާކުރެއްވި ޕޯސްޓެއްގައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ އީދަކީ ދިވެހީންގެ މެދުގައި ޒަމާނުއްސުރެ އޮތް އިސްލާމީ ސަގާފަތާއި ދިވެހިވަންތަ އެތައް ރިވެތި އާދަކާދައަކާ ލާމެހިފައިވާ ހާއްސަ މުނާސަބާއެއްކަމަށެވެ. އަދި މުސްލިމުންނަށް އަންނަ ދެ އީދަކީވެސް ދިވެހި އިސްލާމީ މުޖްތަމައާ ކޮންމެ އަހަރަކު ބައްދަލުވާ އެންމެ އުފާވެރި ފޯވައްސަށްވުމަކީ އުންމީދެއްކަމަށްވެސް އެމަނިކުފާނު ވިދާޅުވިއެވެ.

"ކާބަފައިންގެ ޒަމާނުއްސުރެ ޢީދާއި ގުޅިފައިވާ ރީތި އާދަތައް ދިރުވައި އާލާކޮށް ދިވެހިންގެ އަމިއްލަވަންތަކަމާއި އެއްބައިވަންތަކަމުގެ އަގުހުރި ރަމްޒަކަށް އީދު އަބަދުވެސް ހަދަންވާނެ،" ރައީސް ވިދާޅުވިއެވެ.

ރައީސުލްޖުމްހޫރިއްޔާގެ އިތުރުން އެމަނިކުފާނުގެ އަނބިކަނބަލުން ސާޖިދާ މުޙައްމަދުވެސް ވަނީ ބަރަކާތްތެރި ފިތުރު އީދުގެ ތަހުނިޔާއާއި ހެޔޮއެދުންތައް އަރިސްކުރައްވާފައެވެ. ހަމައެއާއެކު، ރައީސުލްޖުމްހޫރިއްޔާގެ ނައިބު ހުސައިން މުޙައްމަދު ލަޠީފްވެސް ވަނީ ރާއްޖޭގެ އެންމެހައި ރައްޔިތުންނަށް އީދުގެ ތަހުނިޔާ ދަންނަވާފައެވެ.

މިއަހަރުގެ ފިތުރު އީދު ފާހަގަކުރުމަށްޓަކައި ސަރުކާރުގެ ކުންފުނިތަކާއި އިދާރާތައް ގުޅިގެން "އީދު ހަވީރު 1447" ގެ ނަމުގައި ގިނަ ހަރަކާތްތަކެއް ވަނީ ރާވާފައެވެ. މި ހަރަކާތްތައް އީދު ދުވަހުން ފެށިގެން ޖުމްލަ ތިން ދުވަހުގެ މުއްދަތަށް ކުރިއަށްދާނެއެވެ.

މި ހަރަކާތްތައް ކުރިއަށް ގެންދިއުމަށް ހަމަޖެހިފައިވަނީ ގްރޭޓާ މާލޭގެ 4 ސަރަހައްދެއްގައެވެ. މިއީ ރައްޔިތުންނަށް އުފާވެރި މާހައުލެއްގައި އީދު ފާހަގަކުރުމުގެ ފުރުސަތު ފަހިކޮށްދިނުމުގެ ގޮތުން ކުރިއަށްގެންދާ ހަރަކާތްތަކެކެވެ.