އިނގިރޭސި ޕްރިމިއާ ލީގުގައި މިރޭ އާސެނަލް އާއި އެވަޓަން ބައްދަލުކުރި މެޗު 2-0 އިން އާސެނަލް ކާމިޔާބުކުރިއިރު، އެ ޓީމުގެ އުމުރުން 16 އަހަރުގެ ވިންގާ މެކްސް ޑޯމަން ޕްރިމިއާ ލީގުގެ ތާރީހުގައި ލަނޑު ޖެހި އެންމެ ޒުވާން ކުޅުންތެރިޔާގެ ޝަރަފު ހޯދައިފި އެވެ.
މެޗުގެ އިތުރު ވަގުތުގެ ތެރޭގައި ޑޯމަން މި ލަނޑު ކާމިޔާބުކުރީ އާސެނަލްގެ ހާފުގެ މެދުތެރެއިން ބޯޅަ ހޯދައި، އެވަޓަންގެ ދެ ކުޅުންތެރިން ކައިރިން ނައްޓާލުމަށްފަހު ކައުންޓާ އެޓޭކެއްގަ އެވެ. މި ވަގުތަކީ އެވަޓަންއަށް ލިބުނު ކޯނަރެއްގައި އެ ޓީމުގެ ގޯލްކީޕަރު ޖޯޑަން ޕިކްފޯޑްވެސް ކުރިއަށް އަރައި ހުއްޓާ ލިބުނު ފުރުސަތަކަށް ވުމުން، ޑޯމަން ބޯޅަ ފޮނުވާލީ ހުސްކޮށް އޮތް ގޯލުގެ ތެރެއަށެވެ.
އިނގިރޭސި ފުޓްބޯޅައިގެ އުއްމީދީ ތަރި، ޑޯމަން މި ރެކޯޑް ގާއިމުކުރީ އުމުރުން 16 އަހަރާއި 73 ދުވަހުގަ އެވެ. މިއީ އޭނާ ޕްރިމިއާ ލީގުގައި ކުޅުނު ތިންވަނަ މެޗެވެ. މީގެ ކުރިން މި ރެކޯޑް އޮންނަނީ އެވަޓަންގެ ކުރީގެ ކުޅުންތެރިޔާ ޖޭމްސް ވޯން އަތުގަ އެވެ. އޭނާ 2005 ވަނަ އަހަރު ކްރިސްޓަލް ޕެލަސްއާ ދެކޮޅަށް ލަނޑު ޖެހިއިރު އުމުރަކީ 16 އަހަރާއި 270 ދުވަހެވެ.
މިދިޔަ ނޮވެމްބަރު މަހު ޑޯމަން ވަނީ ޗެމްޕިއަންސް ލީގުގެ ތާރީހުގައި ކުޅުނު އެންމެ ޒުވާން ކުޅުންތެރިޔާގެ ރެކޯޑްވެސް މުގުރާލާފަ އެވެ. އެއީ 15 އަހަރާއި 308 ދުވަހުގައި ސްލާވިއާ ޕްރާގާ ދެކޮޅަށް ކުޅެން އެރުމުންނެވެ.
އަދިވެސް ސްކޫލްގައި ކިޔަވަމުންދާ ޑޯމަންއަށް، އާސެނަލްގެ ސީނިއާ ޓީމާއެކު ފަރިތަކުރުމުގެ ފުރުސަތު ކޯޗު މިކޭލް އާޓެޓާ ދިނީ މިދިޔަ އަހަރުގެ ޑިސެމްބަރު މަހު އޭނާގެ އުމުރުން އެންމެ 14 އަހަރުގަ އެވެ. އަދި ސީޒަނުގެ ކުރިން އާސެނަލް އިން އޭޝިއާގައި ކުރި ދަތުރުގައި އޭސީ މިލާން އާއި ނިއުކާސަލްއާ ދެކޮޅަށް ކުޅުނު މެޗުތަކުގައި އޭނާ ވަނީ މޮޅު ކުޅުމެއް ދައްކާފަ އެވެ. ޕްރިމިއާ ލީގުގެ ގަވާއިދު ބުނާގޮތުން 18 އަހަރުން ދަށުގެ ކުޅުންތެރިން ސީނިއާ ކުޅުންތެރިންނާ ވަކިން ހުންނަ ކޮޓަރިއެއްގައި ހެދުން ބަދަލުކުރަން ޖެހޭތީ، ޑޯމަން ފަރިތަކުރުންތަކާއި މެޗުތަކަށް ތައްޔާރުވަނީ ވަކި ކޮޓަރިއެއްގަ އެވެ.
ޕްރިމިއާ ލީގުގައ މިރޭ ކުޅުނު އެހެން މެޗުތަކަށް ބަލާއިރު، ނިއުކާސަލް އިން ވަނީ 1-0 އިން ޗެލްސީ ބަލިކޮށްފައެވެ. ބްރައިޓަން އިން ސަންދަލޭންޑްގެ މައްޗަށް ކުރިހޯދީ 1-0 އިންނެވެ. އަދި ބާންލޭ އާއި ބޯންމައުތު ބައްދަލުކުރި މެޗު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރުވެގެންނެވެ.
ތާވަލުގައި އާސެނަލް އެއްވަނައިގައި ހަމަޖެހިލައިގެން އޮތީ 70 ޕޮއިންޓް ހޯދައިގެންނެވެ. ލީގުގައި ބާކީ ހަތް މެޗު އޮތްއިރު ދެވަނައިގައި އޮތް ސިޓީއާ 10 ޕޮއިންޓުގެ ފަރަގެއް އެބައޮތެވެ.
