1447 ވަނަ އަހަރުގެ ފިޠުރު ޢީދު ނަމާދާ ގުޅިގެން، މާލޭގެ ބައެއް ސަރަހައްދުތަކުގެ ޓްރެފިކް ފްލޯއަށް ބަދަލު ގެނައުމަށް ދިވެހި ފުލުހުންގެ ޚިދުމަތުން ނިންމައިފި އެވެ.
ފުލުހުން ބުނި ގޮތުގައި މި ބަދަލުތައް ގެނައުމަށް ހަމަޖެހިފައިވަނީ ޢީދު ނަމާދު ބޮޑު ޖަމާއަތުގައި ކުރާ ސަރަހައްދުތަކުގެ ސަލާމަތާއި ރައްކާތެރިކަން ބެލެހެއްޓުމުގެ މަގުސަދުގަ އެވެ. މިގޮތުން ޓްރެފިކް ފްލޯއަށް ބަދަލު ގެނައުމަށް ހަމަޖެހިފައިވަނީ އިސްލާމީ މަރުކަޒު، ސަލްމާން މިސްކިތް އަދި މާފަންނު ސްޓޭޑިއަމް ހިމެނޭ ސަރަޙައްދުތަކަށެވެ. މިއީ ކޮންމެ އަހަރަކުވެސް ގިނަ އަދަދެއްގެ ބަޔަކު ޢީދު ނަމާދަށް އެއްވާ ސަރަހައްދުތަކެކެވެ.
ފުލުހުން ވަނީ ޓްރެފިކަށް ބަދަލު ގެންނަ ސަރަހައްދުތައް ހިމެނޭ ޗާޓެއް އާންމުކޮށްފަ އެވެ. އެ ޗާޓުގައި ޕާކުކުރުން މަނާކަމަށް ކަނޑައަޅާފައިވާ ސަރަހައްދުތަކުގައި ހުރި އުޅަނދުތައް، މާދަމާގެ 15:00 ގެ ކުރިން އެ ސަރަހައްދުތަކުން ނެގުމަށް ފުލުހުން ވަނީ އިލްތިމާސްކޮށްފަ އެވެ. މިއީ އީދު ނަމާދުގެ އިންތިޒާމުތައް އެންމެ ފުރިހަމައަށް ކުރިއަށް ގެންދިއުމަށްޓަކައި އެޅި ފިޔަވަޅެއް ކަމަށް ފުލުހުން ބުނެ އެވެ.
މިފަދަ ކަންކަމުގައި އާންމު ރައްޔިތުންގެ ފަރާތުން ލިބޭ އެއްބާރުލުމަށް ފުލުހުން ވަނީ ޝުކުރު އަދާކޮށްފަ އެވެ. އަދި މި އިންތިޒާމުތަކުގެ ސަބަބުން އާންމު ރައްޔިތުންނަށް ދިމާވެދާނެ ދަތިތަކަށްޓަކައި ފުލުހުން ވަނީ މައާފަށް އެދިފަ އެވެ.
މިއަހަރުގެ ފިޠުރު ޢީދު ނަމާދު މާލެ ސަރަހައްދުގެ 4 ތަނެއްގައި ބޮޑު ޖަމާއަތުގައި ކުރުމަށް ވަނީ ހަމަޖެހިފައެވެ. އެ ސަރަހައްދުތަކަކީ:
- މާލޭގެ މާފަންނު ސްޓޭޑިއަމް ސަރަހައްދު
- ވިލިމާލެ ފުޓުބޯޅަ ދަނޑު
- ހުޅުމާލޭގެ ފުރަތަމަ ފިޔަވަހީގެ ސިންތެޓިކް ޓްރެކް
- ހުޅުމާލެ ދެވަނަ ފިޔަވަހީގެ މަސްޖިދު ހަސަން އާދަމްއާއި ނިރޮޅުމަގާއި ހީނާމާ ހިނގުމާއި ފޭރުގަސް މަގާއި، ދުބުރި ގަސްމަގާއި އެއް އިންކޮށް އޮންނަ ހުސްބިން
ބޮޑު ޖަމާއަތުގެ އިތުރުން، މާލެ ސަރަހައްދުގެ ޖުމްލަ 24 މިސްކިތެއްގައި އީދު ނަމާދު ކުރާނެ ކަމަށް އިސްލާމިކް މިނިސްޓްރީން މައުލޫމާތު ދެ އެވެ.
