މާލޭގެ ލޯކަލް މާރުކޭޓު މިހާރު ހިންގަމުންދާ ބިމުގައި ޒަމާނީ މާކެޓް ކޮމްޕްލެކްސްއެއް ތަރައްގީކުރުމަށް ޓްރަސްޓެން މޯލްޑިވްސް ޕްރައިވެޓް ލިމިޓެޑާ ހަވާލުކޮށްފިއެވެ. 

ކޮންސްޓްރަކްޝަން މިނިސްޓްރީގައި އިއްޔެ ބޭއްވި ރަސްމިއްޔާތެއްގައި މިނިސްޓްރީގެ ފަރާތުން މިކަމުގެ އެއްބަސްވުމުގައި ސޮއިކުރެއްވީ ޕާމަނަންޓް ސެކްރެޓަރީ މުޙައްމަދު ޝާމިލްއެވެ. ޓްރަސްޓެން މޯލްޑިވްސްގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު މުޙައްމަދު ޢަބްދުލް ހާދީއެވެ. މި މަޝްރޫއަކީ ޖުމްލަ 126.3 މިލިއަން ރުފިޔާގެ މަޝްރޫއެކެވެ.

މާލެ މަސްމާރުކޭޓު ކުރިމަތިން މިހާރު ހިންގަމުން އަންނަ ލޯކަލް މާރުކޭޓު ހުރި ބިމުގައި ބިނާކުރާ މި ކޮމްޕްލެކްސްގައި 6 ފަންގިފިލާ ހިމެނޭނެއެވެ. އިމާރާތުގެ ބޭސްމަންޓްގައި 400 އަށްވުރެ ގިނަ ސައިކަލު ޕާކު ކުރެވޭނެ ޖާގަ އޮންނާނެއެވެ. ގްރައުންޑް ފްލޯރ ހާއްސަކޮށްފައިވަނީ މަސް ވިއްކުމަށެވެ. އެގޮތުން ސްޓެއިންލެސް ސްޓީލްގެ 110 ގޮޅިއާއި، މަސްވެރިންނަށް ބޭނުންވާ އައިސް ފޯރުކޮށްދިނުމަށް 5 ޓަނުގެ އައިސް ޕްލާންޓެއް އެތަނުގައި ހުންނާނެއެވެ.

^{މާލެ ވެޓް މާރުކޭޓް ކޮމްޕްލެކްސްގެ ކުރެހުމެއް---}

އިމާރާތުގެ ފުރަތަމަ، ދެވަނަ އަދި ތިންވަނަ ފަންގިފިލާ ހާއްސަކޮށްފައިވަނީ މޭވާއާއި ތަރުކާރީ ވިއްކުމަށެވެ. ކޮންމެ ފަންގިފިލާއެއްގައި 115 ގޮޅި ހިމެނޭއިރު، މުޅި އިމާރާތުގައި ޖުމްލަ 345 ގޮޅި މޭވާއާއި ތަރުކާރީއަށް ހުންނާނެއެވެ. އަދި އިމާރާތުގެ ޓެރަސްގައި ކާބޯތަކެތީގެ ހިދުމަތް ދިނުމަށް ހާއްސަ ފުޑް ކޯޓެއް ތަރައްގީކުރުމަށް ވަނީ ނިންމާފައެވެ.

މި މަޝްރޫއުގެ ދަށުން މާލޭގެ ބާޒާރުމަތީގައި މިހާރު ވަކިވަކިން ހިންގަމުންދާ ދަތުރުވެރިންގެ މާރުކޭޓާއި، މަސް މާރުކޭޓާއި، ލޯކަލް މާރުކޭޓުގެ ހިދުމަތްތައް އެއް ފުރާޅެއްގެ ދަށަށް ބަދަލުވެގެންދާނެއެވެ. މިއީ ބާޒާރުމަތީގެ ތޮއްޖެހުން ކުޑަކޮށް، ވިޔަފާރިވެރިންނަށާއި އާންމުންނަށް ޒަމާނީ ފެންވަރުގެ ހިދުމަތްތަކެއް ފޯރުކޮށްދިނުމަށް އެޅޭ މުހިންމު ފިޔަވަޅެކެވެ.

ޓްރަސްޓެންގ މޯލްޑިވްސްއާ މި މަސައްކަތް ހަވާލުކޮށްފައިވަނީ 1 އަހަރާއި 8 މަސް ދުވަހުގެ ތެރޭގައި ނިންމާ ގޮތަށެވެ. އަންނަ އަހަރުގެ ފަހުކޮޅަށް މި މަސައްކަތް ނިމުމުން، މާލޭގެ ބާޒާރުމަތީގެ މަލަމަތި ބަދަލުވެ، އެ ސަރަހައްދުގެ މަގުތަކަށާއި ބަނދަރަށް އަންނަ ބާރު ބޮޑުތަނުން ކުޑަވެގެންދާނެ ކަމަށް ސަރުކާރުން އުންމީދު ކުރެއެވެ.