މެދުއިރުމަތީގެ މަސްރަހު ނުތަނަވަސްވެފައިވާ މި ދަނޑިވަޅުގައި، އަވަށްޓެރި ގައުމުތަކަށް އަމާޒުކޮށް އެއްވެސް ހަމަލާއެއް ނުދިނުމަށް ފަލަސްތީނުގެ ހަމާސް ޖަމާއަތުން އީރާނަށް ގޮވާލައިފި އެވެ. ނަމަވެސް، އިސްރާއީލާއި އެމެރިކާއިން އީރާނާ ދެކޮޅަށް ފަށާފައިވާ އުދުވާންތަކުން ދިފާއުވުމަށްޓަކައި، ބައިނަލްއަގުވާމީ ގާނޫނުތަކާއި އުސޫލުތަކުގެ ތެރެއިން އަމިއްލަ ނަފްސު ދިފާއުކުރުމުގެ ފުރިހަމަ ހައްގު އީރާނަށް ލިބިގެންވާކަން އެ ޖަމާއަތުން ވަނީ ކަށަވަރުކޮށްދީފަ އެވެ.
ހަމާސްއިން މިފަދަ ބަޔާނެއް ނެރެފައިވަނީ، ސަރަހައްދީ ހަމަޖެހުން ދެމެހެއްޓުމަށާއި އިސްލާމީ ގައުމުތަކުގެ މެދުގައި އޮންނަ އުހުއްވަތްތެރިކަމުގެ ގުޅުމަށް ބުރުލެއް އެރިޔަ ނުދިނުމުގެ މަގްސަދުގަ އެވެ. ހަމާސްގެ ބަޔާނުގައި ބުނެފައިވަނީ، އީރާނަށް ކުރިމަތިވަމުންދާ އުދުވާންތަކަށް ރައްދު ދިނުމުގައި އަވަށްޓެރި ގައުމުތަކަށް އަމާޒުކުރުމުން ދުރުހެލިވުމަށް އެދޭ ކަމަށެވެ. އަދި ސަރަހައްދީ ގައުމުތަކުން ގުޅިގެން މި އުދުވާންތައް ހުއްޓުވުމަށް މަސައްކަތް ކުރުމަށްވެސް އެ ޖަމާއަތުން ވަނީ ގޮވާލާފަ އެވެ.
މިދިޔަ ފެބުރުވަރީ މަހުގެ 28 ވަނަ ދުވަހު އެމެރިކާއާއި އިސްރާއީލުން އީރާނާ ދެކޮޅަށް ހަނގުރާމަ ފެށި ފަހުން، ގަލްފުގެ ބައެއް ގައުމުތަކަށް އީރާނުގެ މިސައިލާއި ޑްރޯން ހަމަލާތަކެއް އަމާޒުވެފައިވާ ކަމަށް އެ ގައުމުތަކުން ވަނީ ރިޕޯޓްކޮށްފަ އެވެ. މީގެ އިތުރުން، އެމެރިކާގެ ރައީސް ޑޮނަލްޑް ޓްރަމްޕްގެ "ބޯޑް އޮފް ޕީސް" އަށް އެހީތެރިވުމުގެ ގޮތުން ގަލްފުގެ ގައުމުތަކުން ވަނީ 4 ބިލިއަން ޑޮލަރަށްވުރެ ގިނަ ފައިސާގެ އެހީ ދިނުމަށް ވައުދުވެފަ އެވެ.
Advertisement
އީރާނަކީ ދިހަވަރަކަށް އަހަރު ވަންދެން ހަމާސްއަށް އަސްކަރީ އަދި މާލީ އެހީތެރިކަން ފޯރުކޮށްދެމުންދާ ގައުމެކެވެ. ހަމާސްއަކީ ލުބުނާނުގެ ހިޒްބުﷲ އާއި ޔަމަނުގެ ހޫޘީން ހިމެނޭ، އިސްރާއީލާ ދެކޮޅު "އެކްސިސް އޮފް ރެސިސްޓެންސް" ގެ މުހިންމު ބައެކެވެ.
މި މައްސަލައާ ގުޅިގެން އީރާނުން އަދި ވަކި އެއްޗެއް ބުނެފައި ނުވި ނަމަވެސް، އިސްރާއީލުން ދޭ ކޮންމެ ހަމަލާއަކަށް ހަރުކަށި ރައްދެއް ދޭނެ ކަމަށް އީރާނުގެ އަސްކަރީ އިސްވެރިން ވަނީ މީގެ ކުރިން ވިދާޅުވެފައެވެ.
